Tej tcub cyiꞌj aj Amorrey cyuꞌn aj Israel
10
Tzaj nim t-xobil Adonisedec aju rey te Jerusalén, tej tbinte otok cub tiꞌj tnam Hai tuꞌn Josué ex otok baj t-xitun tnam tucꞌix ju rey, ic tzaꞌn otok tbincha tiꞌj tnam Jericó ex tiꞌj rey at tuj; ax icx otok tbi ka otok bant tiꞌj cyuꞌn aj Gabaón cyucꞌil aj Israel tuꞌn miꞌn cykꞌojin, ex axtzun otok che najan aj Gabaón cyxol aj Israel. 2 Cyjaꞌtzun tzaj mastl t-xobil Adonisedec, porque aju tnam Gabaón maꞌ toclen ic tzaꞌn ke mastl tnam, ex mas ma tij ic tzaꞌn tnam Hai, ex ax najl rey tuj, ex ke xjal aj Gabaón at nim cyipun tuꞌn cykꞌojin. 3 Cyjaꞌtzun xi t-samaꞌn Adonisedec ke xjal kꞌmalte ke yol lu te Hoham aju rey te Hebrón, te Piream aju rey te Jarmut, te Jafía aju rey te Laquis, ex te Debir aju rey te Eglón: 4 Cytzaje onil wucꞌile tuꞌn kkꞌojin cyiꞌj aj Gabaón, porque ma bant tiꞌj jun cyyol tucꞌil Josué ex cyucꞌil aj Israel, chi Adonisedec. 5 Bajtzun cychmon cyib ke jweꞌ rey cye aj Amorrey, ex atzun ke jlu: Aju rey in cawin tuj Jerusalén, aju rey in cawin tuj Hebrón, aju rey in cawin tuj Jarmut, aju rey in cawin tuj Laquis ex aju rey in cawin tuj Eglón; cub be cyuꞌn cyucꞌix ke cysoldad, ex e cub ten ttxlaj tnam Gabaón tuꞌn cykꞌojin tiꞌj.6 Atzun cye aj Gabaón xi cysamaꞌn tkanil tucꞌil Josué max tuj Gilgal, jatum otok che cub ten aj Israel, che chi cyjaꞌ: Miꞌn cub t-xcꞌayin tiba tuꞌn ttzaja onil keye, akoꞌye ajbel teya. Ttzaj naja onil kiꞌje te colol keye, porque ma baj cychmon cyib cycyakil ke rey cye aj Amorrey, akeju najl tuj tiwitz txꞌotxꞌ, tuꞌn cykꞌojin kiꞌje. 7 Etztzun Josué tuj Gilgal cyucꞌix ke t-soldad cyuw cycꞌuꞌj tuj kꞌoj. 8 Atzunte Kman tzaj tmaꞌn te: Miꞌn xoba cywitz porque che xel nkꞌoꞌne tuj tkꞌaba, ex mi jun ctel tipun tuꞌn toc tzokpaj tiꞌja, chi Kman.
9 Etztzun Josué tuj Gilgal, e bet tuj enter konicꞌan tuꞌn cypon jatum ateꞌ ke aj Amorrey, ex nok minaben e oc tzokpaj cyiꞌj. 10 Biꞌx e jaw secꞌpaj ke aj Amorrey cywitz aj Israel tuꞌn Kman, cyjaꞌtzun e cub nimcu aj kꞌoj cyuꞌn aj Israel tuj Gabaón, ex te tibajxi jlu e jeꞌx lpeꞌ cyiꞌj mastl tuj be in xiꞌ tuj tnam Bet-horón, ex cucx e cub ke aj Amorrey cyuꞌn tuj be tejxi cypon max tuj tnam Azeca ex tuj tnam Maceda. 11 Tej cycuꞌx aj Amorrey twitz cubl te lugar Bet-horón in che oktok cywitz aj Israel, tzaj t-xoꞌn Kman txkan sakbakun cyibaj, nmak ke wen ic tzaꞌn abj, ex mas nim aj Amorrey e cyim tuꞌn sakbakun cywitz keju e cyim tuꞌn spad cyuꞌn aj Israel.
12 Tej cyxi kꞌoꞌn aj Amorrey tuj cykꞌab aj Israel tuꞌn Kman, xi tmaꞌn Josué cywitz tnam xjal cyjaꞌ:
Ax weꞌya kꞌij tibaj tnam Gabaón; ex ax weꞌya xjaw tibaj chkꞌajlaj Ajalón, chi Josué.
13 Axtzun o weꞌ kꞌij ex xjaw, mintiꞌ e bet tejxi tcub cyiꞌj aj kꞌoj cyuꞌn aj Israel.
A jlu tzꞌiban tuj libro cyaj ttzꞌiban Jaser. Aju kꞌij ax o weꞌ tmijil cyaꞌj, balo chixmi te jun kꞌijcu mintiꞌ ex kꞌij. 14 Naꞌnxtok tbaj jun maj icju, ex naꞌnx tbaj juntl maj icju, ic tzaꞌn o baj tej t-xi tniman Kman tyol jun xinak, porque acu Kman o tzꞌonin cye aj Israel tuj kꞌoj lu.
15 Te tibajxi jlu ajtztzun Josué cyucꞌix aj Israel tuꞌn cypon tuj campament tuj Gilgal. 16 Atzun ke jweꞌ rey e jeꞌl ok ex xi cyewan cyib tuj jun toyꞌ jul tuj Maceda. 17 Pero mas yajxi e cnet tuj toyꞌ jul lu, ex pon tkanil tucꞌil Josué. 18 Cyjaꞌtzun xi tmaꞌn Josué cye: Cytolinxe ke matij abj tuꞌn cypon ttzi toyꞌ jul, cymaksin oque, ex cykꞌon cube ke xkꞌukil ttziꞌ tuꞌntzun toc cycwentin. 19 Atzun cye mastl soldad xi tmaꞌn Josué: Miꞌn ax che cub tene tzalu. Cyxiꞌye kꞌol welt ttzal cyiꞌj aj kꞌoj ex cyoc tzokpaje cyiꞌj. Miꞌn txi cykꞌoꞌne ambil cye tuꞌn cyaj meltzꞌaj tuj cytanmi, porque ma che tzaj kꞌoꞌn tuj cykꞌabe tuꞌn Kman Dios, chi Josué.
20 Cub cyiꞌj aj Amorrey tuꞌn Josué ex cyuꞌn aj Israel. Nimxix xjal e cub cybyoꞌn, atzun junjuntl aj Amorrey e cyaj ankꞌin e jeꞌx clol cyib cyuj cytanmi toc muro cyiꞌj. 21 Atzun cye aj Israel tuj txubtxaj e ajtz meltzꞌaj ex mintiꞌ jun o baj cyiꞌj, e ul tuj cycampament tcub ttxlaj Maceda jatum taꞌtok Josué, ex mi jun o yolin mya baꞌn cyiꞌj aj Israel.
22 Xitzun tmaꞌn Josué cye: Cyjakoꞌn ela ttzi toyꞌ jul ex cyiꞌn etze ke jweꞌ rey. 23 Cybinchatzun aj Israel icju ex e jeꞌtz cyiꞌn ke rey tuj toyꞌ jul; etz cyiꞌn rey te Jerusalén, rey te Hebrón, rey te Jarmut, rey te Laquis, tucꞌix rey te Eglón. 24 Tejtzun cyul kꞌiꞌn twitz Josué, e tzajtzun ttxcoꞌn Josué cycyakil ke xinak aj Israel, ex xi tmaꞌn cye ke nejenel cye soldad akeju ateꞌ tucꞌil: Che lakꞌetze ex che weꞌcuye tibaj cykul ke rey lu. Atzun cye nejenel o cybincha icju, 25 ex xi tmaꞌn Josué cye: Miꞌn che xobe ex miꞌn baj cycꞌuꞌje; nok oꞌcx tenx cyipune ex cyuwx cycꞌuꞌje, porque ax jlu cbantel tuꞌn Kman cyiꞌj cycyakil aj kꞌoj cyiꞌje.
26 Te tibajxi e cub tbyoꞌn Josué ke rey lu, ex xi tmaꞌn tuꞌn cyjaw yoban junjun tiꞌj junjun wiꞌ tzeꞌ, ex ax cyojxsaꞌn tejxi toc kax. 27 Tejtzun chꞌixtok tex kꞌij xi tmaꞌn Josué tuꞌn cycuꞌtz kꞌiꞌn cywiꞌ ke tzeꞌ, ex tuꞌn cyocx kꞌot tujx toyꞌ jul jatum cyewantok cyib. Ex octzun cymaksiꞌn ttzi toyꞌ jul tuꞌn junjun matij abj, ex ax ateꞌ ke abj lu jaꞌlo.
Cub cyiꞌj txkantl tnam cyuꞌn aj Israel
28 Tujx kꞌij lu cub tiꞌj tnam Maceda tuꞌn Josué ex biꞌx naj tuꞌn te jumajx; e cub tbyoꞌn tuꞌn spad cycyakil ke xjal najlke tuj tnam lu, ex mi jun cyaj ankꞌin tuꞌn. Ic o tbincha tiꞌj rey tuj tnam Maceda ic tzaꞌnx o tbincha tiꞌj rey tuj tnam Jericó.
29 Cyicꞌlenxitzun Josué cyucꞌix ke aj Israel tuj tnam Maceda, e pon tuj tnam Libna ex e oc tzokpaj tiꞌj. 30 Ax icx xi tkꞌoꞌn Kman tnam lu tuj tkꞌab, tucꞌix ju rey at tuj. Cub tbyoꞌn cycyakil xjal tuꞌn spad, mi jun cyaj ankꞌin tuꞌn, ex o tbincha tiꞌj rey tuj tnam Libna ic tzaꞌnx o tbincha tiꞌj rey tuj tnam Jericó.
31 Cyicꞌlenxi Josué cyucꞌix ke aj Israel tuj tnam Libna, e pon tuj tnam Laquis, atzun e cub ten twitz tnam ex e oc tzokpaj tiꞌj. 32 Tujtzun tcabin kꞌij tzaj tkꞌoꞌn Kman tnam Laquis tuj cykꞌab, ex cubtzun cybyoꞌn ke aj Israel cycyakil xjal tuꞌn spad akeju najlke tuj tnam lu, ic tzaꞌnx otok tenba tnam Libna. 33 Atzunte Horam aju rey te tnam Gezer o tzaj cyucꞌix ke t-soldad colil tiꞌj tnam Laquis, pero biꞌx o naj rey cyucꞌix ke t-soldad tuꞌn Josué, ex mi jun xjal cyaj ankꞌin tuꞌn.
34 Cyicꞌlenxi Josué cyucꞌix ke aj Israel tuj tnam Laquis, e pon tuj tnam Eglón, ex atzun e cub ten twitz tnam ex e oc tzokpaj tiꞌj. 35 Tujx kꞌij lu cub tiꞌj tnam cyuꞌn ex cub cybyoꞌn cycyakil xjal tuꞌn spad; akeju najl tuj tnam biꞌx e cub baj cyuꞌn te jumajx, ic tzaꞌnx otok che tenba ke xjal tuj tnam Laquis.
36 Cyicꞌlenxi tuj tnam Eglón e pon tuj tnam Hebrón, ex e oc tzokpaj tiꞌj. 37 Tejtzun tcub tiꞌj tnam cyuꞌn, biꞌx cub cyxitun te jumajx ex cub cybyoꞌn tuꞌn spad aju rey cyucꞌix cycyakil xjal najlke tuj tnam lu, ax icx e cub cybyoꞌn ke xjal najlke cyuj ke tnam cyvesin cyib tucꞌil, ic tzaꞌnx otok cybincha tiꞌj tnam Eglón.
38 Cyicꞌlenxi Josué cyucꞌix ke aj Israel tuj tnam Hebrón, e pon tuj tnam Debir ex e oc tzokpaj tiꞌj, 39 cub cybyoꞌn tuꞌn spad aju rey at tuj tnam, cyucꞌix ke xjal najlke cyuj ke tnam cyvesin cyib tucꞌil. Mi jun xjal najl tuj tnam Debir o cyaj ankꞌin; cycyakil e baj naj cyuꞌn, ic tzaꞌnx otok cybincha tiꞌj tnam Hebrón, tiꞌj tnam Libna ex cyiꞌj ke cyrey.
40 Cyjaꞌtzun tten o tzyet tcyakil txꞌotxꞌ lu tuꞌn Josué. E cub ke rey tuꞌn, akeju ateꞌ tuj tiwitz txꞌotxꞌ, keju ateꞌ tuj txꞌotxꞌ Néguev, keju ateꞌ tuj chkꞌajlaj ex keju ateꞌ tcꞌuꞌj witz. Tcyakil cub t-xitun ex cycyakil xjal e cub tbyoꞌn; mi jun cyaj ankꞌin tuꞌn ic tzaꞌn otok tma Kman Dios te. 41-42 Biꞌx e cub tbyoꞌn Josué cycyakil ke rey ex tzyet tcyakil cytxꞌotxꞌ tuꞌn, tzajx keꞌ max tuj Cades-barnea tejxi tpon baj max tuj Gaza, ex tcyakil txꞌotxꞌ Gosén tejxi tpon baj tuj tnam Gabaón, porque ate Kman Dios o tzꞌonin cyiꞌj tuj kꞌoj. 43 Te tibajxi jlu ajtz Josué cyucꞌix cycyakil aj Israel tuꞌn cyul tuj campament tuj Gilgal.