Ke mancbil tyol Jacob
49
E tzajtzun ttxcoꞌn Jacob ke tcyꞌajal ex xi tmaꞌn cye cyjaꞌ: Che lakꞌetze ex cxel nmaꞌne cyeye aju cbajel cyiꞌje tuj tkꞌijlalil tzul.2 Akeye ncyꞌajal, che lakꞌetze tuꞌn cybinteye, akine Jacob. Cybintze nyole, akine Israel aju cymane.
3 Rubén, aya nej ncꞌwaꞌle; aya wipumale ex tnejel ncꞌwaꞌle tej kꞌiꞌntok wipune. Mas nimbil teya ex mas tipumala.
4 Ic ttena ic tzaꞌn aꞌ in xpulkꞌin wen; mya aya ctel nim toclen tuꞌnju tbinchaya mya baꞌn twi nwatbile, akine tmana. Cub tana tucꞌil nxuꞌjile.
5 Simeón ex Leví cyerman cyib, jatz cyiꞌn naj cyspad tuꞌn cykꞌojin tuꞌn ttxꞌuꞌjil cywiꞌ.
6 Mlayx chin tene cyucꞌil oc toc cychmon cyib tuꞌn tbant tiꞌj jun cyyol, tuꞌnju e cub cybyoꞌn xjal tuꞌn cytxꞌuꞌjil ex nok tuꞌn cychquinibil biꞌx e cyaj coxeꞌ tor cyuꞌn.
7 Tzajwit mya baꞌn cyibaj tuꞌn tlaj cytxꞌuꞌjil cyuwxix wen ex tloꞌch cycꞌuꞌj nimxix wen. Che elel sputj wuꞌne cyxol aj Israel.
8 Judá cjawil nimsaꞌna cyuꞌn ke termaniya. Ctzyetel tiꞌj cykul aj kꞌoj tiꞌja tuꞌna, ex che nimal ke termaniya twitza.
9 Judá, aya mer ic tzaꞌn tal balun. Ncyꞌajal, ma tzꞌoca ic tzaꞌn jun balun tbajlenxi chyoꞌn tiꞌj tcanb. Ma cub wutꞌeꞌ ex ma cub buneꞌ twitz txꞌotxꞌ ic tzaꞌn jun balun matij. ¿Alcye cꞌoquex yonte te?
10 Mi jun cꞌelel kꞌinte oclenbaj te Judá, mi aju tvar rey tuj tkꞌab max oc tul Siloh, twitztzun che nimal ke nasyon.
11 Cꞌoquel tcꞌaloꞌn tbur tiꞌj tkan uva, atzun tal bur cꞌoquel tcꞌaloꞌn tiꞌj tkan uva tbanilxix. Cꞌelel ttxꞌjoꞌn t-xbalun tuj taꞌl twitz uva.
12 Ke tbakꞌ twitz mas kꞌek che queꞌyin twitz taꞌl twitz uva; ex ke twitz teꞌ mas sak che queꞌyin twitz lech.
13 Cnajal Zabulón ttzi mar jatum in che pon barc, ex cpol tmojonil ttxꞌotxꞌ max tuj Sidón.
14 Ic tten Isacar ic tzaꞌn jun bur ikal iktz in ojlan tuj tja.
15 Tej tlonte txꞌotxꞌ baꞌnxix ex txubtxaj tuꞌn tojlan, bant tten ttzal tiꞌj tuꞌn t-xi tiꞌn iktz ex mintiꞌ cub t-xcꞌayin tib tuꞌn toc te majen.
16 Ccawil Dan cyibaj ke t-xjalil, ic tzaꞌn juntl cꞌloj tiyjil Israel.
17 Cꞌoquel Dan ic tzaꞌn jun lobaj in cub ten ttxlaj be, nneꞌl ttzacꞌpuꞌn t-xe tkan chej ex in tzaj tzꞌak aju xjal tjax tibaj tuꞌn.
18 Ay Nman, in chin ayone tuꞌn nclete tuꞌna.
19 Che oquel ten soldad kꞌojlel tiꞌj Gad; pero te tibajxi che lajetel tuꞌn.
20 Tbanilxix twa Aser ctel, ic tzaꞌn cywa rey.
21 Cꞌoquel Neftalí ic tzaꞌn jun ttxu masat in bet tzokpiꞌn, ex c-yolil tiꞌj yol tbanilxix.
22 Cꞌoquel José ic tzaꞌn jun awal tcub ttzi aꞌ in tkꞌoꞌn nimxix twitz, ex che japunel ke tkꞌab tibaj tapya.
23 Tzaj tloꞌch cycꞌuꞌj ke xol plech tiꞌj, xi cyxoꞌn plech tiꞌj ex e oc tzokpaj tiꞌj;
24 atzunte José, cyuw e ten ke tkꞌab, ex cyuw tzyet xobl tplech tuꞌnte Tdios Jacob aju at tipumal, tuꞌnte Cypastor ke aj Israel ex Colol cyiꞌj,
25 tuꞌnte Tdios tmana aju cꞌonil teya, ex tuꞌnte Dios aju ccyꞌiwlalte teya ex at tipumal tuꞌn tbant tcyakil tuꞌn. Oc tcꞌmaꞌya cyꞌiwbil tzajni twitz cyaꞌj, oc tcꞌmaꞌya cyꞌiwbil tuꞌn aꞌ in jatz jlet max t-xeꞌpun txꞌotxꞌ, ex oc tcꞌmaꞌya cyꞌiwbil tuꞌn cypokꞌl xjal ex alumaj, ex tuꞌn cychꞌiy.
26 Mas maꞌ ke cyꞌiwbil o ncꞌame cywitz ke cyꞌiwbil o cycꞌam ke nmane ex ke nchmane. Maꞌxix cyꞌiwbil che bel ten tibaj José, ex che pol baj max cywi witz mintiꞌ bajsbil cye. Ke cyꞌiwbil lu che bel ten tibaj José aju el paꞌn cyxol ke txkantl terman.
27 Cꞌoquel Benjamín ic tzaꞌn jun xoꞌj in tzyun tcanb; te prim cxel tchyoꞌn ex te kale cxel t-sipan aju otok tzꞌel tiꞌn tuj kꞌoj, chi Jacob.
28 Atzun ke cablaj cꞌloj tiyjil Israel jlu, ex atzun yol lu xi tmaꞌn cyman cye tej t-xi tkꞌoꞌn cyꞌiwbil te teyle te junjun.
Cyim Jacob
29 Ax icx xi tmaꞌn cye tcyꞌajal cyjaꞌ: Chꞌix tpon or tuꞌn ncyime. Chin cymakun ocxe junx cyucꞌil ke nxeꞌchele tuj toyꞌ pic aju at tuj ttxꞌotxꞌ Efrón aju aj Hetey. 30 Aju toyꞌ pic lu, atzun taꞌ tuj cojbil Macpela tbi, twitz Mamre, max tuj txꞌotxꞌ Canaán. O tzꞌel tlakꞌoꞌn Abraham te Efrón junx tucꞌil txꞌotxꞌ, tuꞌn tajben te mukbil. 31 Atzun ocx makuꞌn Abraham tucꞌix Sara aju t-xuꞌjil; ax icx ocx makuꞌn Isaac tucꞌix Rebeca aju t-xuꞌjil; ax icx atzun ocx nmakuꞌne Lea. 32 El lakꞌoꞌn aju txꞌotxꞌ tucꞌix toyꞌ pic, cyucꞌil ke aj Hetey, chi Jacob.
33 Tej tbaj tmaꞌn Jacob ke yol lu cye tcyꞌajal, xi tbinchaꞌn tten twi twatbil, jaw baj t-xew ex cyim.
Cyjaꞌtzun tten pon cyxol ke t-xeꞌchel.