Txconjtz Gedeón tuꞌn Dios
6
E oc ten aj Israel juntl maj binchal mya baꞌn twitz Kman, ex tuj wuk abkꞌi e jeꞌx kꞌoꞌn tuꞌn Kman tuj cykꞌab aj Madián tuꞌn cycawin cyibaj. 2 Tuꞌnju cyuw in che yajlantok aj Madián cyiꞌj aj Israel, cyjaꞌtzun tzaj cyxobil aj Israel cywitz aj Madián, ex e jax ewal cyib tuj cypaxil witz ex cyuj toyꞌ pic ex cyuj ke lugar mas cyuw tuꞌn cycnet. 3 Tcyakil maj oc tcuꞌx cyawaꞌn aj Israel cyawal, in che ul aj ke aj Madián, ke aj Amalec ex ke xjal najlke tuj tjawitz kꞌij elkꞌalte twitz cyawal. 4 Oc in che pon ke xjal lu tuj cytxꞌotxꞌ aj Israel, in baj naj twitz cyawal aj Israel cyuꞌn, ex max in che pon ẍticꞌal tuj lugar Gaza. Misicyer cywa aj Israel in cyaj cycloꞌn, ex mi jun cyẍneꞌl, mi jun cywacẍ ex mi jun cychej bur in cyaj cykꞌoꞌn. 5 Oc in che pon cyucꞌix ke cyalun in cub cykꞌoꞌn cyja xbalun, ex tcyakil in baj naj cyuꞌn tuj tcyakil cytxꞌotxꞌ aj Israel. Nim cybaj oc cypon cyucꞌix ke cychej camey, mer ic tzaꞌn txkan ẍplon. 6 Tuꞌn cylaj ke aj Madián, e oc ke aj Israel puro tal yaj; cyjaꞌtzun e oc ten cubsal twitz Kman tuꞌn cytzaj onin tuꞌn.7 Tej cyoc ten aj Israel kanil onbil te Kman tuꞌn cyclet tuj cykꞌab aj Madián, 8 tzajtzun t-samaꞌn Kman jun t-sanjel ex tma cye cyjaꞌ: Chi Kman Dios cyjaꞌ: Akine etz kꞌinte cyeye tuj Ejipt jatum ateꞌtoke te majen; 9 mya nok oꞌcx e clete wuꞌne tjakꞌ cycawbil aj Ejipt, ax icx e clete wuꞌne tjakꞌ cycawbil cycyakil keju e yajlante cyeye. Cywitzxe e bjeꞌx nlajoꞌne ke xjal tuj txꞌotxꞌ lu ex xitzun nkꞌoꞌne cytxꞌotxꞌ te cyeye. 10 Ex xi nmaꞌne cyeye cyjaꞌ: Akine Cymane Dios: Miꞌn che cꞌulune cywitz cydios aj Amorrey jatum najlkeye jaꞌlo, nchiye, pero atzun cyeye mintiꞌ ma txi cynimane nyole, chi Dios, chi t-sanjel.
11 Ultzun t-anjel Kman ex cub keꞌ tjakꞌ tzeꞌ cꞌol tuj tnam Ofra. Aju tzeꞌ lu te Joás aju tiyjil Abiezer. Ex lu te Gedeón aju tcyꞌajal Joás in xupintok tuj triw tuj ewaj tuj lugar jatum nneꞌl yatzꞌoꞌn taꞌl twitz uva, tuꞌntzun miꞌn tilwaj cyuꞌn aj Madián. 12 Cubtzun tyecꞌun tib t-anjel Kman twitz Gedeón ex xi tmaꞌn te cyjaꞌ:
—A Kman at tucꞌila, aya xinak at nim tipuna ex cyuw tcꞌuꞌja tuj kꞌoj.
13 Atzunte Gedeón xi ttzakꞌweꞌn:
—Tat, ka a Kman at kucꞌile, ¿tikuꞌntzun ma tzaj tcyakil mya baꞌn lu kiꞌje? ¿Jattzun ke binchben maꞌ cyxilen, akeju in che yolin ke kmane tiꞌj, oc in cymaꞌn ka a Kman etz kꞌinte keye tuj Ejipt? Ma ko cyaj coline tuꞌn Kman, ex ma koꞌx kꞌoꞌne tuj cykꞌab aj Madián tuꞌn cycawin kibaje. 14 Tzajtzun tqueꞌyin Kman tiꞌj Gedeón ex tma:
—Tuꞌnju tipuna at, txiꞌya colpil cye aj Israel tjakꞌ cycawbil aj Madián. Akine in chinx samante teya.
15 Atzunte Gedeón xi ttzakꞌweꞌntl:
—Tat, pero ¿tzaꞌn tten tuꞌn cyclet aj Israel wuꞌne? Ke xjal at nxilene cyucꞌil atzun ke mas tal yaj ke cyxol tiyjil Manasés, ex akine mas chꞌin woclene cywitz ke mastl wermaniye.
16 Atzunte Kman tzaj ttzakꞌweꞌn:
—Cbantel tuꞌna porque akine chin tele tucꞌila. Cbel cyiꞌj aj Madián tuꞌna mer ic tzaꞌn oc in cub tiꞌj junx xjal.
17 Xitzun tmaꞌn Gedeón te:
—Ka ma ncambaye xtalbil teya, yecꞌuntza jun techal weye, tuꞌntzun tel nnicꞌe tiꞌj ka axix toc aya in yolin wucꞌile. 18 Binchama xtalbil, miꞌn tzicꞌ naja tzalu, chin tayoma ocxi wule tucꞌil jun oyaj waje txi nkꞌoꞌne teya.
Atzunte Kman tzaj ttzakꞌweꞌn:
—Chin ayole tiꞌja tzalu ocxi tul meltzꞌaja.
19 Xiꞌtzun Gedeón, cub tbyoꞌn jun tal chip ex baj ttzkꞌajsaꞌn; ax icx baj tbinchaꞌn ke pan mintiꞌ t-samel tuj tuꞌn tjaw mal tcꞌuꞌj tuꞌn jun arrob arin, cuꞌxtzun tkꞌoꞌn chibj tuj jun chiꞌl, atzun taꞌl chibj cuꞌx tkꞌoꞌn tuj jun cꞌil, ex xitzun tiꞌn tcyakil max jatum taꞌ tzeꞌ cꞌol. 20 Atzunte t-anjel Dios xi tmaꞌn te Gedeón: Kꞌoncuya chibj tibaj pic lu, tucꞌix pan mintiꞌ t-samel tuj, ex konxa taꞌl chibj tibaj, chi. Tbinchatzun Gedeón icju. 21 Atzunte anjel oc tkꞌoꞌn twi tcyꞌakoꞌch tiꞌj chibj ex tiꞌj pan, ex tujtzun pic etz koptzꞌaj kꞌakꞌ; biꞌx baj tzꞌeꞌy chibj ex pan tuꞌn, ex cubtzun naj ju t-anjel Kman twitz Gedeón. 22 Tejtzun tel tnicꞌ Gedeón tiꞌj ka t-anjel Kman jlu, o xob wen ex tma:
—Aya Nman Dios, acu t-anjela ma wile.
23 Atzunte Kman tzaj ttzakꞌweꞌn:
—Miꞌn xoba porque mlay cyima. Keꞌ tcꞌuꞌja.
24 Jawtzun tbinchaꞌn Gedeón jun altar te Kman ex oc tkꞌoꞌn tbi altar cyjaꞌ: “Ate Kman kꞌukbalte kcꞌuꞌj.” Aju altar jaw tbinchaꞌn Gedeón ax taꞌ jaꞌlo tuj tnam Ofra, aju cytanmi tiyjil Abiezer.
25 Ax konicꞌan jlu tzaj tmaꞌn Kman te Gedeón:
—Kꞌintza jun tor cyxol ke twacẍ tmana, aju tcabin tor te wuk abkꞌi, ex kꞌuchin cuba t-altar Baal aju te tmana, ex txꞌemin jawa tzeꞌ aju tilbilal xuꞌj dios Asera aju tcub junx tucꞌil altar te Baal. 26 Binchan jawa jun altar te weye aju Tdiosa max twi pic matij twaꞌl. Kꞌinxa ju tor, aju tcabin, ex patun cuba te jun chojbil, ex ax ju tzeꞌ aju tilbilal xuꞌj dios Asera aju otok jaw ttxꞌemina, cꞌajbel tuꞌna te siꞌ tuꞌn tcub patit chojbil.
27 E tzajtzun tiꞌn Gedeón laj tmajen ex tbincha ic tzaꞌnx otok tma Kman te; nok oꞌcx mintiꞌ tbincha kꞌijl sino konicꞌan, tuꞌnju in xob cywitz ke terman tman ex cywitz mastl xinak aj tnam. 28 Te prim tuj juntl kꞌij tej cyjaw weꞌ xjal aj tnam, lu t-altar Baal otok cub xitj, ax icx otok jaw txꞌemin aju tzeꞌ tilbilal xuꞌj dios Asera aju junx tcub ttxlaj altar, ex otok cub patun jun tor te chojbil tibaj acꞌaj altar. 29 In che xjelintok xjal cyxolx ex in cymaꞌn: ¿Alcye ma binchante jlu?
Tbajlenxi cyxjelin nim, o cybi ka tuꞌn Gedeón aju tcyꞌajal Joás otok bant jlu, ex xitzun cymaꞌn te Joás:
30 —Kꞌiꞌmetza tcyꞌajala porque il tiꞌj tuꞌn tcub kbyoꞌne, tuꞌnju ma cub t-xitun aju altar te Baal ex ma jaw ttxꞌemin ju tzeꞌ tilbilal xuꞌj dios Asera aju junx tcub ttxlaj altar, che chi xjal te Joás.
31 Atzunte Joás xi ttzakꞌweꞌn cye xjal cyjaꞌ:
—¿Maj che onile tiꞌj Baal? ¿Maj che colile tiꞌj? Nok alcye jun taj colin tiꞌj Baal, baꞌn tuꞌn tcyim naꞌnxtok kskix. Ka dios te Baal, cykꞌoncje tuꞌn tclonte tib tjunalx te, porque tetzun Baal aju altar ma cub xitun.
32 Atxixtzun tuj kꞌij lu oc kꞌoꞌn tbi Gedeón Jerobaal, ex in cymaꞌntok xjal cyjaꞌ: Baꞌn tuꞌn tclonte tib Baal te Gedeón. Cyma jlu tuꞌnju cub t-xitun Gedeón t-altar Baal.
33 Bajtzun cychmon cyib cycyakil aj Madián ex aj Amalec, cyucꞌix ke xjal najl tuj tjawitz kꞌij, e icꞌtz tuj nima Jordán ex atzun e cub ten tuj chkꞌajlaj Jezreel. 34 Pero ul T-xew Kman tucꞌil Gedeón, ex oc tkꞌajtzaꞌn Gedeón jun tcach ẍneꞌl tuꞌn toc cychmon cyib ke tiyjil Abiezer tucꞌil; 35 ax icx xi t-samaꞌn Gedeón ke sanjel txcol cye ke tiyjil Manasés, ke tiyjil Aser, ke tiyjil Zabulón ex ke tiyjil Neftalí, tuꞌn cytzaj ex tuꞌn toc cychmon cyib tucꞌil.
36 Xitzun tmaꞌn Gedeón te Dios: Ka axix toc chin ajbele tuꞌna tuꞌn cyclet aj Israel ic tzaꞌnx ma tmaya, 37 cbel nkꞌoꞌne jun ttzꞌumal ẍneꞌl tuj lugar jatum nneꞌl bujet triw. Katzun acꞌnaj tzꞌuꞌm tuꞌn tkꞌab cheꞌw oc tjawil kꞌij, ex atzunte txꞌotxꞌ puro tzkij, atzun cꞌelel nnicꞌe tiꞌj ka chin ajbele tuꞌna tuꞌn cyclet aj Israel ic tzaꞌnx ma tmaya.
38 Tbinchatzun Kman aju o tkani Gedeón. Tej tjaw weꞌ Gedeón te prim, el tyatzꞌoꞌn aꞌ tiꞌj tzꞌuꞌm, ex jun lak bant tkꞌab cheꞌw tej tel yatzꞌoꞌn tiꞌj tzꞌuꞌm. 39 Pero xi tmaꞌn Gedeón juntl maj te Dios: Miꞌn tzaj tkꞌoja wiꞌje tuꞌnju cucx in chin wuline tiꞌja; nok juntl techal waje tuꞌn tbant. Atzun jaꞌlo binchama tuꞌn miꞌn tacꞌ tzꞌuꞌm, ex atzunte txꞌotxꞌ e ttꞌakeꞌ tuꞌn tkꞌab cheꞌw, chi Gedeón.
40 Tuj konicꞌan lu bant tuꞌn Dios icju. Tujtzun juntl kꞌij te prim, aju tzꞌuꞌm puro tzkij taꞌ, ex atzunte txꞌotxꞌ puro nojni tibaj tuꞌn tkꞌab cheꞌw.