E cub ten aj Israel tuj Gilgal
5
Cycyakil ke rey cye aj Amorrey, akeju najlke ttxlaj nima Jordán tuj telex kꞌij, ex ke rey cye aj Canaán, akeju ateꞌ nikayin ttzi Nintz mar, tej cybinte tzaꞌn tten otok tzꞌaj tzkij nima Jordán tuꞌn Kman tej matok in che icꞌx ke aj Israel tuj, biꞌx tzaj baj cycꞌuꞌj ex mintiꞌ cynimarin cyib tuꞌn cyoc tzokpaj kꞌojlel cyiꞌj aj Israel.2 Tujtzun tkꞌijlalil lu xi tmaꞌn Kman te Josué cyjaꞌ: Binchan baja junjun cchil abj ke, ex sircunsidarin baja juntl maj ke aj Israel.
3 E banttzun ke cchil tuꞌn Josué ex e baj t-sircunsidarin ke xinak aj Israel twi witz Aralot. 4 E baj t-sircunsidarin cycyakil xinak, porque akeju matok kꞌiꞌn cyipun tej cyetz tuj Ejipt otok che baj cyim tuj be tuj lugar tzkij txꞌotxꞌ. 5 Akeju e jeꞌtz tuj Ejipt, cycyakil otok che baj sircunsidarit, pero akeju e itzꞌj tuj be te tibajxi tuj lugar tzkij txꞌotxꞌ, naꞌnxtok cybaj sircunsidarin. 6 Tuꞌnju e bet aj Israel 40 abkꞌi tuj tzkij txꞌotxꞌ, cyjaꞌtzun cycyakil xinak kꞌiꞌn cyipun tej cyetz tuj Ejipt otok che baj cyim, tuꞌnju mintiꞌ xi cyniman tyol Kman. Cyjaꞌtzun xi tmaꞌn Kman jun yol axix toc, tuꞌn miꞌn cyocx ke xjal lu tuj txꞌotxꞌ aju otok tzaj ttziyan cye cyxeꞌchel tuꞌn ttzaj tkꞌoꞌn cye aj Israel, aju txꞌotxꞌ lu kꞌinun txꞌotxꞌxix ex tbanilxix. 7 Cyjaꞌtzun e baj t-sircunsidarin Josué cycyꞌajal ke xinak e cyim tuj tzkij txꞌotxꞌ, akeju otok che oc tkꞌoꞌn Kman te cyxel cyman, porque naꞌnxtok cysircunsidarit te tjakꞌxi tuꞌnju ateꞌtok tuj cybe. 8 Tejtzun cybaj sircunsidarit cycyakil, e cyaj ten tuj campament tejxi cybanix. 9 Xitzun tmaꞌn Kman te Josué cyjaꞌ: Tuꞌnju sircunsisyón lu ma tzꞌel wiꞌne cychꞌixwiye, aju otok tzaj cyuꞌn ke aj Ejipt, chi Dios. Cyjaꞌtzun, ax tbi lugar toc jaꞌlo, Gilgal.
10 Atzun e cub ten aj Israel tuj lugar Gilgal, ex tuj cyajlaj tajlal xjaw te kale, cub cyicꞌsaꞌn Xjan Kꞌij tuj chkꞌajlaj tcub ttxlaj Jericó. 11 Tuj juntl kꞌij e waꞌn pan mintiꞌ t-samel tuj, e waꞌn triw txꞌilsamaj ex e waꞌn tiꞌj twitz awal in tzaj tkꞌoꞌn txꞌotxꞌ Canaán, 12 ex tujtzun juntl kꞌij ya mintiꞌtl tzaj tkꞌoꞌn Dios maná. Cyjaꞌtzun, tuj abkꞌi lu e waꞌn ke aj Israel tiꞌj twitz cyawal xjal aj Canaán.
Tej toc tcꞌulban tib Josué tucꞌil nejenel cye t-soldad Kman
13 At jun kꞌij tej attok Josué nikayin ttxlaj tnam Jericó o til lu jun xinak waꞌl tcub twitz, tucꞌix jun spad kꞌiꞌn tuꞌn. Xi lakꞌeꞌ Josué ex xi tkanin te:
—¿Apeya kucꞌile ex ka aj kꞌoja kiꞌje?
Xi ttzakꞌweꞌn xinak:
14 —Mya tucꞌil jun cꞌloj ex mya tucꞌil juntl cꞌloj. Ma chin ule tzalu, akine nejenel cye t-soldad Kman Dios, chi xinak.
Cubtzun ẍmejeꞌ Josué tejxi tpon tacl tibaj twitz twitz txꞌotxꞌ, ex xi tkanin te:
—Tat, ¿ti ctzajel tmaꞌna weye, akine tmajena?
15 Atzunte nejenel cye t-soldad Kman tzaj ttzakꞌweꞌn:
—Kꞌimel t-xajbiya porque aju lugar jatum tcuba, xjante.
Atzunte Josué xi tniman.