3 Cybintze nyole akeye rey. Chin cybintze akeye cawil. Chin bitzale te Kman. Chin bitzale te Cydios aj Israel.

4 Nman, tej tcuꞌtza twi witz Seir, tej ticꞌa tuj txꞌotxꞌ Edom, biꞌx tzaj luꞌlun txꞌotxꞌ, ex nim jbal tzaj twitz cyaꞌj; tzaj tchitun muj nim jbal.

5 E tzaj luꞌlun ke witz twitz Kman, ex tzaj luꞌlun witz Sinaí twitz Kman aju Cydios aj Israel.

6 Tuj tkꞌijlalil Samgar aju tcyꞌajal Anat, ex tuj tkꞌijlalil xuꞌj Jael, ke betin xjal cyaj cycolin ke ninbe ex tuj xpatxun be xobajilxix e bet.

7 Ke aldey cyxol aj Israel e cyaj colin te jumajx. Ex maxitzun in jaw weꞌye, akine Débora, tuꞌn woque te txubaj cye aj Israel.

8 At junjun jaw cyscꞌoꞌn juntl cydios, ex tuꞌntzun jlu e ul aj kꞌoj kꞌojlel ttzi tlamel tnam, pero cyxol 40 mil xinak aj Israel misicyer jun makbil te colbil ex mi jun lans te kꞌojbil kꞌiꞌn cyuꞌn.

9 At ncꞌuꞌje cyiꞌj ke nejenel ateꞌ cyxol aj Israel, ex cyiꞌj keju cyuꞌnx in xi cykꞌon cyib tuꞌn cyxiꞌ tuj kꞌoj. Cynimsaꞌnctze tbi Kman cycyakile.

10 Akeye in che bete cyibaj ke ttxu bur sak cyiꞌj; akeye in che cub keꞌye tibaj jun xbalun tbanilxix ex pim; ax icx cyeye, akeye betin xjal, che ximane tiꞌj jlu:

11 Ma jatum taꞌ cycꞌabl wacẍ aꞌ, matzun in che kꞌajt ke xjal xoꞌl plech, in nimsanjtz tbi Kman tuꞌnju ma camban cyiꞌj aj kꞌoj; ex ma camban Kman cyuj ke aldey cye aj Israel. Entons baꞌn tuꞌn cypon ke xjal etzan tuꞌn Dios ttzi tlamel cytanmi.

12 Kꞌimel twatla Débora, kꞌimel twatla ex bitzanxa jun tbitza. Atzun teya Barac tcyꞌajal Abinoam, weꞌctza, ex kꞌinxa ke xjal ma che tzyet tuꞌna tuj kꞌoj.

13 E cuꞌtztzun aj Israel otok che cyaj ten, tuꞌn cykꞌojin cyiꞌj ke xjal maꞌ cyoclen; e cuꞌtz ke xjal etzan tuꞌn Dios, ex cyuw cycꞌuꞌj tuꞌn cykꞌojin cyiꞌj xjal at nimxix cyipun.

14 At junjun xinak cyxol tiyjil Efraín e tzaj tuj txꞌotxꞌ jatum otok che ten aj Amalec nej, ex cyiꞌjx ke jlu e jeꞌx lpeꞌ ke soldad aj Benjamín. Cyxol tiyjil Maquir e cuꞌx ke nejenel, atzun cyxol tiyjil Zabulón e cuꞌx ke cawil.

15 Cyucꞌix ke nejenel cyxol tiyjil Isacar e jeꞌx tucꞌil Débora, ex e jeꞌx lpeꞌ tiꞌj Barac tuꞌn cycuꞌpun tuj chkꞌajlaj. Cyxol elaꞌ cꞌloj tiyjil Rubén nok e cub ten ximal tiꞌj tuꞌn cyxiꞌ.

16 ¿Tikuꞌntzun ma che cyaj ten cyxol cypeꞌn ẍneꞌl, in che bin cyiꞌj ke pastor in che txocon cyiꞌj cyẍneꞌl? Cyxol elaꞌ cꞌloj tiyjil Rubén nok e cub ten ximal tiꞌj.

17 Ke aj Galaad max e cyaj ten jlajxi nima Jordán, ex ke tiyjil Dan ax e cyaj ten jatum ateꞌ ke barc, atzun ke tiyjil Aser max e cyaj ten tuj cytanmi ma ttzi mar, ex mintiꞌ e yucch tuj cylugar.

18 Atzun ke tiyjil Zabulón ex ke tiyjil Neftalí xi cykꞌon cyib tuꞌn cycyim tej cykꞌojin twi witz tuj cojbil.

19 E ultzun ke rey tuꞌn cykꞌojin, e ultzun ke cyrey aj Canaán tuj Taanac aju tcub ttzi tkꞌab xak tuj chkꞌajlaj Meguido, ex e kꞌojin, pero mintiꞌ o cycamba sak pwak ex mi kꞌinumabl.

20 Max twitz cyaꞌj ex max jatum in che bet ke cheꞌw twitz cyaꞌj, e oc ten ke cheꞌw kꞌojlel tiꞌj Sísara;

21 cycyakil aj kꞌoj e baj naj tuꞌn tkꞌab xak Cisón, ojtxi tkꞌab xak aju tkꞌab xak Cisón. Aya wanmi kꞌoncu beya tucꞌil nim tipumala.

22 Nbocꞌin t-xiꞌ cykan chej nim cyipun oc in che kelan wen.

23 Ex chi t-anjel Kman tma: E tcub tzꞌak jun nintz castiw tibaj aldey Meroz ex cyibaj ke xjal najlke tuj, tuꞌnju mintiꞌ e tzaj onil te Kman tuꞌn tkꞌojin cyiꞌj ke xjal cyuw cycꞌuꞌj tuj kꞌoj.

24 Atzunte Jael aju t-xuꞌjil Heber aju aj Quenit, cyꞌiwlaꞌnxwit cyxol mastl xuꞌj, cyꞌiwlaꞌnxwit xuꞌj lu cyxol ke mastl xuꞌj najlke cyuj ja xbalun.

25 Aꞌ xi tkanin Sísara te tcꞌa; atzunte Jael lech xi tkꞌoꞌn te. Tzotz twitz lech xi tkꞌoꞌn tuj jun vas tbanilxix.

26 Tzaj tiꞌn jun stac tuꞌn tnayaj ex tzaj tiꞌn jun pajbil tuꞌn tbankꞌab; akꞌpontzun tpajoꞌn stac t-xe t-ẍcyin Sísara, o xoptzꞌaj twiꞌ ex biꞌx elpun stac tuj juntl plaj twiꞌ.

27 T-xe tkanx Jael xi t-ẍocon tib Sísara; tej t-xi t-ẍocon tib tuꞌn taꞌw twiꞌ cub tzꞌak twitz txꞌotxꞌ, ex axtzun jatum cub tzꞌak axtzun cyim.

28 In bisuntok ttxu Sísara tiꞌj, etz tqueꞌyin ttzi ventan ex tma: ¿Tikuꞌn ntzꞌininx tzul tcarwaj wale? ¿Ex tikuꞌn naꞌnx cykꞌajt cyrwed carwaj in che ajben tuj kꞌoj? Chi ttxu Sísara.

29 Ke xuꞌj aj nabl ateꞌ tucꞌil in cymaꞌntok, ax icx te ttxu Sísara in ximantok tiꞌj cyjaꞌ:

30 Ax toc malo in cub cysipan ke tiꞌxti aju ma cycamba cyiꞌj ke xjal tuj kꞌoj, junlo kꞌapoj ex ka cabe ma tzꞌoc te junjun soldad, ex telo Sísara ma tzꞌoc ju xbalun aju at nim tilbilal toc tiꞌj; ke xbalun elaꞌ tilbilal toc cywitz, aju junxilchak tilbilal cywitz junjun pacꞌ, junlo xbalun ex ka cabe ma tzꞌoc te junjun nejenel, akeju ma tzꞌel cyiꞌn cycyakil tiꞌxti cye aj kꞌoj, chilo ttxu Sísara.

31 Cyjaꞌwt che tenba cycyakil ke aj kꞌoj tiꞌja Nman; atzun keju in che cꞌujlan teya, icwit che oc ic tzaꞌn tkan kꞌij oc in jawil koptzꞌaj, chi Débora tuj tbitz.