Cub cyꞌiwlaꞌn Efraín ex Manasés tuꞌn Jacob
48
Te tibajxi jlu, pon tkanil tucꞌil José, otok yabt tman. Xiꞌtzun José tucꞌil ex xi tiꞌn Manasés ex Efraín, akeju cabe tcyꞌajal. 2 Tej tbinte Jacob otok tzul José aju tcyꞌajal lolte te, jaw tipuman tib, cub keꞌ twi twatbil, 3 ex xi tmaꞌn te José cyjaꞌ: Aju Dios at tipumal tuꞌn tbant tcyakil tuꞌn cub tyecꞌun tib nwitze tuj tnam Luz tuj txꞌotxꞌ Canaán, ex cub cyꞌiwlaꞌn kine tuꞌn. 4 Tzaj tmaꞌn weye cyjaꞌ: Wuꞌne cchmetel nim tbaja ex nim tiyjila. Tiꞌja che elel nimcu cꞌloj xjal. Cxel nkꞌoꞌne txꞌotxꞌ lu cye tiyjila che ul itzꞌj te tibajxi, ex cꞌoquel te cye te jumajx, chi Dios. 5 Atzun jaꞌlo, weye Efraín ex Manasés, akeju cabe tcyꞌajala e ul itzꞌj tzalu tuj Ejipt tej naꞌnxtok wule tucꞌila tuj txꞌotxꞌ lu. Weye ke jlu ic tzaꞌn Rubén ex Simeón. 6 Atzun ke tcꞌwaꞌla che ul itzꞌj cyibajxi ke jlu, atzun ke teya, ex nok tuꞌnju cyerman cyib tucꞌil Efraín ex Manasés at cyoclen tiꞌj etzbil cyucꞌil. 7 Tej wajtze tuj Padan-aram cyaj cyim Raquel aju ttxuꞌya tuj txꞌotxꞌ Canaán, tej chꞌixtok ncanune tuj Efrata, ex cuꞌx nmakuꞌne tuj tbeyil Efrata, aju ax juntl tbi Belén, chi Jacob.8 Til Israel ke tcyꞌajal José ex xi tkanin te cyjaꞌ:
—¿Alcye ke jlu? Chi Israel.
9 Xi ttzakꞌweꞌn José te tman:
—Atzun ke ncyꞌajale o che tzaj tkꞌoꞌn Dios tzalu, chi José.
Xitzun tmaꞌn tman te cyjaꞌ:
—Che tlakꞌbantza ke nwitze tuꞌntzun cycub ncyꞌiwlaꞌne, chi tman.
10 Myaxix baꞌntok tbakꞌ twitz Israel tuꞌnju otok tijin. Tuꞌntzun jlu mintiꞌxix in tiltok. E jeꞌx tlakꞌbaꞌn José ke tcyꞌajal twitz tman; atzun te e tzaj tchleꞌn, el ttzꞌuban cywitz, 11 ex xi tmaꞌn te José cyjaꞌ:
—Mintiꞌtok ximan wuꞌne tuꞌn twile twitza; atzunte Dios o tzaj tkꞌoꞌn ambil weye tuꞌn twile cywitz ke tcꞌwaꞌla, chi Israel.
12 E jeꞌl tiꞌn José ke tcyꞌajal cywi tchꞌec tman, cub mocꞌeꞌ ex pon tacl tibaj twitz max twitz txꞌotxꞌ. 13 E tzajtzun tiꞌn ke cabe tcyꞌajal, ate Efraín tuj tbankꞌab, ex ate Manasés tuj tnayaj, ex e pon tlakꞌbaꞌn twitz tman. Cyjaꞌtzun cyaj ten Efraín tuj tnayaj Israel ex Manasés tuj tbankꞌab. 14 Tejtzun cyxi tnukpiꞌn Israel ke tkꞌab cyibaj, aj tkꞌoꞌn tbankꞌab tibaj twi Efraín aju tzꞌinbaj; atzun tnayaj tibaj twi Manasés, masque atok tzicbaj. 15 Cubtzun cyꞌiwlaꞌn José tuꞌn Jacob, ex chi cyjaꞌ:
Aju Dios o niman nchmane Abraham ex nmane Isaac te, aju Dios cwentin kine tuꞌn atxix tej wul itzꞌje ex cucx jaꞌlo,
16 aju anjel in chin clete tuꞌn tuj nimcu mya baꞌn, awt cyꞌiwlante cye cuꞌxun lu, ex cucxwit tzaj naꞌn nbiye cyiꞌj ke cuꞌxun lu, tucꞌix tbi Abraham aju nchmane, ex tbi Isaac aju nmane. Chmet-xwit nim cyiyjil twitz txꞌotxꞌ, chi Jacob.
17 Mya baꞌn ela tuj twitz José tuꞌnju cub tkꞌoꞌn tman tbankꞌab tibaj twi Efraín. Tuꞌntzun jlu tzaj ttzyuꞌn José tkꞌab tman, tuꞌn tel tiꞌn tibaj twi Efraín ex tuꞌn tcub tkꞌoꞌn tibaj twi Manasés, 18 ex xi tmaꞌn te tman cyjaꞌ:
—Miꞌn, tat. Micꞌx ttenju. Ate Manasés tzicbaj. Atzun kꞌonca tbankꞌaba tibaj twiꞌ, chi José.
19 Atzunte tman mintiꞌ o tcuya ex xi tmaꞌn te cyjaꞌ:
—Baꞌn wuꞌne, ncyꞌajal. Baꞌn wuꞌne. Ax icx te cuꞌxun lu cꞌoquel te jun cꞌloj xjal nim toclen. Atzunte tzꞌinbaj mas toclen ctel twitz tzicbaj, ex che oquel ke tiyjil te nimcu cꞌloj xjal, chi tman José.
20 Tujxtzun kꞌij lu e baj tcyꞌiwlaꞌn ke cabe cuꞌxun lu ex tma cyjaꞌ:
—Cꞌajbel cybiye cyuꞌn aj Israel te jun cyꞌiwbil, ex oc cymaꞌ: Awt Dios cyꞌiwlante cyeye ic tzaꞌn tbincha cyiꞌj aj Efraín ex aj Manasés, che chilo, chi Israel.