4 Tbajlenxi nim kꞌij, e pontzun aj Amón kꞌojlel cyiꞌj aj Israel, 5 ex atzun cye nejenel cye aj Galaad xi txocbaj Jefté cyuꞌn tuj txꞌotxꞌ Tob, 6 ex xi cymaꞌn te cyjaꞌ:

—Tzaja kucꞌile, kajbile tuꞌn toca te nejenel keye tuꞌn kkꞌojin cyiꞌj aj Amón.

7 Atzunte Jefté xi ttzakꞌweꞌn:

—¿Myapetzun o chin el cyicꞌune ex oc cykꞌoꞌne il wiꞌje tuꞌn wetze tuj tja nmane? ¿Tikuꞌntzun ma che tzaje jyolte weye tej ma tzaj yajbil cyiꞌje? Chi Jefté.

8 —Ax toc ma ko tzaje jyolte teya tuꞌnju ma tzaj yajbil kiꞌje. Kajbile tuꞌn ttzaja kucꞌile tuꞌn toc tena kꞌojlel cyiꞌj aj Amón, ex tuꞌn toca te nejenel kxole kcyakile akoꞌye najl tuj Galaad, che chi nejenel.

9 —Ka cyajbile tuꞌn waj meltzꞌaje tuꞌn nkꞌojine cyiꞌj aj Amón, ex ka ma che tzaj kꞌoꞌn tuj nkꞌabe tuꞌn Kman, ¿axpe toc chin oquel cykꞌoꞌne te nejenel cyeye? Chi Jefté xi ttzakꞌweꞌn.

10 Atzun cye nejenel aj Galaad xi cytzakꞌweꞌn:

—Ate Kman testiw kiꞌje, cbantel kuꞌne tcyakilju ma tmaya.

11 Xiꞌtzun Jefté cyucꞌil, ex atzun cye tnam xjal oc cykꞌoꞌn Jefté te nejenel cye ex te nejenel cye tuj kꞌoj. Tuj lugar Mizpa ax yol xi tmaꞌn Jefté te Kman, akeju yol otok tma tnejel. 12 Te tibajxi xi t-samaꞌn junjun sanjel tucꞌil rey cye aj Amón tuꞌn t-xi cymaꞌn te cyjaꞌ: ¿Ti ma nbinchaye tiꞌja tuꞌnju in tzaja kꞌojlel tuj ntanmiye? 13 Atzunte rey cye aj Amón tzaj ttzakꞌweꞌn cye ke t-sanjel Jefté: Akeye aj Israel, atxix tej cyetze tuj Ejipt el cyiꞌne ktxꞌotxꞌe, xiꞌynix ttzi nima Arnón, ponin baj max ttzi nima Jaboc ex max ttzi nima Jordán. Jaꞌlotzun, cykꞌoꞌn ajtze juntl maj tuj cheba.

14 Atzunte Jefté xi t-samaꞌn txkantl t-sanjel tucꞌil rey cye aj Amón, 15 tuꞌn t-xi cymaꞌn tkanil lu te: Atzunju tzakꞌwebl lu tuꞌn Jefté: Mintiꞌ o tzꞌel kiꞌne cytxꞌotxꞌ aj Moab ex mi cytxꞌotxꞌ aj Amón, akoꞌye aj Israel. 16 Tej ketze tuj Ejipt, atzun o icꞌe tuj tzkij txꞌotxꞌ tuꞌn kpone ttzi mar Cyak Queꞌyin ex o pone max tuj Cades. 17 E tzajtzun ksamaꞌne junjun sanjel tucꞌil rey cye aj Edom, kanilte te tuꞌn ttzaj tkꞌoꞌn ambil keye tuꞌn kexe tuj ttxꞌotxꞌ; atzunte mintiꞌ tzaj tkꞌoꞌn ambil keye tuꞌn kexe tuj ttxꞌotxꞌ. Ax icx xi kkanine te rey cye aj Moab, pero ax icx te mintiꞌ tzaj tkꞌoꞌn ambil keye tuꞌn kexe tuj ttxꞌotxꞌ. Cyjaꞌtzun ax o cyaj tene tuj Cades. 18 Te tibajxi, o icꞌtle tuj tzkij txꞌotxꞌ ex el kcumin kibe tiꞌj cytxꞌotxꞌ aj Edom ex aj Moab, tejxi kpone tuj tjawitz kꞌij te txꞌotxꞌ Moab, ex atzun o cub tene ma chixin taj jlajxi nima Arnón; mintiꞌ o icꞌxe tuj, porque atzun xiꞌyni keꞌ cytxꞌotxꞌ aj Moab. 19 Xitzun ksamaꞌne junjun sanjel tucꞌil Sehón aju rey cye aj Amorrey, aju najl tuj tnam Hesbón, xi kkanine tuꞌn ttzaj tkꞌoꞌn ambil keye tuꞌn kexe tuj ttxꞌotxꞌ tuꞌntzun kpone tuj keye ktxꞌotxꞌ. 20 Atzunte Sehón mintiꞌ o keꞌ tcꞌuꞌj kiꞌje ex mintiꞌ tzaj tkꞌoꞌn ambil keye tuꞌn kexe tuj ttxꞌotxꞌ; nok oꞌcx e baj tchmoꞌn cycyakil ke t-soldad ex e oc tzokpaj kꞌojlel kiꞌje tuj tnam Jahaza. 21 Pero ate Kman aju Kdiose tzaj kꞌonte cye tuj kkꞌabe, ex cub tiꞌj Sehón kuꞌne cyucꞌix cycyakil ke t-soldad, ex o oque te tajwil tcyakil cytxꞌotxꞌ aj Amorrey tuj lugar lu. 22 Tzyet tcyakil cytxꞌotxꞌ aj Amorrey kuꞌne, tzajx keꞌ ttzi nima Arnón ex ponin baj max ttzi nima Jaboc; tzajni keꞌtl tuj tzkij txꞌotxꞌ ex ponin baj max ttzi nima Jordán. 23 Atzun jaꞌlo, ¿maj tajtzuna tuꞌn kex tlajoꞌna tuj txꞌotxꞌ o tzꞌel tiꞌn Kman cye aj Amorrey ex o tzaj tkꞌoꞌn keye? 24 Ka ma tzaj tkꞌoꞌn Quemos aju tdiosa chꞌin tetzbila, cꞌoquel jlu te teya, ¿jec ax? Ax icxtzun keye ma tzꞌoc kkꞌoꞌne te keye aju ma tzaj tkꞌoꞌn Kman te ketzbile. 25 ¿Maspetzun baꞌna tuj twitza twitz Balac aju tcyꞌajal Zipor ex rey cye aj Moab? Mintiꞌ tzaj te kꞌojlel kiꞌje. 26 Ma bant-xi ox syent abkꞌi kcublen tene najal tuj tnam Hesbón, tuj tnam Aroer, cyuj aldey ateꞌ cyiꞌjele ex cyuj cycyakil tnam ateꞌ ttziꞌyile nima Arnón. ¿Tikuꞌn mintiꞌ in che kꞌajte cyiꞌj ke txꞌotxꞌ lu tuj tcyakil tyemp ma jatz? 27 Bajx nbinchaꞌye jun mya baꞌn tiꞌja. Aya in tbinchaꞌna mya baꞌn tuꞌnju nnoꞌc tzokpaja kiꞌje. Ate Kman cꞌoquel te jwes, ex ate cxel binchante cyiꞌj aj Israel ex cyiꞌj aj Amón, chi tkanil xi t-samaꞌn Jefté.

28 Atzunte rey cye aj Amón mintiꞌ xi tkꞌoꞌn twiꞌ tiꞌj tkanil pon t-samaꞌn Jefté.

29 Tzajtzun kꞌoꞌn tipumal Jefté tuꞌn T-xew Kman, ex baj tbetin Jefté tuj tcyakil txꞌotxꞌ Galaad, ex tuj tcyakil cytxꞌotxꞌ tiyjil Manasés, ex icꞌ aj tuj Mizpa te Galaad tuꞌntzun toc tzokpaj cyiꞌj aj Amón. 30 Atzunte Jefté xi ttziyan jun yol te Kman cyjaꞌ: Ka ma che tzaj tkꞌoꞌna aj Amón tuj nkꞌabe, 31 cxel nkꞌoꞌne teya te jun oyaj patun in cub nok alcye jun ma tzꞌetz nej tuj njaye cꞌmolte weye oc wul meltzꞌaje tuj kꞌoj, chi Jefté. 32 Xiꞌtzun Jefté tuj cytxꞌotxꞌ aj Amón ex oc tzokpaj cyiꞌj ex e tzaj kꞌoꞌn tuj tkꞌab tuꞌn Kman. 33 Nim aj kꞌoj e cub tuꞌn Jefté ex e tzyet winkin tnam tuꞌn, cycubsaꞌn cyxol tnam Aroer, Minit ex Abel-keramim. Cyjaꞌtzun tten cub cyiꞌj aj Amón cyuꞌn aj Israel.

34 Tejtzun tul meltzꞌaj Jefté tuj tja tuj Mizpa, etz tmeꞌjel cꞌmolte te, in bixuntok ex in kꞌajtzaꞌntok tiꞌj jun wik tal chnab panderetas tbi, ex oꞌcxcu junx tmeꞌjel at, mintiꞌ jun tcyꞌajal at ex mintiꞌ juntl tmeꞌjel, 35 cyjaꞌtzun, tej tqueꞌyinte Jefté jlu, el t-sbitꞌun t-xbalun tiꞌj te jun techal tiꞌj tbis, ex xi tmaꞌn te txin:

—Ay nmeꞌjel, maꞌxix jun taꞌw ma tzaj tiꞌna wiꞌje. Aya ma tzaj kꞌinte jun mya baꞌn wiꞌje, porque ma txi ntziyane jun yol te Kman ex il tiꞌj tuꞌn tjapun wuꞌne.

36 Atzunte txin xi ttzakꞌweꞌn:

—Tat, binchama wiꞌje aju ma txi ttziyana te Kman, yaque ma onin Kman tucꞌila tuꞌn tcub cyiꞌj aj kꞌoj tiꞌja, akeju aj Amón. 37 Ex xi tmaꞌntl te tman: Kꞌontza cabe xjaw ambil weye tuꞌn nxiꞌye betel cywiꞌ ke witz cyucꞌil ke txin wamiwoye, tuꞌn k-okꞌe tuꞌnju chin cymele naꞌnxtok nmojeꞌye.

38 Xitzun tkꞌoꞌn Jefté cabe xjaw ambil te, ex tuj cabe xjaw lu o bet txin cywiꞌ ke witz cyucꞌil ke tamiw, in che okꞌtok tuꞌnju attok tcyimel naꞌnxtok tmojeꞌ. 39 Tbajlenxi cabe xjaw, ajtz meltzꞌaj txin tuꞌn tul tucꞌil tman, ex o japun tuꞌn Jefté aju yol otok txi ttziyan te Kman. O cyim tmeꞌjel Jefté naꞌnxtok tlonte xinak. 40 Cyjaꞌtzun cyaj ten jun costumr cyxol aj Israel: Cyaje kꞌij in cheꞌx ke txin okꞌel tiꞌj tmeꞌjel Jefté tcyakil abkꞌi.