Cub tiꞌj Jabín tuꞌn Josué, cyucꞌix mastl rey mojl cyyol tucꞌil
11
Tej tbinte Jabín aju rey te tnam Hazor tcyakilju otok baj, xi t-samaꞌn ke t-sanjel tuꞌn tbant tiꞌj jun cyyol tucꞌil Jobab aju rey te tnam Madón, ex cyucꞌil ke rey te tnam Simrón ex te tnam Acsaf, 2 cyucꞌil cycyakil ke rey ateꞌ tuj tiwitz txꞌotxꞌ tuj tbankꞌab kꞌij, cyucꞌil keju ateꞌ tuj chkꞌajlaj ttzi nima Jordán ex tjakꞌ lagun Cineret, cyucꞌil keju ateꞌ tuj chkꞌajlaj, ex cyucꞌil keju ateꞌ tuj txꞌotxꞌ tuj telex kꞌij tumlal tnam Dor, 3 cyucꞌil ke aj Canaán tumlal tjawitz kꞌij ex telex kꞌij, cyucꞌil aj Amorrey, aj Hetey, aj Ferezey, aj Jebusey akeju ateꞌ cywi witz, ex ke aj Hevey akeju ateꞌ t-xe witz Hermón tuj txꞌotxꞌ Mizpa. 4 Cycyakiltzun ke rey lu e tzaj, cyucꞌix ke cysoldad, cyucꞌix nimxix chej kꞌiꞌn cyuꞌn ex cyucꞌix ke carwaj in che ajben tuj kꞌoj. Nimxix cyajlal ke soldad, mintiꞌ o bant cyajlanjtz, ic cyajlal ic tzaꞌn ttxa tzaꞌn at ttzi mar. 5 Cycyakil ke jlu o bant tiꞌj jun cyyol, ex atzun baj cychmon cyib ttzi aꞌ Merom tuꞌntzun cyoc tzokpaj cyiꞌj aj Israel.6 Atzunte Kman tzaj tmaꞌn te Josué: Miꞌn xoba cywitz. Wuꞌne che bel tzꞌak tuj cykꞌabe tlokju nchiꞌj ex che bel cybyoꞌne cycyakil. Atzun teya bix baj tkesina tbotxꞌil cykan ke cychej, ex bix tzꞌoc tkꞌoꞌna cykꞌakꞌal ke carwaj in che ajben tuj kꞌoj.
7 Atzunte Josué cyucꞌix cycyakil ke t-soldad nok minaben e oc tzokpaj cyiꞌj ttzi aꞌ Merom. 8 Ate Kman xi kꞌonte cye tuj cykꞌab aj Israel, e oc tzokpaj cyiꞌj ex e jeꞌx lpeꞌ cyiꞌj tejxi cypon tuj nintz tnam Sidón ex tuj lugar Misrefot-maim, ex atzun tuj tumlal tjawitz kꞌij e pon max tuj tchkꞌajlajil txꞌotxꞌ Mizpa. Misicyer jun cye ke xjal lu o cyaj ankꞌin. 9 O japun tuꞌn Josué ic tzaꞌnx otok tma Kman te, baj tkesin tbotxꞌil cykan cychej ke aj kꞌoj, ex e baj tpatun ke cycarwaj in che ajben tuj kꞌoj.
10 Te tibajxi ajtz meltzꞌaj Josué ex cub tiꞌj tnam Hazor tuꞌn. Aju tnam lu mas at toclen cywitz mastl tnam. Ex cub tbyoꞌn Josué aju rey at tuj tnam, 11 cyucꞌix cycyakil ke xjal najlke tuj tnam. Tcyakil o naj cyuꞌn te jumajx ex cub cypatun tnam. 12 Ax icx o tbincha Josué cyiꞌj mastl tnam akeju otok mojeꞌ cyyol tucꞌil Hazor; e tzyet tuꞌn ex e cub tbyoꞌn ke rey ateꞌ cyuj, ex e cub t-xitun te jumajx ic tzaꞌnx otok cyaj tmaꞌn Moisés aju tmajen Kman. 13 Pero mintiꞌ cub cypatun ke aj Israel ke tnam binchamaj cyibaj cytxꞌakan tnam cywiꞌ tal witz, oꞌcxcu tnam Hazor cub cypatun. 14 Cub cybyoꞌn tuꞌn spad cycyakil ke xjal najlke cyuj ke tnam lu, misicyer jun xjal o cyaj ankꞌin. Atzun ke alumaj, cyucꞌix cycyakil tiꞌxti at cyuj ke tnam lu, tzaj cyiꞌn tuꞌn toc te cye.
O japun tuꞌn Josué ke orden cyaj tmaꞌn Moisés te
15 Ate Kman xi kꞌonte ke orden te Moisés, ex atzunte Moisés xi kꞌonte te Josué, ex tcyakil o japun tuꞌn Josué; misicyer jun yol cyaj naj tuꞌn tiꞌj tcyakilju otok tzaj tmaꞌn Kman te Moisés. 16 O che tzyet cycyakil lugar lu tuꞌn Josué: Aju tiwitz txꞌotxꞌ, tcyakil txꞌotxꞌ Néguev, tcyakil txꞌotxꞌ Gosén, tucꞌix txꞌotxꞌ tibaj mlaj ex chkꞌajlaj ttzi nima Jordán, tucꞌix tcyakil tiwitz txꞌotxꞌ ex ke chkꞌajlaj cye aj Israel. 17 Tzajnix keꞌ jatum taꞌ witz Halac nikayin ttxlaj lugar Seir, ex max tuj ju lugar Baal-gad aju tcubsaꞌn tuj chkꞌajlaj Líbano t-xe witz Hermón; e tzyet ke rey te txꞌotxꞌ lu tuꞌn Josué ex e cub tbyoꞌn cycyakil, 18 ex nim tyemp o kꞌojin Josué cyucꞌil ke rey lu. 19 Nok junx tnam o bant tiꞌj cyyol cyucꞌil aj Israel; atzun ke xjal aj Hevey akeju najl tuj tnam Gabaón. Cycyakil mastl tnam oc kꞌoj cyiꞌj ex e tzyet, 20 porque ate Kman cub cyuwsante cyanmi ke aj kꞌoj tuꞌn tjaw cyiꞌn cyib cyiꞌj aj Israel, tuꞌntzun cynaj te jumajx cyuꞌn aj Israel, ex tuꞌn miꞌn ttzaj tzꞌeꞌy cycꞌuꞌj aj Israel cyiꞌj, ic tzaꞌnx otok tma Kman te Moisés.
21 Ax tuj tyemp lu cub cyiꞌj cycyakil aj Anac tuꞌn Josué, akeju najl twi witz Hebrón, tuj tnam Debir, tuj tnam Anab ex tuj tcyakil tiwitz txꞌotxꞌ te Judá ex te Israel. Biꞌx e naj tuꞌn ex cub t-xitun ke cytanmi. 22 Cyjaꞌtzun misicyer jun tiyjil nintz xjal Anac cyaj ankꞌin tuj tcyakil txꞌotxꞌ cye aj Israel. Oꞌcx e cyaj ten ke tiyjil Anac tuj tnam Gaza, tuj tnam Gat ex tuj tnam Asdod.
23 Cyjaꞌtzun o tzyet tcyakil txꞌotxꞌ tuꞌn Josué ic tzaꞌnx otok tma Kman te Moisés. Ax icx cub t-sipan Josué txꞌotxꞌ cyxol cyiyjil aj Israel tuꞌntzun toc te cyetzbil. Te tibajxi jlu weꞌ kꞌoj ex e cyaj ten tnam xjal tuj txubtxaj.