Aju txꞌotxꞌ naꞌnxtok ttzyet cyuꞌn aj Israel
13
Tej ttijin Josué tzaj tmaꞌn Kman te: Ma tijina ex atx nim txꞌotxꞌ naꞌnx ttzyet. 2 Ex atzun ke txꞌotxꞌ naꞌnx ttzyet cyuꞌne jlu: Tcyakil cytxꞌotxꞌ aj Filistey ex cytxꞌotxꞌ aj Gesurey, 3 xiꞌyin keꞌ ttzi nima Sihor tuj tumlal tjawitz kꞌij te Ejipt, ex ponin baj max tuj tmojonil tnam Ecrón tuj tbankꞌab kꞌij, aju cytxꞌotxꞌ aj Canaán; ex tuj txꞌotxꞌ lu at jweꞌ nejenel aj Filistey, nejenel ke cyuj ke tnam lu: Gaza, Asdod, Ascalón, Gat ex Ecrón. Ax icx naꞌnx ttzyet txꞌotxꞌ cye aj Avey 4 tuj tumlal tnayaj kꞌij, ex tcyakil cytxꞌotxꞌ aj Canaán xiꞌyinx cyuj tnam cye aj Sidón ex ponin baj max tuj lugar Afec tbi, tuj tmojonil cytxꞌotxꞌ aj Amorrey. 5 Naꞌnx ttzyet cytxꞌotxꞌ aj Giblit ex tcyakil txꞌotxꞌ Líbano tuj tumlal tjawitz kꞌij, xiꞌyinx tuj Baal-gad t-xe witz Hermón ex ponin baj max ttxlaj tnam Hamat. 6 Che elex nlajoꞌne cywitz aj Israel ke xjal aj Sidón ex cycyakil keju najlke cyuj tiwitz txꞌotxꞌ, tzajnix twi witz Líbano ex ponin baj max tuj lugar Misrefot-maim. Atzun teya, sipan cuba txꞌotxꞌ ex kꞌonxa te cyetzbil aj Israel ic tzaꞌnx o txi nmaꞌne teya. 7 Sipan cuba txꞌotxꞌ cyxol belaj cꞌloj cyiyjil aj Israel cyucꞌix mijtl tiyjil Manasés.Aju cytxꞌotxꞌ ke tiyjil Manasés, Rubén ex Gad
8 Ke tiyjil Rubén ex ke tiyjil Gad, cyucꞌix mij tiyjil Manasés o cycꞌam cyetzbil tej t-xi tkꞌoꞌn Moisés cytxꞌotxꞌ tuj tumlal tjawitz kꞌij te nima Jordán. 9 Aju txꞌotxꞌ oc te cyetzbil, xiꞌyinx keꞌ tuj tnam Aroer aju tcub ttzi tkꞌab xak Arnón, tucꞌixju tnam tcub tuj tmij chkꞌajlaj, ex tcyakil chkꞌajlaj te tnam Medeba, ponin baj max jatum taꞌ tnam Dibón, 10 cyucꞌix cycyakil tnam te Sehón aju rey cye aj Amorrey, aju in cawintok tuj tnam Hesbón, ex ponin baj max tiꞌj tmojonil cytxꞌotxꞌ aj Amón. 11 Ax icx oc te cye aju txꞌotxꞌ Galaad, tucꞌix cytxꞌotxꞌ aj Gesurey, tucꞌix cytxꞌotxꞌ aj Maaca, tucꞌix witz Hermón, tucꞌix tcyakil txꞌotxꞌ Basán, ponin baj max tuj tnam Salca, 12 ex tucꞌix tcyakil txꞌotxꞌ tcyajsaꞌntok tjakꞌ tcawbil Og aju rey te Basán, aju mancbil cyiyjil aj Refait ex in cawintok tuj tnam Astarot ex tuj tnam Edrei. Otok cub cyiꞌj cycyakil jlu tuꞌn Moisés ex otok che ex tlajoꞌn tuj lugar lu. 13 Atzun ke xjal aj Gesur ex aj Maaca mintiꞌ e jeꞌx lajoꞌn tuj txꞌotxꞌ lu, nok oꞌcx ax e cyaj ten tuꞌn cynajan cyxol aj Israel ex ax ateꞌ jaꞌlo.
14 Mintiꞌ xi tkꞌoꞌn Moisés cyetzbil tiyjil Leví, porque te cye tuꞌn cyoc ke oyaj in che cub patit te jun nimbil te Kman Dios, ic tzaꞌnx otok tma Kman cye.
15 Cub t-sipan Moisés txꞌotxꞌ cyxol tiyjil Rubén ic tzaꞌnx cybaj junjun cꞌloj cyiyjil. 16 Cyjaꞌtzun, aju cytxꞌotxꞌ tzaj keꞌ max tuj tnam Aroer ttzi tkꞌab xak Arnón, jawnix tuj tnam tcub tuj tmij chkꞌajlaj ex jawnix tuj tnam Medeba, 17 ex pon baj max tuj tnam Hesbón ex cyuj cycyakil tnam ateꞌ tuj chkꞌajlaj, ex atzun ke tnam jlu: Dibón, Bamot-baal, Bet-baal-meón, 18 Jahaza, Cademot, Mefaat, 19 Quiriataim, Sibma, Zaret-sahar aju tcubsaꞌn twi tal witz tuj chkꞌajlaj, 20 Bet-peor, Bet-jesimot, tucꞌixju txꞌotxꞌ toc tcꞌuꞌj witz Pisga, 21 ke tnam ateꞌ tuj chkꞌajlaj ex tcyakil txꞌotxꞌ jatum otok cawin Sehón aju rey cye aj Amorrey, aju najltok tuj tnam Hesbón. Tuꞌn Moisés otok cub tiꞌj Sehón ex cyiꞌj ke nejenel cye aj Madián, akeju in che ajbentok te Sehón, ex atzun ke jlu: Evi, Requem, Zur, Hur, ex Reba. 22 Ax icx cub cybyoꞌn aj Israel Balaam aju baꞌn kꞌijin, aju tcyꞌajal Beor, ex nimcu mastl. 23 Aju cytxꞌotxꞌ ke tiyjil Rubén aju cub sipan cyxol ic tzaꞌnx cyajlal junjun cꞌloj cyiyjil, atzun cycyakil ke tnam lu, cyucꞌix ke cy-aldey, ex ponin baj max ttzi nima Jordán.
24 Ax icx cub t-sipan Moisés txꞌotxꞌ cyxol ke tiyjil Gad ic tzaꞌnx cyajlal junjun cꞌloj cyiyjil. 25 Aju tnam Jazer cyucꞌix cycyakil tnam ateꞌ tuj Galaad oc te cye, tucꞌix mij cytxꞌotxꞌ aj Amón, ponin baj max jatum taꞌ tnam Aroer aju tcubsaꞌn twitz tnam Rabá, 26 tucꞌix txꞌotxꞌ tcubsaꞌn t-xol tnam Hesbón, tucꞌil tnam Ramat-mizpa, tucꞌix tnam Betonim ex tucꞌix txꞌotxꞌ tcubsaꞌn t-xol tnam Mahanaim tucꞌil tmojonil tnam Debir. 27 Atzun ke tnam ateꞌ tuj chkꞌajlaj akeju e oc te cye, atzun ke jlu: Bet-aram, Bet-nimra, Sucot ex Zafón; akeju ateꞌtok tjakꞌ tcawbil Sehón aju rey te Hesbón. Cyjaꞌtzun aju cytxꞌotxꞌ aj Gad xiꞌynix tuj tjawitz kꞌij te nima Jordán, ponin baj max ttzi lagun Cineret. 28 Atzun ke tnam lu cyucꞌix ke cy-aldey ateꞌ cyiꞌjele e oc te cye ke tiyjil Gad, ic tzaꞌnx cyajlal junjun cꞌloj cyiyjil.
29 Ax icx xi tkꞌoꞌn Moisés cytxꞌotxꞌ mij tiyjil Manasés; cub t-sipan ic tzaꞌn cyajlal junjun cꞌloj cyiyjil. 30 Oc te cye tcyakil txꞌotxꞌ tzyuꞌntok tuꞌn Og aju rey te Basán, tcyakil txꞌotxꞌ xiꞌynix jatum taꞌ tnam Mahanaim, cyucꞌix 60 tnam otok cub cyiꞌj tuꞌn Jair, 31 tucꞌix mij txꞌotxꞌ Galaad, cyucꞌix ke tnam Astarot ex Edrei jatum in cawintok Og aju rey te Basán. Tcyakil jlu oc cye mij tiyjil Maquir aju tcyꞌajal Manasés, ic tzaꞌn cyajlal junjun cꞌloj cyiyjil.