2 —Cybinchame xtalbil, cymanxe cye cycyakil xjal aj Siquem cyjaꞌ: ¿Alcye baꞌn tuj cywitze, baꞌnpe tuꞌn cycawin cycyakil keju 70 tcyꞌajal Jerobaal cyibaje, ex ka mas baꞌn tuꞌn tcawin junx xjal cyibaje? Che ximane tiꞌj ka ax cyermaniye kine, chi Abimelec, che chicuye.

3 Tuꞌnju at t-xilen Abimelec cyucꞌil ke xjal lu, cyjaꞌtzun o mojeꞌ cyyol tucꞌil, e jeꞌxtzun kꞌmalte cye cycyakil xjal aj Siquem tuꞌn cyoc lpeꞌ tiꞌj, ex baꞌn eꞌla tuj cywitz. 4 Ex mya nok oꞌcx jlu, ax icx etz cyiꞌn 70 sak pwak tuj tja cydios Baal-berit tbi, ex xi cykꞌoꞌn te Abimelec. Tuꞌntzunju pwak lu, e jeꞌx tmajnaꞌn Abimelec junjun xjal mya baꞌn ex cyꞌaj ke, e jeꞌxtzun ke xjal lu tucꞌil Abimelec, 5 e pon tuj tnam Ofra jatum otok najan ktzan tman, ex twiꞌ junx abj cub cybyoꞌn ke 70 terman Abimelec. Oꞌcx te Jotam aju tchꞌiꞌp Jerobaal xi tewan naj tib ex o clet. 6 Te tibajxi jlu, cycyakil aj Siquem ex ke aj Bet-milo oc cychmon cyib t-xe tzeꞌ cꞌol, twitz abj xjan at tuj Siquem, ex atzun oc cykꞌoꞌn toclen Abimelec te rey.

7 Tejtzun tbinte Jotam jlu, jax twi witz Gerizim ex maxtzun jaw schꞌin cyuw wen tuꞌntzun cybinte cycyakil xjal:

—Chin cybintze akeye xjal aj Siquem tuꞌntzun icx cyeye tuꞌn cytzaj biꞌne tuꞌn Dios.

8 At jun maj o cyajbe ke tzeꞌ tuꞌn toc jun cyrey, ex xi cymaꞌn te tzeꞌ olivo tuꞌn toc te cyrey. 9 Atzunte tzeꞌ olivo xi tmaꞌn cye: Mlay, porque ka ma chin oque te cyreye, il-lo tiꞌj tuꞌn miꞌn tel chibj aseyt wiꞌje aju in ajben te nimbil te Dios ex cye xjal.

10 Xitzun cymaꞌn ke tzeꞌ te tkan higo tuꞌn toc te cyrey. 11 Atzunte tkan higo xi tmaꞌn cye: Mlay, porque ka ma chin oque te cyreye, il-lo tiꞌj tuꞌn miꞌn toc nwitze aju puro chiꞌ ex puro cꞌocꞌj tloꞌnjtz.

12 Xitzun cymaꞌntl ke tzeꞌ te tkan uva tuꞌn toc te cyrey. 13 Atzunte tkan uva xi tmaꞌn cye: Mlay, porque ka ma chin oque te cyreye, il-lo tiꞌj tuꞌn miꞌn tel nwitze aju nnoꞌc te vin ex in che tzalaj xjal tiꞌj, ax icx te Dios.

14 Te mancbiltzun xi cymaꞌn ke tzeꞌ te jun wiꞌ chꞌiꞌx tuꞌn toc te cyrey. 15 Atzunte chꞌiꞌx xi tmaꞌn cye: Ka axix toc cyaje tuꞌn woque te cyreye, il tiꞌj tuꞌn cycub tene cycyakile tjakꞌ nxlecumale, ex katzun miꞌn cyaje tuꞌn cycub tene tjakꞌ nxlecumale, cꞌelel jucpaj jun kꞌakꞌ wiꞌje tuꞌn cybaj naj ke tzeꞌ wiꞌten ateꞌ twi witz Líbano, chi chꞌiꞌx.

16 Atzun jaꞌlo cxel nkanine cyeye: ¿Tujpe tumel ex tzꞌaklxixpe aju ma cybinchaye tuꞌnju ma tzꞌoc cykꞌoꞌne Abimelec te cyreye? ¿Ex mape cybinchaye baꞌn te Jerobaal ex cye ke tcꞌwaꞌl, ic tzaꞌnx te o tbincha baꞌn cyeye? 17 Porque o kꞌojin ktzan nmane ex xi tkꞌon tib tuꞌn tcyim tuꞌn cycolpete tuꞌn tuj cykꞌab aj Madián; 18 atzun cyeye ma che oc tzokpaje cyiꞌj ke terman nmane, ex twiꞌ junx abj ma che cub cybyoꞌne keju 70 tcyꞌajal, ex ma tzꞌoc cykꞌoꞌne Abimelec te cyreye, aju tal tcab t-xuꞌjil, nok tuꞌnju at t-xilen xjal lu cyucꞌile. 19 Pero cxel nmaꞌne cyeye jaꞌlo: Ka tuj tumel ex ka tzꞌaklxix aju ma cybinchaye tiꞌj Jerobaal ex cyiꞌj ke tcꞌwaꞌl, che tzalajxtzune tucꞌil Abimelec, ax icx te Abimelec tuꞌn ttzalaj cyucꞌile. 20 Katzun mintiꞌ ma bant cyuꞌne icju, e tel jucpaj jun kꞌakꞌ tiꞌj Abimelec, tuꞌntzun cynaj cycyakil ke xjal najl tuj Siquem cyucꞌix ke xjal najl tuj Bet-milo, ex e tel jucpaj jun kꞌakꞌ tiꞌj Siquem ex tiꞌj Bet-milo tuꞌn tnaj Abimelec.

21 Tbajlenxitzun tmaꞌn Jotam jlu, el ok ex xiꞌ najal tuj lugar Beer, porque tzaj t-xobil twitz Abimelec aju terman.

22 Ox abkꞌi e ten aj Israel tjakꞌ tcawbil Abimelec, 23 pero tzaj t-samaꞌn Dios jun paꞌj tibil cyxol aj Siquem tucꞌil Abimelec, tuꞌn tjaw cyiꞌn cyib tiꞌj, 24 tuꞌntzun tchjet tuꞌn Abimelec aju cycublen tbyoꞌn 70 tcyꞌajal Gedeón, ex tuꞌn tchjet cyuꞌn aj Siquem tuꞌnju e oc ten onil tucꞌil Abimelec tuꞌn cycub tbyoꞌn ke terman. 25 Ke xjal aj Siquem jaw cyiꞌn cyib tiꞌj Abimelec, cyjaꞌtzun cub cykꞌoꞌn junjun xjal cywiꞌ ke witz in xi cyewan cyib ttxlaj be tuꞌn cyelkꞌan cyiꞌj xjal in che bet tuj be. Ex o tbi Abimelec jlu.

26 At jun kꞌij pon Gaal aju tcyꞌajal Ebed najal tuj Siquem, cyucꞌix ke terman, ex oc keꞌ cycꞌuꞌj aj Siquem tiꞌj Gaal. 27 Tej tpon tkꞌijlalil tuꞌn tjaw chmet twitz uva, e jeꞌx tuj cojbil xilil twitz uva, el cyyatzꞌoꞌn taꞌl tuꞌn toc te vin ex cub cyicꞌsaꞌn jun ninkꞌij, e waꞌn ex e cꞌan tuj tja cydios, ex e oc ten yolil mya baꞌn tiꞌj Abimelec. 28 Atzunte Gaal xi tmaꞌn: ¿Titzun toclen Abimelec tuj twitz? Baka mya jun tcyꞌajal Gedeón jlu ex ate Zebul onil te. Atzun ke aj Siquem koꞌ, ¿tzaꞌntzun tten tuꞌn koc te cymajen xjal lu? Mas baꞌn tuꞌn koc te tmajen Hamor aju cub xeꞌt tnam Siquem tuꞌn, ex mya a tuꞌn kajben te Abimelec. 29 Nokwit akine nejenel cyeye tuj tnam lu, jaꞌlwitlo tzꞌex nlajoꞌne Abimelec, ex jaculo txi nmaꞌne te: Chmon baja ke t-soldadiya ex tzaja kꞌojlel kucꞌile, nchiloye.

30 Atzunte Zebul aju gobernador te tnam, tej tbinte tyol Gaal, tzaj nim tkꞌoj, 31 ex xi t-samaꞌn tkanil te Abimelec cyjaꞌ: Ate Gaal aju tcyꞌajal Ebed o tzul tuj Siquem cyucꞌix ke terman, ex niban tbaj tconsejarin cycꞌuꞌj xjal tuꞌn tjaw cyiꞌn cyib tiꞌja. 32 Cyjaꞌtzun, baꞌn tuꞌn ttzaja te konicꞌan cyucꞌix ke t-soldadiya, ex cyewanx cyibe tuj cojbil. 33 Octzun kskix ex oc tkoptzꞌaj kꞌij, bixtzun che oc tzokpaje cyiꞌj ke xjal tuj tnam, ex octzun tetz Gaal cyucꞌix mastl xjal tuꞌn cykꞌojin tiꞌja, bixtzun tbinchaya tiꞌj Gaal nok alcye baꞌn tuj twitza, chi tkanil xi t-samaꞌn Zebul te Abimelec.

34 Cyjaꞌtzun ate Abimelec cyucꞌix cycyakil ke t-soldad, e tzaj te konicꞌan ex xi cyewan cyib tiꞌjele tnam Siquem. Te cyaje cꞌloj e ela cybaj. 35 Tejtzun tetz Gaal ttzi tpwertil tnam, etz Abimelec cyucꞌix ke t-soldad jatum cyewantok cyib. 36 Tejtzun tlonte Gaal ke t-soldad Abimelec, xi tmaꞌn te Zebul:

—Queꞌyinxa, lu txkan xjal cyjaꞌ cycuꞌtz cywi witz.

Xi ttzakꞌweꞌn Zebul cyjaꞌ:

—Nok t-xlecumal witz jlu ex mer ic tzaꞌn xjal nneꞌla tuj twitza.

37 Atzunte Gaal xi tmaꞌntl:

—Ax icx ma twiꞌ tal witz aju toc tbi Tmux Txꞌotxꞌ, lu txkan soldad cyjaꞌ cycuꞌtz. Ex lu juntl cꞌloj cyjaꞌ cytzaj tuj be nnicꞌ t-xe cꞌol cye aj kꞌij.

38 Xitzun tmaꞌn Zebul:

—¿Ti ma tzaj tiꞌja; aya o kꞌmante ka ate Abimelec mintiꞌ toclen kiꞌj tuꞌn koc te tmajen. Lu ke t-soldad lu akeju mya nim in che ela tuj twitza. Waban cub tiba jaꞌlo tuꞌn tkꞌojina cyiꞌj.

39 Cubtzun nej Gaal cywitz aj Siquem tuꞌn tkꞌojin tiꞌj Abimelec, 40 pero el ok Gaal twitz Abimelec ex xi lpeꞌ Abimelec tiꞌj; nim xjal e cub tejxi cypon ttzi tpwertil tnam. 41 Ax cyaj ten Abimelec tuj lugar Aruma, atzunte Gaal cyucꞌix ke terman e jeꞌtz tlajoꞌn Zebul tuj Siquem.

42 Tujtzun juntl kꞌij e jeꞌx aj Siquem tuj cojbil. Tej tbinte Abimelec jlu, 43 e cub tpaꞌn ke t-soldad te ox cꞌloj ex xi cyewan cyib tuj cojbil. Tejtzun tqueꞌyinte Abimelec tej cyetz aj Siquem tuj tnam, e jeꞌtztzun Abimelec jatum cyewan cyib ex e oc tzokpaj cyiꞌj aj Siquem. 44 Ate Abimelec tucꞌix jun cꞌloj soldad ucꞌin tuꞌn, e jeꞌx tꞌicpaj naj tuꞌn cycub ten ttzi tpwertil tnam, atzun ke cabetl cꞌloj soldad e oc tzokpaj tuꞌn tcub cybyoꞌn ke xjal in che bet tuj cojbil. 45 Ate Abimelec cucxtok tkꞌojin cyiꞌj aj Siquem tuj enter kꞌij, ex cub tiꞌj tnam tuꞌn. Biꞌx baj naj tnam tuꞌn, e cub tbyoꞌn cycyakil xjal najl tuj, ex xi tchitun atzꞌan tuj enter tnam.

46 Ke xjal ateꞌ tuj ja maꞌ twaꞌl te cycolbil cyib at tuj Siquem, tej cybinte aju otok tbincha Abimelec, e jeꞌx clolte cyib tuj tja cydios El-berit tbi. 47 Tejtzun tbinte Abimelec ka otok pon cychmon cyib cycyakil xjal tuj ja lu, 48 xiꞌtzun twi witz Salmón cyucꞌix cycyakil ke t-soldad, ex cuꞌtz ttxꞌemin jun tkꞌab tzeꞌ tuꞌn jun siꞌwbil cꞌuxbil, jax tkꞌoꞌn tkꞌab tzeꞌ lu twi t-semil, ex xi tmaꞌn cye cycyakil t-soldad tuꞌn cybinchante jurat naj ic tzaꞌn te otok tbincha. 49 Cycyakiltzun ke t-soldad cuꞌtz cytxꞌemin jun tkꞌab cytzeꞌ ex e oc lpeꞌ tiꞌj. Tejtzun cypon jatum taꞌ tja cydios xjal aju maꞌ twaꞌl, oc cybuybaꞌn cycyakil tkꞌab tzeꞌ tiꞌj ja ex oc cykoptzꞌiꞌn kꞌakꞌ tiꞌj. Tuꞌnju kꞌakꞌ lu e baj naj cycyakil xjal aj Migdal-siquem, ex aju tajlal xjal e naj, akeju ateꞌ tuj ja maꞌ twaꞌl te cycolbil cyib at tuj Siquem, balo jun mil cybet; at xinak ex xuꞌj.

50 Te tibajxi jlu, xiꞌ Abimelec tuj tnam Tebes, oc tzokpaj tiꞌj ex cub tiꞌj tnam tuꞌn. 51 Tuj tmij tnam lu tcub jun ja maꞌ twaꞌl, ex tujtzun ja lu ocx cyewan cyib cycyakil ke xjal najl tuj tnam, ke xinak ex ke xuꞌj. Cyaj cylamoꞌn ttzi ja wen ex e jax max twi ja, 52 pero pon Abimelec max ttzi tpwertil ja maꞌ twaꞌl tuꞌn toc tzokpaj cyiꞌj xjal. Cyjaꞌtok toc tkoptzꞌiꞌn kꞌakꞌ tiꞌj ja, 53 cuꞌtz xoꞌn jun cyaꞌ tuꞌn jun xuꞌj, ex tibajcu twiꞌ Abimelec cubil tzꞌak cyaꞌ ex biꞌx el cꞌabchaj twiꞌ tuꞌn. 54 Tzajtzun ttxcoꞌn naj Abimelec aju onil te tuj kꞌoj ex xi tmaꞌn te: Kꞌin jatz t-spadiya ex chin tbyoncuya, porque miꞌn waje tuꞌn cymante xjal wiꞌje ka tuꞌn jun xuꞌj otok chin cub byoꞌne, chi Abimelec. Atzunte ju onil te jatz tiꞌn t-spad, akꞌpon t-xayuꞌn tiꞌj ex biꞌx elpun ma tiꞌjxi; cyjaꞌtzun tten cyim Abimelec. 55 Tejtzun cyqueꞌyinte aj Israel ya otok cyim Abimelec, e aj cyja.

56 Cyjaꞌtzun tenba tuꞌn Dios tuꞌn t-xelin tiꞌj Abimelec aju mya baꞌn otok bant tuꞌn tiꞌj tman, tuꞌnju e cub tbyoꞌn 70 terman akeju ax tcyꞌajal tman. 57 Ax icx o tbincha Dios cyiꞌj aj Siquem tuꞌn tchjet tcyakil mya baꞌn cyuꞌn, aju otok cybincha. Cyjaꞌtzun tten o japun castiw o tma Jotam aju tcyꞌajal Jerobaal.