E jeꞌxtzun ex e pon tuj tnam Jericó tuj tja jun xuꞌj jawni twitz cyucꞌil xinak, Rahab tbi, ex atzun e posadyin te konicꞌan. 2 Pero at jun pon kꞌmal tkanil tucꞌil rey cye aj Jericó cyjaꞌ:

—Te kale jaꞌlo ma che ul cabe aj Israel queꞌyilte tnam.

3 Xitzun t-samaꞌn rey jun xjal kꞌmalte te Rahab:

—Kꞌiꞌmetza ke xinak ma che ul tucꞌila, akeju ateꞌcx tuj tjaya, porque queꞌyil txꞌotxꞌ ma che ul xjal lu, ex at nnicꞌ tiꞌj cycꞌuꞌj.

4 Atzunte xuꞌj otok cheꞌx tewan ke xinak ex xi tmaꞌn:

—Ax toc at cabe xinak ma che ul aj wucꞌile, pero mintiꞌ ma nbiye jatum tzajnike. 5 Tej xkoc yupj, biꞌx ẍe ex, porque atzun or in che lamet ke tpwertil tnam. Mintiꞌ baꞌn wuꞌne tzaꞌn ma cheꞌx, pero ka ma cheꞌx lpeꞌ naje cyiꞌj, jacu che pon cnet cyuꞌne, chi xuꞌj.

6 Ex otok che jax tewan xuꞌj ma twi tja, ex atzun ewan ke tjakꞌ junjun cheꞌl lino cyjaxsaꞌn tuꞌn cytzkij.

7 Cubtzun be cyuꞌn xjal, akeju e jeꞌx t-samaꞌn rey tuꞌn cypon cnet ke betin xjal cyuꞌn, ex atzun e jeꞌx tuj be in xiꞌ tlugaril nima Jordán, max tejxi cypon tuj xajbil aꞌ. Oꞌcx tej cyex ke xjal lu, e lamet naj ke tpwertil tnam. 8 Naꞌnxtok cytan xjal e pon queꞌyilte tnam, jax Rahab cyucꞌil twi ja ex xi tmaꞌn cye:

9 —Baꞌn wuꞌne, ate Kman ma txi kꞌonte txꞌotxꞌ lu cyeye, porque axte ma tzaj kꞌonte nim t-xobil kiꞌje tuꞌntzun ttzaj kxobile cywitze. Cycyakil xjal najl tuj txꞌotxꞌ lu nimxix in che xob cywitze. 10 Biꞌn kuꞌne, tej cyetze tuj Ejipt, tuꞌn Dios biꞌx tzkij mar Cyak Queꞌyin, tuꞌntzun cyicꞌtze tuj. Ax icx biꞌn kuꞌne, cyuꞌne e naj ke rey Sehón ex Og, akeju cyrey aj Amorrey najlketok jlajxi nima Jordán. 11 Tzaj nimxix kxobile tej kbinteye jlu, cyjaꞌtzun mi aꞌl jun jacu ten tipun tuꞌn tkꞌojin cyucꞌile, porque ate Kman aju Cydiose, atzun aju Dios at tuj cyaꞌj ax icx at tzalu twitz txꞌotxꞌ. 12 Cyjaꞌtzun in chin cubsane cywitze tuꞌn ttzaj cymaꞌne biꞌx jaꞌlo jun yol axix toc twitz Kman, tuꞌn cybinchanteye baꞌn cye keju ateꞌ tuj njaye, ic tzaꞌn weye ma nbinchaye baꞌn cyeye. Biꞌx cymaꞌn cyaje jun techal axix toc, 13 ka tuꞌn miꞌn cub cybyoꞌne nmane ex ntxuꞌye ex ke mastl wermaniye, cyucꞌix cycyakil xjal ateꞌ cyucꞌil. Ko cyclome tuꞌn miꞌn knaje, chi Rahab.

14 Atzun cye xi cytzakꞌweꞌn:

—Ka mi xbant kuꞌne aju ma tzaj tkanina keye, baꞌn tuꞌn kcyime tuꞌn Dios, pero miꞌn baj tmaꞌna jlu. Oc ttzaj tkꞌoꞌn Kman aju txꞌotxꞌ lu keye, ax toc oc kbinchaye baꞌn teya, che chi.

15 Tuꞌnju atzun najltok Rahab tuj jun ja binchamaj twi muro te tnam, cyjaꞌtzun akeju cabe xinak lu e ex ttzi ventan, ex tiꞌj sakbak e cuꞌx tuꞌn Rahab. 16 Ex xi tmaꞌn cye:

—Cyxiꞌye ewal cyibe cywiꞌ ke witz tuꞌntzun miꞌn cycnete cyuꞌn keju in che jyon cyiꞌje. Cyewanx cyibe ma chixin ox kꞌij ocxi cyajtz meltzꞌaj keju in che jyon cyiꞌje. Te tibajxi jlu baꞌn tuꞌn tcub be cyuꞌne.

17 Atzun cye xi cytzakꞌweꞌn:

—Cbantel kuꞌne aju ma txi ktziyane teya ex aju ma tzaj tkanina tuꞌn kbinchanteye teya. 18 Pero oc koctze tuj txꞌotxꞌ lu, bix cuꞌx tyobina ttzi ventan jatum ma ko cuꞌtz tkꞌoꞌna, aju cyꞌjaj lu cyak queꞌyin, ex chmon baja cycyakil termaniya tuj tjaya, tucꞌix tmana ex ttxuꞌya ex cycyakil keju at t-xilen tmana cyucꞌil. 19 Ka at jun cye ma tzꞌex tiꞌjxi tjaya, cymel tuꞌn tex tlaj ex mya koꞌye at kile. Katzun at jun keye ma tzꞌoc tzokpaj tiꞌj jun cyxol keju ateꞌ tuj tjaya, atzun koꞌye at kile tiꞌj tcamic. 20 Ex ka ma tzꞌel tkanil jlu tuꞌna, mlaytzun japun kuꞌne aju ma txi ktziyane teya, che chi.

21 —Baꞌn icju, cyjaꞌna ctelba kuꞌn, chi xuꞌj.

Bajtzun cykꞌolben cyib ex cub be cyuꞌn ke xinak. Te tibajxitzun oc tcꞌaloꞌn Rahab ttzi tventan tja aju cyꞌjaj cyak queꞌyin.

22 Akeju cabe xinak lu e jeꞌx ewal cyib cywi witz ox kꞌij, atzun cye xinak in che jyontok cyiꞌj tuj tcyakil part ex mintiꞌ e cnet cyuꞌn. Tej tbaj cygan tuꞌn cyjyon cyiꞌj, e ajtz meltzꞌaj tuꞌn cyul tuj tnam Jericó. 23 E cuꞌtztzun ke cabe xinak cywi witz, e icꞌx tuj nima Jordán, e ul jatum taꞌ Josué aju tcyꞌajal Nun, ex xi cytxꞌolbaꞌn tcyakilju otok baj cyiꞌj. 24 Ex xi cymaꞌn te Josué: Ma tzaj tkꞌoꞌn Kman tcyakil txꞌotxꞌ lu te ke, porque cycyakil xjal najlke tuj tnam lu in che xob wen tuꞌn klaj.