Ke tnam xjal ax e cyaj ten tuj txꞌotxꞌ Canaán
3
Atzun ke tnam jlu e cyaj tkꞌoꞌn Kman tuj txꞌotxꞌ tuꞌntzun cyoc tkꞌoꞌn aj Israel tuj malbil, akeju naꞌnxtok cyitzꞌj tej toc kꞌoj tiꞌj txꞌotxꞌ Canaán tuꞌn ttzyet. 2 E cyaj tkꞌoꞌn Kman ke tnam lu tuꞌntzun tbant cykꞌojin keju bajxtok che ten tuj kꞌoj. 3 E cyaj ten jweꞌ nejenel cye aj Filistey, cyucꞌix cycyakil aj Canaán, aj Sidón ex aj Hevey. Ke aj Hevey atzun najltok ke cywiꞌ ke witz Líbano, xiꞌynix twi witz Baal-hermón ex ponin baj max jatum in xiꞌ be tuꞌn tpon tuj tnam Hamat. 4 Ex cyiꞌjtzun ke xjal lu, tuꞌn cyoc aj Israel tuj malbil tuꞌn Kman tuꞌntzun tel tnicꞌ tiꞌj ka tuꞌn t-xi cyniman ke tmandamyent aju otok txi tkꞌoꞌn Moisés cye cyxeꞌchel. 5 Cyjaꞌtzun tten e najan aj Israel cyxol ke xjal lu: Ke aj Canaán, ke aj Hetey, ke aj Amorrey, ke aj Ferezey, ke aj Hevey ex ke aj Jebusey, 6 ex atzun ke cycyꞌajal ex ke cymeꞌjel aj Israel e jaw mojeꞌ cyucꞌil cycyꞌajal ex cymeꞌjel ke xjal najlke cyuj ke tnam lu. Ax icx e oc ten aj Israel cꞌulul cywitz ke cydios xjal lu.E clet aj Israel tuꞌn Otoniel tuj tkꞌab Cusan-risataim
7 Aju cybinchben aj Israel mya baꞌn eꞌla tuj twitz Kman, porque icꞌ tnaꞌl Kman Dios cyuꞌn, ex e cꞌulun cywitz tilbilal Baal ex tilbilal Astarté. 8 Tuꞌntzun jlu tzaj tkꞌoj Kman cyiꞌj ex e jeꞌx tkꞌoꞌn tuj tkꞌab Cusan-risataim aju rey te Mesopotamia. Wajxak abkꞌi o che ajben aj Israel te Cusan-risataim. 9 Tejtzun cyoc ten cubsal cywitz te Kman, jawtzun t-scꞌoꞌn Kman jun clol cye, Otoniel tbi, aju tcyꞌajal Cenaz; ate Cenaz titzꞌin Caleb. 10 Tzaj kꞌoꞌn tipumal Otoniel tuꞌn T-xew Kman, ex oc te nejenel cyxol aj Israel, xiꞌtzun tuj kꞌoj ex tzaj kꞌoꞌn Cusan-risataim tuj tkꞌab tuꞌn Kman, ex cub tiꞌj tuꞌn. 11 Tbajlenxi jlu o che ten aj Israel tuj txubtxaj 40 abkꞌi. Te tibajxi cyimtzun Otoniel.
E clet aj Israel tuꞌn Aod tuj cykꞌab aj Moab
12 E octzun ten aj Israel juntl maj binchal mya baꞌn twitz Kman; cyjaꞌtzun xi tkꞌoꞌn Kman tipumal Eglón aju rey cye aj Moab tuꞌn tkꞌojin cyiꞌj aj Israel. 13 O bant tiꞌj jun tyol Eglón cyucꞌil aj Amón ex cyucꞌil aj Amalec, e oc tzokpaj cyiꞌj aj Israel, ex tzyet cyuꞌn aju tnam toc tbi Tkan Xaꞌj. 14 Wajxaklaj abkꞌi e ajben aj Israel te rey Eglón. 15 Tejtzun cyoc ten cubsal cywitz te Kman, jawtzun t-scꞌoꞌn Kman jun clolte cye, Aod tbi, aju tcyꞌajal Gera ex tiyjil Benjamín, ex tuꞌn tnayaj Aod baꞌn tzꞌakꞌnan.
At jun kꞌij xi cysamaꞌn aj Israel Aod kꞌolte chojenj te rey Eglón. 16 Otok baj tbinchaꞌn Aod jun spad te cabe pacꞌ ttziꞌ, te mey var tkan, ex oc tcꞌaloꞌn tcꞌuꞌj tujxi tcapiẍay tuj tbankꞌab, 17 ex xiꞌtzun kꞌolte chojenj tucꞌil rey Eglón. Ate Eglón puro gord wen. 18 T-xilenxi tkꞌoꞌn Aod chojenj te rey Eglón, etztzun cyucꞌil ke tucꞌil ucꞌin, 19 pero tej tpon tuj lugar jatum ateꞌ ke tilbilal nnoꞌc cydiosin xjal, aju tcubsaꞌn nikayin ttxlaj lugar Gilgal, aj meltzꞌaj Aod juntl maj jatum taꞌtok rey Eglón ex xi tmaꞌn te cyjaꞌ:
—At jun tkanil kꞌiꞌn wuꞌne te teya, Tat Rey, pero aju tkanil lu tuj ewaj cxel nmaꞌne teya.
Xitzun tmaꞌn rey cye ke xjal in che ajbentok ttxlaj tuꞌn miꞌn cykꞌajt, ex tuꞌn cyex txaꞌn peꞌn. 20 Tejtzun tcyaj ten Aod junx te tucꞌil Eglón, kꞌukltok Eglón tuj jun tal ja jatum in ojlan tuꞌn taꞌw cyak, pon lakꞌeꞌ Aod ttxlaj ex xi tmaꞌn te cyjaꞌ:
—Aju tkanil kꞌiꞌn wuꞌne te teya, tuꞌn Dios ma tzaj tmaꞌn.
Tejtzun tbinte Eglón jlu, jawtzun weꞌ tuj tkꞌukbil. 21 Jatztzun tiꞌn Aod t-spad tuꞌn tnayaj, aju cꞌalontok tcꞌuꞌj tuj tbankꞌab, ex xi t-xayuꞌn tuj tcꞌuꞌj Eglón. 22 Cyuwxix xi t-xayuꞌn wen, mya oꞌcx te spad ocx baj, ax icx tucꞌix tkan spad xi baj, ex mintiꞌ cyaj malecj spad tuꞌnju puro gord te Eglón, ex mintiꞌ etz tiꞌn Aod spad tuj tcꞌuꞌj Eglón. 23 Te tibajxi etz tlamoꞌn Aod ke tpwertil ja ex biꞌx cyaj tkꞌoꞌn cyal.
24 Tej otok tzꞌex Aod, e pontzun ke xjal in che ajbentok ttxlaj rey, ex tej tcyil lamoꞌntok ja, cub cyximan ka txaꞌl te rey otok txiꞌ, ex cyjaꞌtzun otok tzꞌetz tlamoꞌn ja jatum in ojlantok tuꞌn taꞌw cyak. 25 Pero tuꞌnju nim tuj e ayon, tzajtzun cybis tej cyqueꞌyinte mixtok tuꞌn tetz rey. Tzajtzun cyiꞌn tal ja, ex tejtzun tjaket ja cyuꞌn, o cyil lu cypatrón palch tcub twitz txꞌotxꞌ cyimnitok.
26 Acux in che ayontok ke xjal lu, ate Aod otok tzꞌel ok, ex texlenxi tuj lugar jatum ateꞌ ke tilbilal nnoꞌc cydiosin xjal, pon tclon tib tuj lugar Seirat. 27 Tejtzun tpon tuj lugar lu, oc tkꞌajtzaꞌn jun chun tuj tiwitz txꞌotxꞌ cye aj Efraín te txocbil cye aj Israel, ex cycyakiltzun ul cychmon cyib tucꞌil, ex e oc lpeꞌ tiꞌj tej cycuꞌtz tcꞌuꞌj witz. 28 Xi tmaꞌn Aod cye:
—Che lpeque wiꞌje porque ate Kman ctzajel kꞌonte ke aj kꞌoj kiꞌj tuj kkꞌab, akeju aj Moab.
E octzun lpeꞌ tiꞌj, e tzyet ke lugar cyuꞌn jatum ateꞌ ke xajbil aꞌ te nima Jordán, ex mi jun icꞌx cytzokpiꞌn tuꞌn ticꞌx jlajxi. 29 Tuj tyemp lu cub cybyoꞌn laj mil xinak aj Moab, cycyakil ke jlu at nim cyipun ex cyuw cycꞌuꞌj tuj kꞌoj, ex mi jun cye o cyaj ankꞌin. 30 Cyjaꞌtzun tten o cub cyiꞌj aj Moab cyuꞌn aj Israel. Te tibajxi jlu o che ten aj Israel tuj txubtxaj 80 abkꞌi.
E clet aj Israel tuꞌn Samgar tuj cykꞌab aj Filistey
31 Aju juntl nejenel oc te tibajxi Aod, atzun Samgar aju tcyꞌajal Anat. Cub tbyoꞌn Samgar kak syent aj Filistey tuꞌn jun puy. Ax icx te o che clet aj Israel tuꞌn.