2 Cub tiꞌj Sehón cyuꞌn, aju rey cye aj Amorrey, aju najl tuj tnam Hesbón. Aju tcawbil atzun tzajni keꞌ tuj tnam Aroer ttzi tkꞌab xak Arnón, tuj tmij chkꞌajlaj, ex ponin baj max ttzi tkꞌab xak Jaboc, jatum xiꞌyni keꞌ cytxꞌotxꞌ aj Amón, ex ka mijcu txꞌotxꞌ Galaad. 3 Ax icx in cawintok tuj chkꞌajlaj tuj tjawitz kꞌij ttzi nima Jordán, tzajni keꞌ ttzi lagun Cineret ex ponin baj max ttzi mar at nim atzꞌan tuj tuj chkꞌaꞌjlaj Arabá, tumlal tnam Bet-jesimot, ex ponin baj tumlal tnayaj kꞌij t-xe witz Pisga tbi.

4 Ex cub tiꞌj Og cyuꞌn, aju rey te Basán, jun mancbil cyiyjil aj Refait, atzun najl tuj tnam Astarot ex tuj tnam Edrei. 5 Aju tcawbil, atzun tzajni keꞌ twi witz Hermón ex tuj tnam Salca, ex xiꞌyin tuj tcyakil txꞌotxꞌ Basán, ponin baj tuj tmojonil tnam Gesur ex tnam Maaca, max tuj tmij txꞌotxꞌ Galaad, aju tetok Sehón aju rey te Hesbón.

6 Tuꞌn Moisés ex cyuꞌn aj Israel cub cyiꞌj ke rey lu, ex atzunte Moisés aju tmajen Dios xi kꞌonte txꞌotxꞌ lu cye ke tiyjil Rubén, cye ke tiyjil Gad ex cye mij tiyjil Manasés.

7 Atzun ke rey lu, akeju cub cyiꞌj tuꞌn Josué ex cyuꞌn aj Israel tuj txꞌotxꞌ tuj telex kꞌij te nima Jordán. Aju txꞌotxꞌ lu atzun in tzaj keꞌ tuj lugar Baal-gad aju at tuj chkꞌajlaj Líbano, ex in pon baj twi witz Halac nikayin ttxlaj lugar Seir. Atzunte Josué cub sipante cytxꞌotxꞌ ke rey lu cyxol cyiyjil aj Israel ex xi tkꞌoꞌn te cyetzbil te jumajx. 8 Aju txꞌotxꞌ tiwitz txꞌotxꞌ, tucꞌix txꞌotxꞌ chkꞌajlaj, tucꞌix chkꞌajlaj tcub ttzi nima Jordán, tucꞌix txꞌotxꞌ tcꞌuꞌj witz, tucꞌix tzkij txꞌotxꞌ ex tucꞌix lugar Néguev tbi, akeju txꞌotxꞌ lu cyetok aj Hetey, aj Amorrey, aj Canaán, aj Ferezey, aj Hevey ex aj Jebusey.

9 Akeju rey cub cyiꞌj cyuꞌn, atzun ke jlu: aju rey te tnam Jericó, aju rey te tnam Hai, aju tnam lu nikayin taꞌ tiꞌj Bet-el, 10 aju rey te tnam Jerusalén, aju rey te tnam Hebrón, 11 aju rey te tnam Jarmut, aju rey te tnam Laquis, 12 aju rey te tnam Eglón, aju rey te tnam Gezer, 13 aju rey te tnam Debir, aju rey te tnam Geder, 14 aju rey te tnam Horma, aju rey te tnam Arad, 15 aju rey te tnam Libna, aju rey te tnam Adulam, 16 aju rey te tnam Maceda, aju rey te tnam Bet-el, 17 aju rey te tnam Tapúa, aju rey te tnam Hefer, 18 aju rey te tnam Afec, aju rey te tnam Sarón, 19 aju rey te tnam Madón, aju rey te tnam Hazor, 20 aju rey te tnam Simron-merón, aju rey te tnam Acsaf, 21 aju rey te tnam Taanac, aju rey te tnam Meguido, 22 aju rey te tnam Cedes, aju rey te tnam Jocneam tcub t-xe witz Carmelo, 23 aju rey te tnam Dor tuj txꞌotxꞌ Dor, aju rey te tnam Goim tuj txꞌotxꞌ Gilgal, 24 ex aju rey te tnam Tirsa. Tuꞌn tcyakilx 31 cybaj rey.