Cub tiꞌj Sísara tuꞌn Débora ex tuꞌn Barac
4
Tcyimlenxitzun Aod, e oc ten aj Israel juntl maj binchal mya baꞌn twitz Kman. 2 Cyjaꞌtzun tten e jeꞌx tkꞌoꞌn Kman ke aj Israel tuj tkꞌab Jabín tuꞌn tcawin cyibaj. Ate Jabín jun rey cye aj Canaán in cawintok tuj tnam Hazor. Aju nejenel cye t-soldad, Sísara tbi, ex atzun najl tuj tnam Haroset-goim. 3 Ate Jabín attok belaj syent tcarwaj cꞌuxbil ke, ex tuj winkin abkꞌi e yajlanjtz aj Israel tuꞌn cyuwxix wen. Maxitzun e oc ten aj Israel cubsal cywitz te Kman tuꞌn cytzaj onin tuꞌn.4 Tuj tkꞌijlalil lu, toctok Débora aju t-sanjel Dios ex t-xuꞌjil Lapidot te cawil cyxol aj Israel. 5 Atzun in cub keꞌ Débora tjakꞌ jun wiꞌ tkan xaꞌj aju toc tbi tkan xaꞌj te Débora, ex atzun in che pon aj Israel binchalte tiꞌj cyxtis tucꞌil. Aju lugar lu atzun taꞌ cyxol tnam Ramá tucꞌil tnam Betel, tuj tiwitz txꞌotxꞌ cye aj Efraín.
6 At jun kꞌij xi txocbaj Barac aju tcyꞌajal Abinoam tuꞌn Débora. Ate Barac najltok tuj tnam Cedes cyxol tiyjil Neftalí, ex xi tmaꞌn Débora te Barac cyjaꞌ:
—Ate Kman aju Cydios aj Israel in tmaꞌn teya tuꞌn tbaj tchmoꞌna laj mil xinak cyxol tiyjil Neftalí ex cyxol tiyjil Zabulón, ex cyxiꞌtzune twi witz Tabor. 7 Wuꞌne ctzajel wiꞌne Sísara aju nejenel cye t-soldad Jabín, tuꞌn tul tuj tkꞌab xak Cisón, cyucꞌix ke tcarwaj ex ke t-soldad, tuꞌntzun toc tzokpaj kꞌojlel tiꞌja. Pero che tzajel nkꞌoꞌne tuj tkꞌaba tuꞌn tcub cyiꞌj tuꞌna, chi Dios teya, chi Débora.
8 —Jacu chinxe pero ka ma txiꞌya wucꞌile, ex katzun mi ma txiꞌya, ax mlay chinxe, chi Barac xi ttzakꞌweꞌn.
9 —Jacna chinxe tucꞌila, pero oc tcub cyiꞌj aj kꞌoj tuꞌna mya teya cxel kꞌoꞌn nimbil, porque tuj tkꞌab jun xuꞌj tzul kꞌoꞌn Sísara tuꞌn Kman tuꞌn tcub tiꞌj, chi Débora, xi ttzakꞌweꞌn.
Xiꞌtzun Débora tucꞌil Barac tuj tnam Cedes. 10 E tzajtzun ttxcoꞌn Barac ke tiyjil Zabulón cyucꞌix ke tiyjil Neftalí tuj tnam Cedes, ex baj tchmoꞌn laj mil xinak tuꞌn cyxiꞌ kꞌojlel tucꞌil; ex tucꞌix Débora xiꞌ cyucꞌil.
11 At jun xinak aj Quenit Heber tbi, otok tzꞌel tpaꞌn tib cyiꞌj mastl aj Quenit akeju tiyjil Hobab aju tjiꞌ Moisés. Atzun tcubsaꞌntok tja, xbalun ja, nikayin ttxlaj tnam Cedes, ttxlaj tkan cꞌol tuj lugar Zaanaim tbi. 12 Tejtzun tbinte Sísara ka otok jax Barac aju tcyꞌajal Abinoam twi witz Tabor, 13 bajtzun tchmoꞌn belaj syent tcarwaj cꞌuxbil cyucꞌix cycyakil ke t-soldad, ex tzyet be cyuꞌn tuj Haroset-goim tuꞌn cypon max tuj tkꞌab xak Cisón. 14 Xitzun tmaꞌn Débora te Barac cyjaꞌ:
—Chux txiꞌya, porque ma pon or tuꞌn ttzaj kꞌoꞌn Sísara tuj tkꞌaba tuꞌn Kman, tuꞌn tcub tiꞌj tuꞌna, ex ya ma cub nej Kman twitza.
Cuꞌtztzun Barac twi witz Tabor cyucꞌix laj mil t-soldad lepchoꞌc tiꞌj. 15 Tejtzun ttzyet tkꞌojin Barac cyiꞌj, e baj secꞌpaj ke t-soldad Sísara tuꞌn Kman ex e bjeꞌl sputj cycyakil cyucꞌix ke cycarwaj; ax icx te Sísara cuꞌtz tuj tcarwaj ex el ok. 16 Atzunte Barac cyucꞌix ke t-soldad e oc lpeꞌ cyiꞌj ke t-soldad Sísara ex cyiꞌj ke cycarwaj, tuꞌn cykꞌojin cyiꞌj, tejxi cypon tuj tnam Haroset-goim. Tuj kꞌij lu mi jun t-soldad Sísara cyaj ankꞌin, cycyakil e baj cyim.
17 Atzunte Sísara el ok tuꞌn tpon tclon tib max tja Jael aju t-xuꞌjil Heber aju aj Quenit, porque baꞌntok cyten Jabín aju rey te Hazor cyucꞌil keju ateꞌ tuj tja Heber. 18 Etztzun Jael canul tiꞌj Sísara ex xi tmaꞌn te:
—Tzaja tzalu, tat, tzaja wucꞌile; miꞌn xoba.
Ocxtzun Sísara tuja ex cub tkꞌoꞌn Jael jun xbalun tibaj. 19 Xitzun tkanin Sísara chꞌin tcꞌa aꞌ te Jael porque attok nim txketleꞌn tiꞌj; atzunte Jael jaw tjakoꞌn ttzi bols tzꞌuꞌm jatum cꞌuꞌn lech, ex xi tkꞌoꞌn te tcꞌa; te tibajxi cyaj mukꞌan juntl maj Sísara tuꞌn. 20 Xitzun tmaꞌn Sísara te Jael:
—Weꞌcuya ttzi ja xbalun, ex ka at jun xjal ma tzul ex ka ma tzaj tkanin teya ¿kape at jun xjal at tzalu?, ka chi: Mintiꞌ, chicuya.
21 Pero otok sict Sísara wen, cyjaꞌtzun, biꞌx tzyet tcꞌuꞌj tuꞌn watl. Atzunte Jael tzaj tiꞌn jun pajbil, tucꞌix jun piẍ tzeꞌ aju in ajben te stac tuꞌn ttzaj kitzꞌet ttxaꞌn xbalun ja tiꞌj, chebatzun pon lakꞌeꞌ xuꞌj ttxlaj Sísara, ex akꞌpontzun tpajoꞌn stac t-xe t-ẍcyin ex biꞌx cupun twitz txꞌotxꞌ. Cyjaꞌtzun tten cyim Sísara. 22 Tej in jyontok Barac tiꞌj Sísara, etz naj Jael canul tiꞌj ex xi tmaꞌn te:
—Tzaja tzalu ex cxel nyecꞌune teya aju xinak in jyona tiꞌj.
Ocxtzun Barac tuj ja xbalun, ex cnet Sísara tuꞌn palch twitz txꞌotxꞌ, ya otok cyim, tucꞌix stac xiꞌyni pajoꞌn t-xe t-ẍcyin.