Tej cyicꞌx aj Israel tuj nima Jordán
3
Jaw weꞌ Josué primxix wen ex cub be tuꞌn cyucꞌix cycyakil aj Israel, tuꞌn cyicꞌ tuj lugar Sitim; e pon ttzi nima Jordán, ex atzun e cub ten naꞌnxtok cyicꞌx tuj nima. 2 Tbajlenxitzun ox kꞌij, akeju nejenel cye aj Israel e jeꞌx cyxol xjal, 3 ex xi cymaꞌn cye cyjaꞌ: Oc tcyile oc ticꞌ kꞌiꞌn cax cꞌubl tley Dios tjax twi cysemil ke pal aj Leví, cyetze jatum ateꞌye ex che lpeque tiꞌj. 4 Atzun cꞌelel cynicꞌe tiꞌj alcye be tuꞌn t-xi cyiꞌne, porque mi jun cyeye ojtzkiꞌn be lu tuꞌn. Pero miꞌn che oc lpeꞌye nikayin tiꞌj, najchakyin cheꞌx lpeꞌye tiꞌj, balo 40 ech cyxole tuꞌn tcyaj ten.5 Atzunte Josué xi tmaꞌn cye: Cybincham cytene twitz Dios, porque nchiꞌj che bant ke binchben maꞌxix cyxilen tuꞌn; cywitzxe che bantel. 6 Ax icx xi tmaꞌn cye pal: Cyiꞌnxe cax cꞌubl tley Dios ex che nejcuye cywitz xjal tuꞌn cyicꞌxe tuj nima.
E cubtzun nej ke pal tucꞌil cax. 7 Atzunte Kman tzaj tmaꞌn te Josué: Texju jaꞌlo cꞌoquel nkꞌoꞌne mastl toclena cywitzx cycyakil aj Israel, tuꞌntzun toc cyqueꞌyin ka atine tucꞌila ic tzaꞌn in tene tucꞌil Moisés. 8 Atzun teya, kꞌmanxa cye pal akeju ikalte cax cꞌubl nleye, oc cypon ttzi nima Jordán ax che cub weꞌ tuj nima.
9 Xitzun tmaꞌn Josué cye aj Israel: Cytzaje ex cybintze aju in tmaꞌn Kman Dios. 10 Atzun techal jlu tuꞌn tel cynicꞌe tiꞌj ka ate Dios itzꞌ at cyxole, ex cywitzxe che elex tlajoꞌn ke aj Canaán, ke aj Hetey, ke aj Hevey, ke aj Ferezey, ke aj Gergesey, ke aj Amorrey ex ke aj Jebusey. 11 Cyqueꞌyinxe, cꞌicꞌex nej cywitze tuj nima Jordán aju cax cꞌubl tley Dios aju Tajaw Tcyakil twitz txꞌotxꞌ. 12 Cyjaꞌtzun cyscꞌon jawe cablaj xinak, jun cyxol teyle junjun cꞌloj cyiyjil aj Israel. 13 Oc tcuꞌx cykꞌoꞌn cykan pal tuj nima, akeju ikalte cax cꞌubl tley Kman aju Tajaw Tcyakil twitz txꞌotxꞌ, biꞌx cbel tpaꞌn tib nima; aju aꞌ cyjaꞌ tcuꞌtz cwebel tbet ex junx cbel tchmon tib, chi Josué.
14 E etztzun ke aj Israel tuj cyja xbalun tuꞌn cyicꞌx tuj nima, ex nejni ke pal cywitz tucꞌil ju cax cꞌubl tley Dios kꞌiꞌn cyuꞌn. 15 Aju nima Jordán najchak in pon kojl tuj tyemp oc in jaw chmet twitz awal. Ex tej matok in che icꞌx nikayin ttzi nima, ex tej tacꞌ cykan pal tuꞌn aꞌ in bet nikayin ttzi aꞌ, 16 entons aju aꞌ cyjaꞌ tcuꞌtz o weꞌ tbet, ex junx cub tchmon tib max najchak tibaj tnam Adam aju tnam tcub nikayin ttxlaj tnam Saretán. Atzunju aꞌ cyjaꞌ tcuꞌx tuꞌn tpon ttzi mar at nim atzꞌan tuj tuj chkꞌajlaj Arabá cucx o bet max tej tcub naj. Cyjaꞌtzun tten cub tpaꞌn tib nima, ex atzun cye aj Israel e icꞌx jlajxi nima mer tlugaril tnam Jericó. 17 Atzun cye pal, akeju ikalte cax cꞌubl tley Dios, ax e cub weꞌ tmijil nima Jordán, mintiꞌ e yucch, ex tuj tzkij waꞌlkeꞌtok tejxi cyicꞌx baj cycyakil aj Israel tuj tzkij tuj nima Jordán.