2 Xitzun tmaꞌn Kman te Gedeón: Nim xjal ucꞌin tuꞌna, ex ka ma cheꞌx nkꞌoꞌne ke aj Madián tuj cykꞌab tuꞌn tcub cyiꞌj cyuꞌn, jaculo bant tjaw cyniman cyib nwitze, ex jaculo cyma ka tuꞌn cyex cyipumal otok che clet. 3 Kꞌmanxa cye xjal cyjaꞌ: Alcye keju in che luꞌlun tuꞌn cyxobil, baꞌn tuꞌn cycuꞌtz twi witz Galaad ex tuꞌn cyaj cyja.

E ajtzun 22 mil xjal cyja ex nok laj mil e cyaj ten. 4 Pero tzaj tmaꞌntl Kman: Ax nim jlu. Kꞌinxa ke tuꞌn cycꞌan aꞌ, ex atzunwe kin chin oquel kꞌonte cye tuj malbil ma chixin, ex cxel nmaꞌne teya alcyeke che xeꞌl tucꞌila ex alcyeke miꞌn cheꞌx.

5 E jeꞌxtzun tiꞌn Gedeón ke xjal tuꞌn cycꞌan aꞌ, ex tzaj tmaꞌn Kman te cyjaꞌ: Paꞌn ela keju jatoꞌn in jatz cycꞌa aꞌ tuꞌn cykꞌab ex lekꞌan che cꞌan ic tzaꞌn txꞌyan, ax icx paꞌn ela keju in che cub ẍmejeꞌ tuꞌn cycꞌan aꞌ.

6 Ox syent bant cybet keju jatoꞌn jatz cycꞌa aꞌ tuꞌn tocx tuj cytziꞌ ex lekꞌan che cꞌan. Atzun ke mastl e cub ẍmejeꞌ tuꞌn cycꞌan aꞌ. 7 Tzajtzun tmaꞌntl Kman te Gedeón: Cyuꞌn keju ox syent xinak lu, akeju lekꞌan che cꞌan aꞌ, che cletele wuꞌne, ex che xel nkꞌoꞌne ke aj Madián tuj cykꞌabe tuꞌn tcub cyiꞌj cyuꞌne. Atzun ke mastl baꞌn tuꞌn cyaj cyja.

8 Xitzun tmaꞌn Gedeón cye mastl xjal tuꞌn cyaj cyja, pero naꞌnxtok cyaj tuꞌn tcyaj cykꞌoꞌn cywa ex ke tcach ẍneꞌl cye cyucꞌil. Oꞌcx keju ox syent xinak otok che jaw t-scꞌoꞌn e cyaj ten tucꞌil, ex e cubtzun ten max cyibajxi ke aj Madián akeju otok che cub ten tuj chkꞌajlaj.

9 Tujtzun konicꞌan lu tzaj tmaꞌn Kman te Gedeón: Weꞌctza ex tcuꞌxa tuꞌn toc tzokpaja cyiꞌj aj Madián, porque che xel nkꞌoꞌne tuj tkꞌaba tuꞌn tcub cyiꞌj tuꞌna. 10 Katzun at t-xobila tuꞌn toc tzokpaja cyiꞌj, baꞌn tuꞌn tcuꞌx naja tuj cycampament aj Madián tucꞌix Fura aju tmajena, 11 ex bina cyiꞌj ti in cymaꞌn, ex tuꞌntzun jlu oc tnaꞌya cꞌoquel mastl tipuna tuꞌn toc tzokpaja cyiꞌj.

Cuꞌxtzun Gedeón tucꞌix Fura aju tmajen max jatum cycub ke xkꞌukil, tiꞌjele cycampament aj kꞌoj. 12 Nojnitok tuj chkꞌajlaj cyuꞌn aj Madián, aj Amalec ex ke xjal te tjawitz kꞌij, mer ic tzaꞌn txkan ẍplon nim cybaj. Attok nim cychej camey, mer ic tzaꞌn ttxa tzꞌaꞌn ttzi mar. 13 Tejtzun tpon lakꞌeꞌ Gedeón nikayin tiꞌj lugar jatum cycub aj kꞌoj, o tbi lu jun soldad in kꞌmaꞌntok tiꞌj jun twitzicꞌ te juntl, ex chi cyjaꞌ:

—Ma tzꞌoc yecꞌun tuj nwitze lu jun pan sebad in tol toctz tuj kcampament, ex tej sul tzꞌak tiꞌj xbalun ja, biꞌx xcub tzꞌak xbalun ja tuꞌn.

14 Atzunte tucꞌil tzaj ttzakꞌweꞌn:

—A jlu mya tilo t-xilen; aju pan, atzun t-xilen t-spad Gedeón aju tcyꞌajal Joás aju aj Israel. Ate Dios cxel kꞌonte cye aj Madián tuj tkꞌab Gedeón, cyucꞌix cycyakil ke cyucꞌil, tuꞌn tcub cyiꞌj tuꞌn.

15 Tejtzun tbaj tbiꞌn Gedeón tzaꞌn tten witzic xi kꞌmaꞌn ex tzaꞌn tten pujbil tiꞌj, oc ten cꞌulul te Kman. Te tibajxi jlu aj meltzꞌaj Gedeón tuj cycampament aj Israel ex xi tmaꞌn cye:

—Che weꞌctze, porque ma che tzaj tkꞌoꞌn Kman ke aj Madián tuj kkꞌab.

16 E cubtzun tpaꞌn Gedeón keju ox syent xinak te ox cꞌloj, ex xi tkꞌoꞌn jun tcach ẍneꞌl ex jun ẍokꞌ te teyle junjun. Akeju ẍokꞌ mintiꞌ aꞌ cyuj, nok oꞌcx ttxaꞌn tzaj in cꞌant cyuj. 17 Ex xi tmaꞌn cye:

—Oc npone tuj juntl pacꞌ cycampament aj kꞌoj, bix chinx cyqueꞌyine ex cybinchame ic tzaꞌn weye cbantel wuꞌn. 18 Octzun toc kkꞌajtzaꞌne cach, bixtzun tzꞌoc cykꞌajtzaꞌn cyeye tiꞌjele tcyakil cycampament aj kꞌoj, ex bix che jaw schꞌine cyjaꞌ: Tuꞌn Kman ex tuꞌn Gedeón, che chicuye.

19 Cyjaꞌtzun tten, ate Gedeón cyucꞌix jun syent xinak ucꞌin tuꞌn, e pon tuj juntl pacꞌ cycampament aj kꞌoj tej matok cybajlen chꞌexpuꞌn keju in che xkꞌukin tuꞌn tpon te tmij akꞌbil. Octzun cykꞌajtzaꞌn ke tcach ẍneꞌl ex e cub cypaꞌn ke ẍokꞌ kꞌiꞌn cyuꞌn, 20 ex junx e oc kꞌajtzaꞌn ke tcach ẍneꞌl cyuꞌn ox cꞌloj xjal ex e cub cypaꞌn ke ẍokꞌ. Kꞌiꞌmlex ttxaꞌn tzaj cyuꞌn tuj cynayaj ex atzun ke tcach ẍneꞌl kꞌiꞌn tuꞌn cybankꞌab, ex e jaw schꞌin cyjaꞌ: Aju kꞌoj lu tuꞌn Kman ex tuꞌn Gedeón. 21 Mintiꞌ e yucch ke aj Israel tuj cylugar tiꞌjele cycampament aj Madián, ex cycyakiltzun soldad aj Madián e jaw schꞌin ex e jeꞌl ok. 22 Atzun cye ox syent aj Israel cucx oc cykꞌajtzaꞌn ke tcach ẍneꞌl, ex tuꞌn Kman e oc ten ke aj kꞌoj kꞌojlel tuꞌn spad cyxolx tuj cycampament, ex e jeꞌltzun ok tuꞌn cypon max tuj lugar Bet-sita tuj be in xiꞌ tumlal Zerera, ex max e pon ok tuj tmojonil lugar Abel-Mehola aju tcub junx tucꞌil lugar Tabat.

23 E tzajtzun txcoꞌn ke tiyjil Neftalí, cyucꞌix ke tiyjil Aser ex cycyakil ke tiyjil Manasés tuꞌn cyxi lpeꞌ kꞌojlel cyiꞌj aj Madián. 24 Xi t-samaꞌn Gedeón ke t-sanjel tuj tiwitz txꞌotxꞌ cye aj Efraín, ex xi cymaꞌn tuꞌn cycuꞌtz ke xinak kꞌojlel cyiꞌj aj Madián, ex tuꞌn cycub ten ttzi nima Jordán jatum at ke xajbil aꞌ, ex tuꞌn cypon max tuj lugar Bet-bara acux naꞌnxtok cypon ke aj Madián. Cybinchatzun ke tiyjil Efraín ic tzaꞌn otok tzaj kꞌmaꞌn cye. 25 E tzyet cabe nejenel cye aj Madián cyuꞌn, jun Oreb tbi, atzun juntl Zeeb tbi. Ate Oreb, atzun cub byoꞌn twiꞌ jun pic Oreb tbi, atzunte Zeeb, atzun cub byoꞌn tuj putzꞌbil uva Zeeb tbi. E oc lpeꞌ kꞌojlel cyiꞌj aj Madián tuꞌn tcub cyiꞌj, ex xi cyiꞌn twiꞌ Oreb tucꞌix twiꞌ Zeeb tucꞌil Gedeón, max jlajxi nima Jordán.