Aju tumel tzaꞌn tten tuꞌn tcub tiꞌj tnam Jericó
6
Otok che lamet ke tpwertil tnam Jericó tuꞌn cyclet xjal tuj cykꞌab aj Israel; mi jun xjal jacu bant tuꞌn tocx ex mi tuꞌn tetz tuj tnam. 2 Atzunte Kman tzaj tmaꞌn te Josué: Ma cheꞌx nkꞌoꞌne ke xjal aj Jericó tuj cykꞌabe, tucꞌix cyrey ex ke cysoldad, tuꞌn tcub cyiꞌj cyuꞌne. 3 Baꞌn tuꞌn cykꞌon soldad jun welt tiꞌjele tnam jun maj tuj jun kꞌij ocxi tjapun kak kꞌij. 4 Wuk pal che bel nej twitz cax cꞌubl nleye, ex teylex te junjun cxel tiꞌn jun tcach ẍneꞌl te chun. Tujtzun twukin kꞌij, wuk maj che kꞌole welt tiꞌj tnam, acux in che kꞌajtzan ke pal tiꞌj tcach ẍneꞌl. 5 Octzun cybinteye tkꞌajkꞌajel twi chun mas nim tuj, bix che jawil schꞌiꞌn cycyakil tnam xjal tuꞌn tcyakil cyipun, ex aju muro te tnam cbel xitj. Teylextzun te junjun xinak jikun tzꞌocx tuj tnam, chi Kman.6 E tzajtzun ttxcoꞌn Josué ke pal ex xi tmaꞌn cye cyjaꞌ: Cyiꞌnxe cax cꞌubl tley Kman, ex wuk pal cbel nej twitz cax cyucꞌix ke chun tcach ẍneꞌl kꞌiꞌn cyuꞌne. 7 Ax icx xi tmaꞌn Josué cye xjal: Cyxiꞌye ex che kꞌone welt tiꞌjele tnam, atzun ke xinak banin cyten tuꞌn cykꞌojin, e cycub nej twitz cax cꞌubl tley Kman, chi Josué.
8 Tcyakil o bant cyuꞌn ic tzaꞌn o tma Josué. Wuk pal e cub nej twitz cax cꞌubl tley Kman, nnoꞌctok wuk chun cyuꞌn ex lepchix t-xiꞌ cax cyiꞌj. 9 Ke xinak banin cyten tuꞌn cykꞌojin, nejni ke cywitz ke pal, atzun ke mastl xjal lepchix cyxiꞌ tiꞌj, acux in kꞌajt chun cyuw wen cyuꞌn pal.
10 Ex xi tmaꞌn Josué cye cycyakil xjal cyjaꞌ: Miꞌn che jaw schꞌine, miꞌn che kꞌajte ex miꞌn cye yoline. Maxi che jawil schꞌine ocxi t-xi nmaꞌne cyeye.
Tej tcub tiꞌj tnam Jericó
11 Xi tmaꞌn Josué tuꞌn ticꞌ kꞌiꞌn jun welt cax cꞌubl tley Kman tiꞌjele tnam. Te tibajxi jlu e aj tuj campament, ex axtzun jaꞌwil akꞌbil cye. 12 Te prim tuj juntl kꞌij jaw weꞌ Josué, ex atzun cye pal xi cyiꞌn cax cꞌubl tley Kman. 13 Wuk pal nejni twitz cax cꞌubl tley Kman mintiꞌ e kꞌajen tuꞌn cybet, ex mintiꞌ kꞌajen tuꞌn cykꞌajt tcach ẍneꞌl cyuꞌn. Ke xinak banin cyten tuꞌn cykꞌojin, nejni ke cywitz, atzun juntl cꞌloj e tzaj bet ma tiꞌjxi cax, acux in che kꞌajt ke chun wen cyuꞌn ke pal. 14 Tuj juntl kꞌij e icꞌ bet juntl welt tiꞌjele tnam ex e ajtl tuj campament. Ex iclex o bant cyuꞌn tuj kak kꞌij.
15 Tujtzun twukin kꞌij e jaw weꞌ primxix wen tuꞌn cyicꞌ bet tiꞌjele tnam, ic tzaꞌn otok bant cyuꞌn nej, pero tuj kꞌij lu, wuk maj e kꞌon welt tiꞌjele tnam. 16 Tejtzun toc cykꞌajtzaꞌn pal chun twukin maj, xi tmaꞌn Josué cye xjal: Cyjaw schꞌine cyuw wen, porque ma tzaj tkꞌoꞌn Kman tnam lu cyeye tuꞌn tcub tiꞌj cyuꞌne. 17 Te jumajx cnajel tnam lu, tucꞌix tcyakilju at tuj, ic tzaꞌn jun chojbil te Kman. Oꞌcxte xuꞌj Rahab, aju jawni twitz cyucꞌil xinak, miꞌn naj cyucꞌix cycyakil keju ateꞌ tuj tja, porque e cub tewan ke xjal e tzaj ksamaꞌn queꞌyilte tnam lu. 18 Atzun cyeye, miꞌn tzꞌoc cymacoꞌne jun tiꞌxti at tuj tnam lu, ex miꞌn txi cyiꞌne, porque tcyakil il tiꞌj tuꞌn tnaj te jumajx ic tzaꞌn jun chojbil te Kman; katzun ma txi cyiꞌne, jaculo tzaj castiw cyibaj enter tnam xjal aj Israel ex jacu tzaj mya baꞌn cyibaje. 19 Tcyakil kꞌan pwak ex sak pwak, tcyakil tiꞌxti kꞌan cꞌuxbil ttxꞌotxꞌil ex mastl cꞌuxbil, cxel kꞌot te Kman ex cxel cꞌuꞌt cyxol ke tkꞌinumabl, chi Josué cye xjal.
20 E jawtzun schꞌin xjal cyucꞌix ke chun in che kꞌajt cyuꞌn pal. Tej cybinte aj Israel tkꞌajkꞌajel cywi chun, e oc ten schꞌil ex jaw tkꞌajkꞌajel cywiꞌ cyuwxix wen, atzunju muro te tnam cub tilj. Teylex te junjun xinak, jikun ocx tuj tnam ex cub tiꞌj cyuꞌn. 21 E cubtzun byoꞌn tuꞌn spad ke xinak aj Jericó, cyucꞌix ke xuꞌj, ke cuꞌxun, cyucꞌix ke tij xjal, ax icx ke wacẍ, ke ẍneꞌl ex ke bur. Cycyakil e naj cyuꞌn te jumajx, te jun chojbil te Kman.
22 Xitzun tmaꞌn Josué cye ke cabe xinak akeju otok che ul aj queꞌyilte tnam: Cyxiꞌye tja xuꞌj jawni twitz cyucꞌil xinak, ex cyiꞌmetze ma chixin, cyucꞌix cycyakil keju ateꞌ tucꞌil, ic tzaꞌn xi cytziyane te, chi Josué. 23 E ocxtzun ex etz cyiꞌn aju xuꞌj Rahab, tucꞌix tman ex ttxuꞌ, cyucꞌix ke terman ex cycyakil keju at cyxilen cyucꞌil, ex e jeꞌx cyiꞌn tuꞌn cyten tuj jun lugar segur ttxlaj cycampament aj Israel. 24 Octzun cykꞌoꞌn aj Israel tkꞌakꞌal tnam tucꞌix tcyakilju at tuj. Oꞌcxcu sak pwak, kꞌan pwak, ex junjun tiꞌxti kꞌan cꞌuxbil cytxꞌotxꞌil ex mastl tiꞌxti cꞌuxbil ttxꞌotxꞌil, etz cyiꞌn ex xi cycꞌuꞌn tuj cꞌubl kꞌinumabl tuj tja Kman. 25 Atzunte xuꞌj Rahab aju jawni twitz cyucꞌil xinak, cyucꞌix keju ateꞌ tuj tja, e cyaj tcloꞌn Josué tuꞌn cyankꞌin tuꞌnju e cub tewan ke xjal e pon t-samaꞌn Josué queꞌyilte tnam Jericó. Atxixtzun tcyaj ankꞌin Rahab cyxol aj Israel, ex lu atx jaꞌlo.
26 Xitzun tcyuwsaꞌn Josué jun yol cyjaꞌ: Tzajxwit tcastiw xjal tuꞌn Kman, alcyeju ma tzꞌoc ten akꞌnal tuꞌn tjaw binchet juntl maj tnam Jericó. Oc tcub keꞌ simyent tuꞌn, biꞌxwit cyim nej tcyꞌajal, ex oc cyoc tkꞌoꞌn ke tlamel tnam, biꞌxwit cyim mancbil tcyꞌajal, chi Josué.
27 O tzꞌonin Kman tiꞌj Josué, ex aju tkanil tiꞌj pon baj tuj tcyakil lugar.