4 E tzajtzun ttxcoꞌn Josué cablaj xinak, akeju otok che jaw t-scꞌoꞌn jun cyxol teyle junjun cꞌloj cyiyjil, 5 ex xi tmaꞌn cye: Cyicꞌxe max tuj tmij nima Jordán twitz cax cꞌubl tley Kman Dios, ex teyle junjun cyeye kꞌoꞌn jax jun abj twi t-semil, jun abj te junjun cꞌloj cyiyjil aj Israel. 6 Akeju abj lu che ajbel te jun yecꞌbil cyxole oc ttzaj cykanin ke cycꞌwaꞌle te tibajxi: ¿Ti cyxilen ke abj lu? Che chilo. 7 Atzun cyeye cxel cytzakꞌweꞌne: Tej ticꞌtz cax cꞌubl tley Kman tuj nima Jordán, aju nima cub tpaꞌn tib te cabe twitz cax. Atzun cyxilen ke abj lu, tuꞌn cucx tuꞌn ttzaj naꞌt cyuꞌn aj Israel aju o baj tzalu, che chicuye.

8 Atzun cye o cybincha ic tzaꞌn xi tmaꞌn Josué cye. Jatz cyiꞌn cablaj abj tuj nima Jordán, jun te teyle junjun cꞌloj cyiyjil aj Israel, xi cyiꞌn max jatum e cub ten, ex atzun cub cykꞌoꞌn, ic tzaꞌnx otok tma Kman te Josué. 9 Ax icx cub ttxolbaꞌn Josué cablajtl abj tuj tmij nima, tuj lugar jatum e cub weꞌ ke pal ikalte cax cꞌubl tley Dios, ex akeju abj lu ateꞌx jaꞌlo.

10 Ke pal ikalte cax ax e cub weꞌ tuj tmij nima Jordán, tejxi tbaj bant cyuꞌn aj Israel tcyakilju otok tma Kman te Josué. Tcyakil o bant ic tzaꞌnx otok tma Moisés te Josué. Jurat naj e icꞌtz ke xjal, 11 ex tej cyicꞌtz baj cycyakil jlajtzi, e icꞌtztzun ke pal tucꞌil cax cꞌubl tley Dios, ex e cub nej juntl maj cywitz cycyakil xjal. 12 Ax icx ke xinak cyxol ke tiyjil Rubén, akeju otok pon cyipun tuꞌn cyxiꞌ tuj kꞌoj, cyucꞌix ke xinak cyxol tiyjil Gad ex cyxol mijcu tiyjil Manasés e icꞌtz tuj nima. Cycyakil jlu e cub nej cywitz mastl aj Israel kꞌiꞌmele cymacbil te cykꞌojbil, ic tzaꞌnx otok tma Moisés cye. 13 Chꞌixmi japun 40,000 cyajlal xinak kꞌiꞌmele cymacbil te cykꞌojbil, ex banin cyten tuꞌn cykꞌojin, ex nejni ke twitz cax cꞌubl tley Kman, e jeꞌxtzun tuꞌn cypon tuj chkꞌajlaj ttxlaj tnam Jericó. 14 Tuj kꞌij lu o jaw nimsaꞌn Josué tuꞌn Kman cywitz cycyakil aj Israel, ex o che nimante te tuj tcyakil tankꞌibl ic tzaꞌn otok che nimante Moisés.

15 Ex tzajtzun tmaꞌn Kman te Josué: 16 Kꞌmanxa cye pal, akeju ikalte cax cꞌubl tley Dios, tuꞌn cyjatz tuj nima Jordán.

17 Xitzun tmaꞌn Josué cye tuꞌn cyjatz, 18 ex tej matok in che icꞌpun baj ke pal ttzi nima Jordán, ex matok nnicꞌ tnejel t-xol cykan tuj tzkij, o pon nima ic tzaꞌn ttenx ex tzyet tbet juntl maj ic tzaꞌn nej, najchak in pon kojl.

19 Tuj tlajin tajlal tnejel xjaw e icꞌtz ke aj Israel tuj nima Jordán, ex e cub ten tuj lugar Gilgal ttxlaj tnam Jericó tuj tjawitz kꞌij. 20 Atzun e cub tkꞌoꞌn Josué cablaj abj, akeju e jatz kꞌiꞌn tuj nima Jordán, 21 ex xi tmaꞌn cye aj Israel: Oc ttzaj cykanin cycꞌwaꞌle cyeye tuj tkꞌijlalil te tibajxi: ¿Ti cyxilen ke abj lu? ka che chi, 22 cymaꞌnxe cye tzaꞌn tten e icꞌtz ke aj Israel tuj tzkij tuj nima Jordán. 23 ex tzaꞌn tten aj tzkij nima Jordán tuꞌn Kman Dios, tuꞌntzun cyicꞌtze tuj, ic tzaꞌnx otok tbincha Kman ojtxi, tej tcub tpaꞌn tib mar Cyak Queꞌyin tuꞌntzun kicꞌtz tuj tzkij. 24 Tbincha Dios icju tuꞌntzun tel cynicꞌ cycyakil tnam twitz txꞌotxꞌ tiꞌj tipumal, ax icx cyeye tuꞌn cucx tuꞌn cynimane te Kman Dios, ex cucx tuꞌn cyxobe twitz.