3 Banttzun tten Josué cyucꞌil cycyakil ke t-soldad tuꞌn cyxiꞌ kꞌojlel tiꞌj tnam Hai. Jaw t-scꞌoꞌn 30,000 xinak cyuw cycꞌuꞌj tuj kꞌoj, ex konicꞌan e jeꞌx t-samaꞌn, 4 ex xi tmaꞌn cye: Chin cybintze, cyjaꞌ cyxiꞌye tiꞌjxi tnam ex cyewanx cyibe nikayin ttxlaj; list che tene tuꞌntzun cyoc tzokpaje tiꞌj. 5 Atzun weye cyucꞌix mastl xjal ko xel lakꞌeꞌye tiꞌj tnam, ex octzun cyetz xjal te tnam lu tuꞌn cyoc tzokpaj kiꞌje, ko eleltzun oke cywitz ic tzaꞌn baj jun maj. 6 Atzun cye che oquel lpeꞌ kiꞌje oc kel oke tiꞌj tnam, porque oclo cyma: Ma che el ok juntl maj kwitz, che chilo. 7 Atzun cyeye bix che etz naje jatum cyewan cyibe ex cbel tiꞌj tnam cyuꞌne, porque ate Kman Dios ctzajel kꞌonte cye tuj cykꞌabe. 8 Ex oc ttzyet tnam cyuꞌne, bix tzꞌoc cykꞌoꞌne tkꞌakꞌal ic tzaꞌnx ma tma Kman. Atzun orden lu ma txi nkꞌoꞌne cyeye, chi Josué.

9 Xi tkꞌoꞌn Josué orden tuꞌn tcub be cyuꞌn; e jeꞌxtzun ex xi cyewan cyib cyxol tnam Betel tucꞌil Hai, tumlal telex kꞌij te tnam Hai; atzunte Josué ax ex akꞌbil te cyxol tnam xjal. 10 Tuj juntl kꞌij, primxix jaw weꞌ Josué ex icꞌ twitz cyiꞌj ke t-soldad, cubtzun nej cywitz junx cyucꞌil ke cytijil xjal aj Israel, ex e jeꞌxtzun tuꞌn cyoc tzokpaj tiꞌj tnam Hai. 11 Cycyakil ke xinak ucꞌin tuꞌn e pon lakꞌeꞌ twitz tnam, atzun e cub ten tumlal tbankꞌab kꞌij te tnam, ex cyaj ten chkꞌajlaj cyxol tucꞌil tnam. 12 Otok txi tewan Josué jweꞌ mil xinak t-xol tnam Betel tucꞌil tnam Hai, tumlal telex kꞌij te tnam, 13 cyjaꞌtzun, te cabe cꞌloj e ela ke soldad, jun cꞌloj xi cyewan cyib tumlal telex kꞌij te tnam, ex juntl cꞌloj e cyaj ten cyucꞌil tnam xjal tumlal tbankꞌab kꞌij te tnam. Atzunte Josué xi lakꞌeꞌ max tuj tmij chkꞌajlaj tuj konicꞌan lu.

14 Tejtzun ttil rey te tnam Hai jlu, jurattzun etz naj junx cyucꞌil cycyakil ke t-soldad, tuꞌn cykꞌojin cyiꞌj aj Israel tuj lugar max tibaj chkꞌajlaj ttzi nima Jordán, ex mintiꞌtok baꞌn cyuꞌn ka ateꞌtok txkantl aj Israel cyewan cyib tiꞌjxi tnam. 15 Atzunte Josué cyucꞌix ke xinak ateꞌ tucꞌil, o cybincha mer ic tzaꞌn otok che el ok cywitz aj Hai, cyjaꞌ e jeꞌx ok tuj be in xiꞌ tuj tzkij txꞌotxꞌ, ex nok tten cyuꞌn. 16 Atzun cye soldad ateꞌ tuj tnam Hai, o cycꞌam orden tuꞌn cyoc lpeꞌ cyiꞌj aj Israel, ex tejtzun cyxi lpeꞌ tiꞌj Josué o cyaj ten tnam oꞌcx te, mintiꞌ soldad tuj. 17 Misicyer jun xinak aj Hai ex aj Betel miwt etz tuꞌn toc lpeꞌ cyiꞌj aj Israel, ex tuꞌnju cyxilen lpeꞌ cyiꞌj aj Israel, cyaj cateꞌ tpwertil tnam cyuꞌn. 18 Tzajtzun tmaꞌn Kman te Josué: Aju tlansa tzyuꞌn tuꞌn tkꞌaba chux yecꞌunxa tumlal tnam Hai, porque cxel nkꞌoꞌne tuj tkꞌaba.

Xitzun tyecꞌun Josué tlans aju tzyuꞌn tuꞌn tkꞌab, tumlal tnam Hai, tuꞌntzun ttzyet kꞌoj. 19 Jurattzun e etz keju cyewantok cyib, e jeꞌx kelan jatum taꞌ tnam, cub tiꞌj cyuꞌn ex oc cykꞌoꞌn tkꞌakꞌal.

20 Tejtzun tajtz cyqueꞌyin ke xinak aj Hai cyiꞌjxi, o cyil in jawtok sib tuj cytanmi. Ex ya mintiꞌtl jatum tuꞌn cycolpaj, mi tuj jun pacꞌ ex mi tuj juntl pacꞌ, porque ke aj Israel, akeju otok che jeꞌx ok tuj tzkij txꞌotxꞌ, e ajtz meltzꞌaj tuꞌn cyoc tzokpaj cyiꞌj. 21 Tejtzun ttil Josué ex cycyakil aj Israel otok cub tiꞌj tnam cyuꞌn keju cyewantok cyib ex otok tzꞌoc cykꞌoꞌn tkꞌakꞌal, e ajtztzun meltzꞌaj ex e oc tzokpaj cyiꞌj aj Hai. 22 Ex atzun keju otok tzyet tnam cyuꞌn, e etz tuj tnam tuꞌn cyoc tzokpaj cyiꞌj aj Hai; cyjaꞌtzun, ke xjal aj Hai e cyaj ten cyxol cycabil cꞌloj aj Israel. E octzun tzokpaj ke aj Israel cyiꞌj aj Hai tejxi cycub baj cybyoꞌn cycyakil. 23 Nok oꞌcx aju rey te tnam Hai cyaj ankꞌin cyuꞌn, tzaj cytzyuꞌn ex xi cyiꞌn twitz Josué.

24 Tbajlenxitzun cybyoꞌn aj Israel cycyakil xjal aj Hai, akeju e jeꞌx lpeꞌ cyiꞌj tuj cojbil ex tuj tzkij txꞌotxꞌ e ajtzun meltzꞌaj juntl maj tuj tnam Hai, ex cub cybyoꞌn cycyakil keju ateꞌx tuj tnam. 25 Tuj kꞌij lu e cyim cablaj mil xjal aj Hai, xinak ex xuꞌj, 26 porque cucxtok t-xi tyecꞌun Josué tlans cyiꞌj aj Hai, tuꞌn cyoc tzokpaj aj Israel cyiꞌj ocxi cycub baj cycyakil cyuꞌn. 27 Atzun ke alumaj oc te cye aj Israel, tucꞌix tcyakil tiꞌxti at tuj tnam, ic tzaꞌnx otok tzaj tmaꞌn Kman te Josué. 28 Cub tpatun Josué tnam Hai ex nok ttxꞌakan cyaj tkꞌoꞌn, tuꞌn cucx tcyaj ten te jumajx icju, ex ttenx jaꞌlo. 29 Atzunte rey te tnam Hai jaw yoban tuꞌn Josué tiꞌj jun tzeꞌ tuꞌn tten enter jun kꞌij; ex tejtzun tex kꞌij, xi tmaꞌn Josué tuꞌn tcuꞌtz kꞌiꞌn t-ximlal rey twi tzeꞌ, tuꞌn tcub kꞌoꞌn ttzi tpwertil tnam, ex tuꞌn ticꞌx buybaꞌn abj tibaj. Ex aju byuj abj lu cucx atx jaꞌlo.

30 Twi witz Ebal jaw tbinchaꞌn Josué jun altar te Kman Dios, 31 ic tzaꞌnx otok txi tmaꞌn Moisés aju tmajen Kman cye aj Israel, jaw tbinchaꞌn altar cyuꞌn abj mya xpeꞌlin cyiꞌj, ic tzaꞌnx tzꞌibamaj tuj tley Moisés. Xitzun cykꞌoꞌn aj Israel ke oyaj patun in che cub tibaj altar, ex xi cykꞌoꞌn ke chojbil te mojbabl tibil. 32 Cyiꞌjx ke abj te altar, ex cywitzx aj Israel, oc ttzꞌiban Josué aju tley Moisés otok cyaj tkꞌoꞌn cye. 33 Cycyakiltzun tnam xjal, tzaꞌnx ke aj Israel, ax icx ke stranjer xjal, ex cycyakil cytijil xjal cyucꞌix keju at cyoclen ex ke jwes, e cub ten ke te tcabil pacꞌ ttxlaj cax cꞌubl tley Dios, cywitz ke pal aj Leví akeju kꞌilte cax, tuꞌntzun cycub cyꞌiwlaꞌn tnam xjal aj Israel cyuꞌn ke pal; mij xjal e oc ten tiꞌj tcꞌuꞌj tal witz Gerizim, atzun mijtl e oc ten tiꞌj tcꞌuꞌj tal witz Ebal, ic tzaꞌnx otok tma Moisés aju tmajen Kman.

34 Te tibajxi jaw t-schꞌiꞌn Josué teyle junjun yol tzꞌiban tuj libro te ley, tzaꞌnx ke yol in che yolin cyiꞌj cyꞌiwbil, ax icx ke yol in che yolin cyiꞌj mya baꞌn tuꞌn ttzaj. 35 Mintiꞌ jun yol aju cyaj tmaꞌn Moisés miwt jaw t-schꞌiꞌn Josué cywitz cycyakil tnam xjal aj Israel, ex ajun ke xuꞌj e ten, cyucꞌix ke cꞌwaꞌl ex ke stranjer xjal ax najl cyxol.