Tej tcawin Tola ex tej tcawin Jair cyibaj aj Israel
10
Tcyimlenxitzun Abimelec at jun xinak tiyjil Isacar Tola tbi, tcyꞌajal Fúa ex tal tchman Dodo, jaw scꞌoꞌn tuꞌn Dios tuꞌn tcolon cyiꞌj aj Israel. Atzun najltok Tola tuj tnam Samir, tuj tiwitz txꞌotxꞌ cye aj Efraín. 2 O cawin Tola cyibaj aj Israel 23 abkꞌi, ex tejtzun tcyim, cuꞌx makuꞌn tuj tnam Samir.3 Te tibajxi jaw scꞌoꞌn Jair tuꞌn Dios, aju aj Galaad, ex 22 abkꞌi o cawin cyibaj aj Israel. 4 Ate Jair attok 30 tcyꞌajal, ex teyle junjun attok jun tbur ex in che chejin tibaj, ex attok jun tnam te junjun tuj txꞌotxꞌ Galaad. Akeju 30 tnam lu tnam te Jair cybi, ex ax cybi tocsaꞌn jaꞌlo.
5 Tejtzun tcyim Jair, atzun cuꞌx makuꞌn tuj lugar Camón.
E baj yajlaꞌn aj Israel cyuꞌn aj Amón
6 Atzun cye aj Israel e oc ten juntl maj binchal mya baꞌn twitz Kman, e oc ten cꞌulul cywitz tilbilal Baal ex cywitz tilbilal Astarté, ax icx cywitz cydios aj Siria, cywitz cydios aj Sidón, cywitz cydios aj Moab, cywitz cydios aj Amón ex cywitz cydios aj Filistey. Cyaj cycolin Kman ex mintiꞌtl e cꞌulun twitz. 7 Cyjaꞌtzun tzaj tkꞌoj Kman cyiꞌj, ex e jeꞌx tkꞌoꞌn tuj cykꞌab aj Filistey ex tuj cykꞌab aj Amón. 8 Cycyakil aj Israel akeju najlke tuj Galaad jlajxi nima Jordán tuj cytxꞌotxꞌ aj Amorrey, e yajlanjtz wajxaklaj abkꞌi cyuwxix wen cyuꞌn aj Filistey ex cyuꞌn aj Amón. 9 Ax icx e jicꞌtz aj Amón tuj nima Jordán tuꞌn cyul kꞌojlel cyiꞌj tiyjil Judá, cyiꞌj tiyjil Benjamín ex cyiꞌj tiyjil Efraín, cyjaꞌtzun cyuwxix yajbil tzaj cyiꞌj aj Israel. 10 E octzun ten aj Israel cubsal cywitz te Kman, ex xi cymaꞌn cyjaꞌ: Kman Dios, ma ko binchane il twitza porque ma cyaj kcolina, ex ma ko cꞌulune cywitz ke tilbilal Baal.
11 Atzunte Kman tzaj ttzakꞌweꞌn:
—Tej cycub yajlaꞌne cyuꞌn aj Ejipt, cyuꞌn aj Amorrey, cyuꞌn aj Amón, cyuꞌn aj Filistey, 12 cyuꞌn aj Sidón, cyuꞌn aj Amalec ex cyuꞌn aj Madián, e oc tene cubsal cywitze weye ex e clete wuꞌne. 13 Masque icju, atzun cyeye ma chin cyaj cycoline ex ma che oc tene cꞌulul cywitz junxitl dios; cyjaꞌtzun mlay chin tzajtle clol cyeye. 14 Cyxiꞌye ex cykaninxe onbil cye keju dios ma jaw cyscꞌoꞌne. E cycolin cyiꞌje tuj yajbil cyeye, chi Kman.
15 Xitzun cytzakꞌweꞌn aj Israel te Kman: Ma ko binchane il twitza. Binchama kiꞌje nok alcye baꞌn tuj twitza, pero binchama xtalbil ko tcloma jaꞌlo, che chi. 16 Eltzun cyiꞌn aj Israel ke cydios, akeju cydios junxitl nasyon, ex e ajben juntl maj te Kman. Atzunte Kman tzaj taꞌw tuj tanmi tuꞌnju cucxtok cyyajlanjtz aj Israel.
17 Bajtzun cychmon cyib aj Amón tuꞌn cykꞌojin ex e cub ten tuj Galaad. Ax icx cye aj Israel baj cychmon cyib ex e cub ten tuj Mizpa. 18 Atzun cye aj Israel akeju najlke tuj Galaad, cyucꞌix ke nejenel cyxol, e oc ten yolil cyxolx: Alcye jun ma cub nej kwitz tuꞌn tkꞌojin cyiꞌj aj Amón, atzunju cꞌoquel te nejenel kxol kcyakil akoꞌ najlkoꞌ tuj Galaad, che chi.