—Cyeye mas nim ma bant cyuꞌne ic tzaꞌn weye ma bant wuꞌn. Aju chꞌin ma bant cyuꞌne, akeye tiyjil Efraín, mas nim t-xilen twitz tcyakilju ma bant kuꞌne. 3 Ate Dios ma tzaj kꞌonte Oreb tuj cykꞌabe, tucꞌix Zeeb, akeju nejenel cye aj Madián. Aju cyeye ma bant cyuꞌn, mas maꞌ t-xilen twitzju weye ma bant wuꞌn.

Tejtzun cybinte ke tiyjil Efraín aju tyol Gedeón, o chewix cycꞌuꞌj tiꞌj.

4 Pontzun Gedeón ttzi nima Jordán cyucꞌix ox syent xinak tucꞌil, ex e icꞌx tuj nima masque otok che sict wen, pero cucx e jeꞌx lpeꞌ cyiꞌj aj kꞌoj tuꞌn tcub cyiꞌj cyuꞌn. 5 Xitzun tmaꞌn Gedeón cye xjal najl tuj tnam Sucot:

—Cybinchame xtalbil, cykꞌonxe chꞌin cywa ke xjal ucꞌin wuꞌne, porque nimxix ma che sict. Lepchkoꞌque tiꞌj Zeba ex Zalmuna, akeju rey cye aj Madián tuꞌn cytzyet kuꞌne.

6 Atzun cye nejenel cye xjal tuj tnam Sucot xi cytzakꞌweꞌn:

—¿Tzaꞌn tten tuꞌn t-xi kkꞌoꞌne cywa ke t-soldadiya? Baka ma che tzyet Zeba tucꞌix Zalmuna cyuꞌne.

7 Atzunte Gedeón xi ttzakꞌweꞌn:

—Oc ttzaj kꞌoꞌn Zeba tuj nkꞌabe tuꞌn Kman, tucꞌix Zalmuna, chin ul meltzꞌaje cyucꞌile ex cbajel nluẍin cychibjale tuꞌn chꞌiꞌx ex tuꞌn xoc chꞌiꞌx in chꞌiy tuj tzkij txꞌotxꞌ.

8 Icꞌtzun ex xiꞌ tuj Peniel, ex xi tkanin wabj ic tzaꞌn otok txi tkanin tuj Sucot. Atzun cye xjal tuj Peniel ax yol tzaj cymaꞌn ic tzaꞌn otok cyma ke xjal tuj Sucot. 9 Xitzun tmaꞌn Gedeón cye:

—Oc wul meltzꞌaje tcublenxi cyiꞌj ke rey wuꞌne, cbel nxitune aju nintz ja maꞌ twaꞌl lu.

10 Atzunte Zeba tucꞌix Zalmuna otok che canun tuj lugar Carcor tbi, cyucꞌix ke cysoldad; balo olaj mil cybet. Oꞌcxtzun jlu e cyaj clet cyxol txkan soldad otok che tzaj tuj tjawitz kꞌij, porque otok che baj cyim jun syent tucꞌ winkin mil. 11 Aju tbe Gedeón xi tiꞌn tuꞌn toc tzokpaj cyiꞌj aj Madián tuj cycampament, atzunju nnoꞌcx ttziꞌyile lugar tzkij txꞌotxꞌ, cytxlaj tnam Noba ex Jogbeha tuj tjawitz kꞌij. Mintiꞌtok baꞌn cyuꞌn aj Madián ka cyjaꞌtok cyoc tzokpaj ke cyajkꞌoj cyiꞌj. 12 E jeꞌl ok Zeba tucꞌix Zalmuna akeju cabe rey cye aj Madián, pero oc lpeꞌ Gedeón cyiꞌj ex e tzyet tuꞌn, ex cycyakil soldad tzaj nim cyxobil ex e bjeꞌl ok.

13 Tejtzun tajtz Gedeón tuj kꞌoj, icꞌ t-xol witz tuj lugar Heres tbi, 14 atzun tzyet jun cuꞌxun aj Sucot tuꞌn ex oc ten xjelil te. Tzajtzun ttzꞌiban cuꞌxun cybi 77 xjal nejenel ex ka tij xjal tuj Sucot. 15 Xiꞌtzun Gedeón tuj Sucot ex xi tmaꞌn cye xjal tuj tnam lu:

—¿Naꞌnpe cyuꞌne tzaꞌn tten e oc tene xmayil wiꞌje tuꞌn tlaj Zeba ex Zalmuna? ¿Ex naꞌnpe cyuꞌne tej mintiꞌ tzaj cykꞌoꞌne cywa ke xinak ucꞌin wuꞌne otok che sict wen, ex o cymaye keye: Mlay txi kkꞌoꞌne cywaye, porque baka ma che tzyet Zeba ex Zalmuna cyuꞌne? Che chiye. Atzun jaꞌlo lu ke lu.

16 Tzajtzun tiꞌn Gedeón chꞌiꞌx tucꞌix xoc chꞌiꞌx tuj tzkij txꞌotxꞌ, ex atzun jlu ajben tuꞌn te cꞌixbisabl cye ke cytijil xjal tuj tnam Sucot. 17 Ax icx cub t-xitun aju ja maꞌ twaꞌl tuj tnam Peniel, ex e cub tbyoꞌn ke xinak tuj tnam lu. 18 Xitzun tkanin Gedeón te Zeba ex te Zalmuna:

—¿Tzaꞌn che queꞌyin ke xjal e cub cybyoꞌne twi witz Tabor?

Atzun cye tzaj cytzakꞌweꞌn:

—Ic che queꞌyin ic tzaꞌn aya. Teyle junjun cye ic che queꞌyin ic tzaꞌn tcyꞌajal jun rey.

19 Xitzun tmaꞌn Gedeón cyjaꞌ:

—Atzun ke wermaniye, tal ntxuꞌye ke. Cxel nmaꞌne cyeye jun yol axix toc twitz Kman, nokwit mintiꞌ e cub cybyoꞌne ke wermaniye, icxwitlo weye mlaywitlo che cub nbyoꞌne.

20 Xi tmaꞌn Gedeón te Jeter aju nej tcyꞌajal:

—Weꞌctza ex byoncuya ke jlu.

Pero ate Jeter neꞌxtok taꞌ, tuꞌntzunju tzaj tchi tiꞌj ex mintiꞌ jatz tiꞌn t-spad. 21 Atzun te Zeba ex Zalmuna xi cymaꞌn te Gedeón:

—Axa baꞌn tuꞌn tcub byonte keye. Aju xinak nneꞌl nicꞌbaj tiꞌj tuꞌn tipumal.

Jawtzun weꞌ Gedeón ex e cub tbyoꞌn, ex el tiꞌn ke uwj tbanilxix cotl tcub cykul ke chej camey te Zeba ex te Zalmuna. 22 Atzun cye aj Israel xi cymaꞌn te Gedeón:

—Yaque ma ko colpete tuꞌna tjakꞌ cycawbil aj Madián, jaꞌlo kajbile aya tuꞌn toca te cawil kibaje, ax icx ke tiyjila che ul itzꞌj te tibajxi tuꞌn cyoc te cawil kibaje.

23 Atzunte Gedeón xi ttzakꞌweꞌn:

—Mya we kin ex mya we ncꞌwaꞌl ccawil cyibaje. Ate Kman ccawil cyibaje. 24 Nok oꞌcx waje txi nkanine jun tiꞌxti cyeye: Teyle junjun tuꞌn ttzaj tkꞌoꞌn jun tuj ẍcyinbaj weye, cyxol keju ma tzꞌel cyiꞌne cyiꞌj ke xjal tuj kꞌoj, chi Gedeón.

Akeju tuj ẍcyinbaj lu kꞌan pwak cytxꞌotxꞌil ex in che ajbentok cye aj Madián, porque aj Ismael ke. 25 Cubtzun cylicꞌun aj Israel jun xbalun twitz txꞌotxꞌ, ex teyle junjun cub tkꞌoꞌn jun tuj ẍcyinbaj twitz xbalun, ex xi cymaꞌn te Gedeón:

—Tuꞌn tcyakil kcꞌuꞌje cxel kkꞌoꞌne tuj ẍcyinbaj teya, ex lu ke lu.

26 Aju talil cycyakil tuj ẍcyinbaj kꞌan pwak ttxꞌotxꞌil, balo jun arrob tucꞌ wuklaj libr o bant, ex mintiꞌ e oc ke uwj te tajlal, mi ke tal abj puro tbanil ex mi ke xbalun ẍjulin che queꞌyin kꞌiꞌn cyuꞌn ke rey cye aj Madián, ex mi cyu ke chej camey. 27 Tuꞌnju kꞌan pwak lu baj noj tiꞌj jun capiẍay tuꞌn Gedeón ic tzaꞌn ju capiẍay in ajben cyuꞌn pal ttzi cyxuꞌc, ex xi tcꞌuꞌn Gedeón tuj ttanmi aju Ofra tbi, ex cycyakil aj Israel e jeꞌl tzpet tuꞌn tlaj capiẍay lu, porque e cꞌulun twitz ex oc te jun tolsabl te Gedeón ex cye keju ateꞌ tuj tja.

28 Cyjaꞌtzun tten e cyaj aj Madián tjakꞌ cycawbil aj Israel ex mintiꞌ oc juntl maj cyipun. Tuj tkꞌijlalil tej tten Gedeón, puro tuj tzalajbil e ten aj Israel 40 abkꞌi.

29 Ate Jerobaal aju ax juntl tbi Gedeón, xiꞌ najal tuj tja, 30 ex tzaj 70 tcꞌwaꞌl tuꞌnju elaꞌtok t-xuꞌjil at. 31 At jun tcab t-xuꞌjil Gedeón o ten tuj tnam Siquem, ax icx o tzaj jun tcyꞌajal tiꞌj ex oc tkꞌoꞌn tbi Abimelec.

32 Otok tijin Gedeón wen tej tcyim, ex ocx makuꞌn ttxlaj tpantyón Joás aju ktzan tman, tuj tnam Ofra aju cytanmi ke tiyjil Abiezer.

33 Tejtzun tcyim Gedeón, el cypaꞌn cyib aj Israel juntl maj tiꞌj Dios, e oc ten cꞌulul cywitz nimcu tilbilal Baal, ex jaw cyscꞌoꞌn tilbilal Baal-berit tuꞌn toc te cydios. 34 Icꞌtzun tnaꞌl Kman Dios cyuꞌn, aju otok clonte cye tuj cykꞌab cycyakil aj kꞌoj e ten cyiꞌjele, 35 ex mintiꞌ o cybincha baꞌn cyiꞌj ke tcꞌwaꞌl Gedeón te t-xel ju baꞌn otok tbincha Gedeón cye.