Aju yol cyaj bant tiꞌj cyuꞌn aj Israel cyucꞌil aj Gabaón
9
Ake rey cye aj Hetey, cye aj Amorrey, cye aj Canaán, cye aj Ferezey, cye aj Hevey ex cye aj Jebusey o cybi aju otok baj. (Akeju rey lu, atzun najlke tumlal telex kꞌij te nima Jordán, cywiꞌ ke witz, tuj chkꞌajlaj, tuj tcyakil mlaj txꞌotxꞌ te Nintz mar ex max ponin baj cytxꞌotxꞌ t-xe witz Líbano.) 2 O mojeꞌ cyyol cycyakil tuꞌn cyxiꞌ kꞌojlel tiꞌj Josué ex cyiꞌj aj Israel. 3 Atzun cye aj Hevey akeju najlke tuj tnam Gabaón, tej cybinte aju otok tbincha Josué tiꞌj tnam Jericó ex tiꞌj tnam Hai, 4 cub cyximan tuꞌn cyoc ten sbul tiꞌj Josué. Tzyettzun be cyuꞌn; oc cykꞌoꞌn ttxꞌakan sac cyiꞌj ke cybur ex ke tzꞌuꞌm tcubil taꞌl twitz uva ttxꞌakan ke ex xbukamaj ke; 5 ax icx oc cykꞌoꞌn cyxbalun ex cyxajab ttxꞌakan wen ex xbukamaj ke, ex aju cywa xi cyiꞌn tuj cybe txꞌiꞌl wen ex otok jlet lan cyiꞌj. 6 Tejtzun cypon tuj cycampament xjal tuj lugar Gilgal, xi cymaꞌn te Josué ex cye aj Israel:—Tzajni koꞌye tuj jun txꞌotxꞌ najchak. Cybinchame tiꞌj jun cyyole kucꞌile.
7 Xitzun cytzakꞌweꞌn ke aj Israel cye aj Hevey:
—Yajtzun ka ax najl keye nikayin kiꞌje, ¿tzaꞌntzun tten tuꞌn tbant tiꞌj jun yol kuꞌne cyucꞌile?
8 Atzun cye tzaj cymaꞌn te Josué:
—Jacu ko oque te tmajena.
Ex xi tkanin Josué cye:
—¿Alcyetzun keye ex jatum tzajni keye?
9 Atzun cye tzaj cytzakꞌweꞌn:
—Najchak tzajni koꞌye wen nok tuꞌnju baꞌnxix tbinx tkanil o kbiye tiꞌj Dios aju Tdiosa. O kbiye tcyakilju o tbincha tuj Ejipt, 10 ex aju o tbincha cyiꞌj ke cabe rey cye aj Amorrey, akeju ateꞌtok jlajxi nima Jordán; tiꞌj Sehón aju rey te Hesbón, tucꞌix Og aju rey tuj txꞌotxꞌ Basán, aju najltok tuj tnam Astarot. 11 Cyjaꞌtzun, akeju nejenel keye ex keju najl tuj ktxꞌotxꞌe tzaj cymaꞌn keye: Cyiꞌnx cywaye tuj cybeye ex cyxiꞌye jatum ateꞌ ke aj Israel, ex cymanxe cye: Kaje ko oque te cymajene, ex kaje tuꞌn tcyaj bant tiꞌj jun cyyole kucꞌile, che chi tzaj cymaꞌn. 12 Tej ketze jyolte cyeye, aju kwaye lu mekꞌmojxtok taꞌ tej ttzaj kiꞌne, atzun jaꞌlo ma jlet lan tiꞌj ex puro txꞌiꞌl ma tzꞌoc wen. 13 Ax icx ke tzꞌuꞌm lu, acꞌajx ke tej cycuꞌx knojsaꞌne tuꞌn taꞌl twitz uva, atzun jaꞌlo ttxꞌakan ke. Ax icx ma che tenba ke kxbalune ex ke kxajbiye, ma che baj tuꞌn tlaj najchak ma ko tzaje, che chi xjal aj Gabaón. 14 Atzun cye aj Israel xi cynicꞌbeꞌn cywa aj Gabaón, pero mintiꞌ xi cykanin te Kman alcye tuꞌn cybinchante. 15 Banttzun tiꞌj jun yol tuꞌn Josué cyucꞌil, tuꞌn miꞌn tten kꞌoj cyxol, ex xi ttziyan tuꞌn miꞌn cycub tbyoꞌn; ax icx ke mastl nejenel cyxol aj Israel xi cytziyan tuꞌn tbant icju.
16 Tbajlenxi ox kꞌij o cybi aj Israel ka ake aj Gabaón ax najlke nikayin cytxlaj. 17 E jeꞌxtzun ke aj Israel jyolte cye aj Gabaón, ex tujxi toxin kꞌij e pon cyuj ke tnam jatum ateꞌ ke, ex atzun ke tnam jlu: Gabaón, Cafira, Beerot ex Quiriat-jearim. 18 Ex mintiꞌ e cub byoꞌn ke cyuꞌn aj Israel, porque akeju nejenel cyxol otok txi cytziyan jun yol twitz Kman Dios tuꞌn miꞌn tcub cybyoꞌn ke.
—Ma txi ktziyane jun yol twitz Kman Dios tuꞌn miꞌn cycub kbyoꞌne. Cyjaꞌtzun jaꞌlo mlay kbinchaye jun tiꞌxti mya baꞌn cyiꞌj. 20 Baꞌn tuꞌn cycyaj ankꞌin kuꞌn, porque ka miꞌn ma japun kuꞌn aju yol ma txi ktziyane, jaculo tzaj tkꞌoj Dios kiꞌj.
21 Xi cymaꞌn ke nejenel cye aj Israel tuꞌn miꞌn cycub byoꞌn, nok oꞌcx e oc kꞌoꞌn te ikal siꞌ ex te ikal aꞌ tuꞌn tajben cye cycyakil tnam xjal. Cyjaꞌtzun o japun aju yol xi cytziyan ke nejenel.
22 E tzajtzun ttxcoꞌn Josué ke xjal aj Gabaón ex xi tkanin cye:
—¿Tikuꞌn o ko cub cysbuꞌne tuꞌnju o cymaye keye ka najchak otok che tzaje, ex axtok najl keye tzalu? 23 Tuꞌntzun jlu cbel cycastiwoye ex che oquele te majen te jumajx. Che txꞌemile siꞌ ex che ikale aꞌ tuꞌn tajben tuj tja Ndiose.
24 Atzun cye xi cytzakꞌweꞌn te Josué:
—O kbinchaye icju porque tzaj nimxix kxobile cywitze; jaculo bant kcub cybyoꞌne, ko chiye, porque o kbiye tkanil yol xi tmaꞌn Kman aju Cydiose te Moisés aju tmajen, xi tmaꞌn tuꞌn t-xi tkꞌoꞌn tcyakil txꞌotxꞌ lu te cyeye ex tuꞌn tcub cybyoꞌne cycyakil xjal najl tzalu. 25 Lu koꞌye atoꞌye tuj cykꞌabe; cybinchame kiꞌje nok alcye baꞌn tuj cywitze, che chi.