Pon jun t-anjel Kman tuj lugar Boquim
2
Aju t-anjel Kman etz tuj Gilgal ex o pon tuj lugar Boquim tbi, ex xi tmaꞌn cye aj Israel cyjaꞌ: Akine etz kꞌinte cyeye tuj Ejipt ex ma che ul wiꞌne tuj txꞌotxꞌ lu aju xi ntziyane cye cyxeꞌchele, ex xi nmaꞌne cye cyjaꞌ: Mlayx baj nchꞌexpuꞌne aju nyole ma cyaj bant tiꞌj cyucꞌile, 2 atzun cyeye miꞌn mojeꞌ cyyole cyucꞌil ke xjal najlke tuj txꞌotxꞌ lu, nok oꞌcx cbajel cyxitune ke cy-altar, nchiye. Atzun cyeye mintiꞌ ma txi cynimane nyole. ¿Tikuꞌn ma che oc tene binchal mya baꞌn? 3 Tuꞌntzun jlu cxel nmaꞌne cyeye jaꞌlo: Mlay che icꞌ nlajoꞌne ke xjal cywitze, nok oꞌcx che oquel ke xjal lu ic tzaꞌn jun asyal tuꞌn t-xi jatoꞌn cyiꞌje, ex ke cydios che ajbel te jun cꞌobil te cyeye.4 Tejtzun tbaj yolin t-anjel Kman, cycyakil aj Israel e oc ten okꞌel cyuwxix wen, 5 cyjaꞌtzun tten oc tbi lugar lu Boquim. Ex atzun xi cykꞌoꞌn chojbil te Kman.
Aju tcyimlen Josué
6 Tejtzun tbaj tkꞌolben tib Josué cyucꞌil aj Israel, teyle junjun xiꞌ tuj ttxꞌotxꞌ aju otok tcꞌam te tetzbil. 7 Tej itzꞌxtok Josué, cucx e ajben aj Israel te Kman, ax icx tej itzꞌxtok ke tij xjal akeju ax e cyaj ten tcyimlenxi Josué ex o cyil tej cybant ke binchben nim cyipumal tuꞌn Kman te jun baꞌn cye aj Israel. 8 Cyimtzun Josué aju tcyꞌajal Nun ex tmajen Kman, tej otok japun twiꞌ jun syent tucꞌ laj abkꞌi, 9 ex axtzun cuꞌx makuꞌn tujx ttxꞌotxꞌ tuj lugar Timnat-sera, aju taꞌ tuj tiwitz txꞌotxꞌ cye aj Efraín, tiꞌjxi witz Gaas. 10 Ex tej cybaj cyim cycyakil aj Israel akeju e ten tuj tkꞌijlalil Josué, akeju e itzꞌj te tibajxi mintiꞌ chꞌin cyojtzkibl tiꞌj Kman, ex mintiꞌ otok cyil tcyakilju baꞌn otok tbincha Kman cye aj Israel.
El cypaꞌn cyib aj Israel tiꞌj Kman
11 E octzun ten aj Israel binchal mya baꞌn twitz Kman, ex e oc ten cꞌulul cywitz tilbilal Baal, akeju nnoꞌc cydiosin xjal. 12 El cypaꞌn cyib aj Israel tiꞌj Kman aju Cydios cyxeꞌchel, aju etz kꞌinte cye tuj Ejipt, e oc lpeꞌ cyiꞌj cydios xjal cyvesin cyib cyucꞌil, ex e cꞌulun cywitz. Tuꞌntzun jlu tzaj tkꞌoj Kman cyiꞌj. 13 El cypaꞌn cyib tiꞌj Kman ex e oc ten cꞌulul twitz Baal, ex cywitz nimcu tilbilal Astarté aju cydios xjal. 14 Tuꞌntzun jlu tzaj tkꞌoj Kman cyiꞌj aj Israel, xi tkꞌoꞌn ambil cye elekꞌ tuꞌn tel cyelkꞌaꞌn tcyakilju at cye, cub cyiꞌj cyuꞌn ke aj kꞌoj cyiꞌj, akeju ateꞌ tiꞌjele cytxꞌotxꞌ, ex mintiꞌ o ten cyipun tuꞌn cyweꞌ cywitz aj kꞌoj. 15 Tcyakil maj tej cyxiꞌ aj Israel kꞌojlel cyiꞌj aj kꞌoj cyiꞌj, ax te Kman oc ten kꞌojlel cyiꞌj aj Israel, ex mya baꞌn eꞌla te cye ic tzaꞌnx otok tma Kman cye.
Masque tzaj nim yajbil cyiꞌj aj Israel, 16 pero ax icx e jaw t-scꞌoꞌn Kman ke xjal tuꞌn cyoc te nejenel cye, tuꞌntzun cyclet tuj cykꞌab ke elekꞌ in che oc tzokpaj cyiꞌj. 17 Atzun cye aj Israel mintiꞌ xi cyniman ke nejenel cye, nok oꞌcx cyaj cycolin Kman ex e oc ten cꞌulul cywitz junxitl dios. Ke cyxeꞌchel otok txi cyniman ke tmandamyent Kman, atzun cye mintiꞌ o cybincha ic tzaꞌn otok cybincha ke cyxeꞌchel. 18 Tcyakil maj oc tjaw t-scꞌoꞌn Kman jun nejenel cye, ax te Kman o tzꞌonin te, ex tuj tkꞌijlalil junjun nejenel in che colpet aj Israel tuj cykꞌab aj kꞌoj cyiꞌj, porque tzaj kꞌakꞌan tcꞌuꞌj Kman cyiꞌj tej cyjaw ayayan tuꞌn taꞌw yajbil nnicꞌx cyuꞌn. 19 Pero octzun tcyim ju nejenel cye, in che octzun ten juntl maj binchalte mya baꞌn, ex masxix nim mya baꞌn in cybinchaꞌn ic tzaꞌn cye cyxeꞌchel, porque e oc lpeꞌ cyiꞌj junxitl dios, e ajben cye ex e cꞌulun cywitz. Mintiꞌ cyaj cycolin tuꞌn cybinchante mya baꞌn, ex e oc miban che bin. 20 Tuꞌntzun jlu tzaj nimxix tkꞌoj Kman cyiꞌj aj Israel ex tma: Ke xjal lu mintiꞌ ma japun cyuꞌn aju yol cyaj bant tiꞌj wuꞌne cyucꞌil ke cyxeꞌchel, ex cycꞌiꞌ che niman weye; 21 tuꞌntzun jlu mlay che icꞌ nlajoꞌne ke xjal cywitz, akeju mintiꞌ e icꞌ tlajoꞌn Josué tej naꞌnxtok tcyim, chi Kman. 22 Tbincha Kman icju tuꞌn cyoc aj Israel tuj malbil tuꞌn, ex tuꞌn tel tnicꞌ tiꞌj ka tuꞌn cyoc lpeꞌ tiꞌj ic tzaꞌn otok cybincha ke cyxeꞌchel. 23 Cyjaꞌtzun mintiꞌ e jicꞌ tlajoꞌn naj ke xjal cyuj tnam, akeju mintiꞌ cub cyiꞌj tuꞌn Josué; nok oꞌcx ax e cyaj ten tuꞌn Kman tuj cylugar.