2 Xi t-samaꞌn Josué junjun xinak tuj tnam Jericó tuꞌn cypon tuj tnam Hai, aju tcub tuj tjawitz kꞌij te Betel, nikayin ttxlaj tnam Bet-avén, tuꞌn tbaj cyqueꞌyin lugar. E jeꞌxtzun ke xinak ex baj cyqueꞌyin tnam Hai, 3 ex tej cyul meltzꞌaj xi cymaꞌn te Josué: Mya il tiꞌj tuꞌn cyxiꞌ cycyakil xjal tuꞌn cyoc tzokpaj tiꞌj tnam Hai, cabal ka ma txiꞌ cab ex ka ox mil xinak tuꞌn ttzyet tnam lu. Miꞌn txi t-samaꞌna cycyakil tnam xjal porque nicꞌxi cybaj xjal ateꞌ tuj tnam lu, che chi.

4 Cyjaꞌtzun, balo ox mil xinak aj Israel xiꞌ tuꞌn cyoc tzokpaj tiꞌj tnam Hai, pero ake cub cyiꞌj cyuꞌn ke xjal te tnam Hai ex e bjel ok ke cyuꞌn; 5 cub cybyoꞌn balo 36 aj Israel ex e oc lpeꞌtl cyiꞌj mastl, tzyet-x max ttzi tpwertil tnam tejxi cypon max tuj lugar Sebarim tbi, ex tuj be in cuꞌtz cubl atzun cub cyiꞌj cyuꞌn. Tuꞌntzun jlu tzaj baj cycꞌuꞌj aj Israel ex el cyipun.

6 Atzunte Josué cyucꞌix ke cytijil xjal aj Israel, el cysbitꞌun cyxbalun cyiꞌj ex jax cykꞌoꞌn kuk tuj cywiꞌ te jun techal cybis, ex e cubtzun ẍmejeꞌ twitz cax cꞌubl tley Dios tejxi tpon tacl tibaj cywitz twitz txꞌotxꞌ, ex cucx cyten icju tejxi toc kax. 7 Atzunte Josué xi tmaꞌn cyjaꞌ:

—Nman Dios, ¿tikuꞌn tzaj tmaꞌna tuꞌn cyicꞌtz tnam xjal tuj nima Jordán? Nokpetzun kꞌol kibe tuj cykꞌab aj Amorrey ma ko icꞌtze tuꞌn knaje cyuꞌn. Maslo baꞌn nokwit ax xko cyaj tene jlajxi nima Jordán. 8 Nman Dios, ¿ti cbantel wuꞌne jaꞌlo tuꞌnju ma che el ok aj Israel cywitz aj kꞌoj cyiꞌj? 9 Oc cybinte ke xjal aj Canaán jlu, ex oc cybinte cycyakil keju najl tuj lugar lu aju ma baj cyiꞌj aj Israel, che oquel tzokpaj cycyakil kiꞌje, milo jun keye cyjel ankꞌin ex mlaylo ko tzaj naꞌntle. ¿Titzun cbantel tuꞌna tiꞌj tbiya maꞌxix t-xilen? Chi Josué.

10 Tzajtzun tmaꞌn Kman te Josué:

—Weꞌctza, ¿ti nbaj teya nok mutzl tcuba twitz txꞌotxꞌ? 11 Ma che binchan aj Israel il, ex mintiꞌ ma japun cyuꞌn aju yol cyaj bant tiꞌj wuꞌne cyucꞌil. Ma tzaj cyiꞌn junjun tiꞌxti attok tuꞌn cynaj te jumajx, ma tzaj cyelkꞌaꞌn, ma che nicꞌan yol ex ma tzꞌocx cyewan cyxol ke tiꞌxti at cye. 12 Tuꞌntzun jlu mlay che cub weꞌ aj Israel cywitz aj kꞌoj cyiꞌj, nok in che el ok cywitz aj kꞌoj, ex jaꞌlotzun ax ke aj Israel baꞌn tuꞌn cynaj. Ka miꞌn ma naj cyuꞌne aju xi nmaꞌne cyeye tuꞌn biꞌx tnaj, mlay chin tentle cyucꞌile. 13 Weꞌctza ex kꞌmanxa cye tnam xjal tuꞌn tel cypaꞌn cyib tiꞌj tcyakil mya baꞌn. Kꞌmanxa cye tuꞌn tbant cyten tuꞌn cyul yecꞌul cyib nwitze nchiꞌj, porque akine Cyman ex Cydios aj Israel in chin kꞌmante jlu cye: Akeye aj Israel ma tzaj cyiꞌne aju attok tuꞌn tnaj te jumajx, ex ka miꞌn ma naj cyuꞌne, ex ka miꞌn ma tzꞌex cyiꞌne cyxole, mlay che weꞌye cywitz aj kꞌoj cyiꞌje. 14 Bix che ule nchiꞌj yecꞌul cyibe cycyakile tuj cꞌlojin cytene ic tzaꞌnx cyiyjile, ex aju cꞌloj cyiyjile cꞌoquel nchꞌicune, teyletzun te junjun cpol tyecꞌun keju at cyxilen cyucꞌil, ex aju cꞌoquel nchꞌicune, teyletzun te junjun cpol tyecꞌun ke xinak ateꞌ tuj tja. 15 Ex atzunju kꞌilte te aju attok tuꞌn tnaj, cbel patit cyucꞌix ke tcꞌwaꞌl ex tucꞌix tcyakilju at te, tuꞌnju ma tbincha jun mya baꞌn cyiꞌj aj Israel, ex mintiꞌ ma japun tuꞌn aju yol cyaj bant tiꞌj wuꞌne cyucꞌil, chi Dios.

16 Tuj juntl kꞌij primxix jaw weꞌ Josué, ex xi tmaꞌn tuꞌn cypon ke xjal yecꞌul cyib tuj cꞌlojin ic tzaꞌnx cyiyjil. Atzunte Kman oc tchꞌicun ju cꞌloj tiyjil Judá. 17 Xitzun tmaꞌn Josué tuꞌn cypon teyle junjun cꞌloj tiyjil Judá, ex atzunju cꞌloj tiyjil Zera oc chꞌicun. Cyxoltzun ke cꞌloj tiyjil Zera oc chꞌicun Zabdi cyucꞌix keju at t-xilen tucꞌil. 18 Tejtzun cypon lakꞌeꞌ teyle junjun xinak at cyxilen tucꞌil Zabdi, oc chꞌicun Acán aju tcyꞌajal Carmi, tal tchman Zabdi, ttxca tchman Zera ex tiyjil Judá te.

19 Xitzun tmaꞌn Josué te Acán:

—Aya ncyꞌajal, nimsaꞌnctza tbi Kman aju Cydios aj Israel ex kꞌonxa nimbil te. Kꞌmantza weye aju ma tbinchaya. Miꞌn cub tewana nwitze.

20 Atzunte Acán xi ttzakꞌweꞌn:

—Ax toc cxel nmaꞌne ma chin binchane il twitz Kman aju Cydios aj Israel, ex atzun jlu ma nbinchaye: 21 Cyxol ke tiꞌxti e etz kiꞌne tuj tnam Jericó, o wile jun tbanil xbalun tzajni tuj Babilonia, tucꞌix cab syent sak pwak ex jun piẍ kꞌan pwak mas te jun libr talil. Tzaj nganiye cyiꞌj ke jlu, ex e cyaj wiꞌne, o che cuꞌx nmakuꞌne jatum tcubsaꞌn njaye, xbalun ja, ex aju pwak o cuꞌx nkꞌoꞌne max t-xeꞌpun, chi Acán.

22 Xitzun t-samaꞌn Josué junjun xinak queꞌyilte tuj tja Acán, ex o cnet cyuꞌn tcyakil aju ewantok ma chixin, tucꞌix sak pwak tcuꞌx max t-xeꞌpun. 23 Tzajtzun cyiꞌn ex pon cyiꞌn twitz Josué ex cywitz aj Israel, ex cubtzun cykꞌoꞌn twitz Kman. 24 Xitzun kꞌiꞌn Acán tuj chkꞌajlaj Acor tbi, junx tucꞌil sak pwak ex xbalun, tucꞌix jun piẍ kꞌan pwak, cyucꞌix ke tcyꞌajal ex ke tmeꞌjel, cyucꞌix ke twacẍ, ke tbur, ke t-ẍneꞌl ex ju tja, xbalun ja, tucꞌix tcyakilju at te.

25 Xitzun tmaꞌn Josué te:

—¿Tikuꞌn ma tzaj tiꞌna mya baꞌn kibaje? Jaꞌlotzun, tuꞌnx Kman cbel tzꞌak mya baꞌn tibaja, aju ma tzaj tiꞌna kibaje.

Tej t-xi tmaꞌn Josué icju, cycyakiltzun aj Israel e cub byonte te Acán tuꞌn abj, cyucꞌix ke tcꞌwaꞌl ex tcyakilju at te, ex cub cypatun. 26 Cyjaꞌtzun o chewix tkꞌoj Kman cyiꞌj aj Israel. Te tibajxi cub cykꞌoꞌn jun byuj abj cyibaj Acán, ex cucx ateꞌ ke abj jaꞌlo, ex tuꞌntzun jlu ax tbi lugar lu tocsaꞌn jaꞌlo, chkꞌajlaj te Acor.