Cub t-sipan Josué txꞌotxꞌ Canaán
14
Atzun txꞌotxꞌ lu cycꞌam aj Israel te cyetzbil tuj txꞌotxꞌ Canaán, ic tzaꞌnx xi kꞌoꞌn cye tuꞌn pal Eleazar, tucꞌix Josué aju tcyꞌajal Nun, cyucꞌix ke nejenel cye junjun cꞌloj cyiyjil aj Israel. 2 Tuꞌn swert cub sipan txꞌotxꞌ cyxol belaj tucꞌ mij cꞌloj cyiyjil aj Israel, ic tzaꞌnx otok tma Kman te Moisés tuꞌn tbant tuꞌn. 3 Otok txi tkꞌoꞌn Moisés txꞌotxꞌ taj jlajxi nima Jordán cye tiyjil Rubén, cye tiyjil Gad ex cye mij tiyjil Manasés; atzun cye aj Leví mintiꞌ xi tkꞌoꞌn cytxꞌotxꞌ. 4 Ke tiyjil José te cabe cꞌloj e el, jun tiꞌj tiyjil Manasés ex juntl tiꞌj tiyjil Efraín, atzun cye aj Leví mintiꞌ jun piẍ cytxꞌotxꞌ cycꞌam, nok oꞌcx o cycꞌam ke tnam jatum tuꞌn cynajan, cyucꞌix ke cojbil ateꞌ cyiꞌjele, tuꞌntzun cyten ke cywacẍ cyuj, cyucꞌix ke cyẍneꞌl. 5 Atzun cye aj Israel o bant cyuꞌn tuꞌn tbaj sipet txꞌotxꞌ ic tzaꞌnx otok tma Kman te Moisés.Aju ttxꞌotxꞌ Caleb
6 Ke tiyjil Judá e jeꞌx tuj Gilgal tuꞌn cyyolin tucꞌil Josué, ex atzunte Caleb aju aj Cenesey, aju tcyꞌajal Jefone, xi tmaꞌn te Josué: Baꞌn tuꞌna aju tzaj tmaꞌn Kman te Moisés aju tmajen tuj lugar Cades-barnea, aju o tma tiꞌja ex wiꞌje. 7 Otok chin japune twiꞌ 40 abkꞌi tej ntzaj samaꞌne tuꞌn Moisés max tuj lugar Cades-barnea queꞌyilte txꞌotxꞌ Canaán, ex tej npon meltzꞌaje, xi nmaꞌne te axix toc tiꞌj tcyakilju otok wile. 8 Atzun keju e tzaj wucꞌile, tzaj baj cycꞌuꞌj tnam xjal tuꞌn cyyol, atzun weye o japun wuꞌne aju tajbil Kman aju Ndiose. 9 Tzajtzun tmaꞌn Moisés jun yol axix toc weye cyjaꞌ: Aju txꞌotxꞌ jatum ma cub aj tkana tibaj, cꞌoquel te teya te jumajx ex te cye ke tiyjila, porque ma japun tuꞌna aju tajbil Kman aju Ndiose. 10 Ma bajxi 45 abkꞌi ttzajlen tmaꞌn Kman jlu te Moisés, atxix tej ateꞌxtok ke aj Israel tuj lugar tzkij txꞌotxꞌ, ex tuꞌn Dios, lu itzꞌx kine ic tzaꞌnxju yol tzaj ttziyan. Jaꞌlo ma chin japune twiꞌ 85 abkꞌi, 11 pero atx wipune ic tzaꞌnx tej ntzaj samaꞌne tuꞌn Moisés queꞌyilte txꞌotxꞌ Canaán; atx wipune tuꞌn nbete ex tuꞌn nkꞌojine ic tzaꞌnx ojtxi. 12 Cyjaꞌtzun in xi nkanine teya jaꞌlo tuꞌn ttzaj tkꞌoꞌna weye tiwitz txꞌotxꞌ aju tzaj ttziyan Kman weye. Atxix ojtxi baꞌn tuꞌna, ke tiyjil nintz xjal Anac najlke ma chixin, ex nmak ke cytanmi ex toc muro cyiꞌj. Pero awt Kman ten wucꞌile ex onin weye tuꞌn cyex nlajoꞌne ic tzaꞌnx o tma, chi Caleb.
13 Cubtzun cyꞌiwlaꞌn Caleb aju tcyꞌajal Jefone tuꞌn Josué, ex xi tkꞌoꞌn tnam Hebrón tuꞌn toc te te. 14 Cyjaꞌtzun oc tnam Hebrón te te Caleb aju tcyꞌajal Jefone, aju aj Senesey, ex ttenx jaꞌlo porque o japun tuꞌn Caleb aju tajbil Kman, aju Cydios aj Israel. 15 Aju tbi tnam Hebrón toctok nej Quiriat-arba, porque Arba atzun tbi jun xinak maꞌxix toclen cyxol ke tiyjil nintz xjal Anac.
Te tibajxi jlu o weꞌ kꞌoj ex o cyaj ten tnam xjal tuj txubtxaj.