Aju o baj cyiꞌj tiyjil Efraín tuꞌn Jefté
12
Baj cychmon cyib ke xinak tiyjil Efraín, e icꞌx tuj nima Jordán tumlal lugar Zafón, ex xi cymaꞌn te Jefté:—¿Tikuꞌn xiꞌya tuꞌn toc tzokpaja cyiꞌj aj Amón ex mintiꞌ o tmaya keye tuꞌn kxiꞌye tucꞌila? Atzun jaꞌlo cbel kpatune tjaya tucꞌix aya tocx tuj.
2 Atzunte Jefté xi ttzakꞌweꞌn:
—Ke nxjalile ex akine cub ten jun kꞌoj kxole cyucꞌil aj Amón, ex e tzaj ntxcoꞌn keye, atzun cyeye mintiꞌ e tzaje colol kiꞌje. 3 Tej tel nnicꞌe tiꞌj mintiꞌ tuꞌn cytzaje onil keye, xi woyin wibe tuꞌn ncyime ex in oc tzokpaje cyiꞌj aj Amón. Ate Kman e tzaj kꞌonte cye tuj nkꞌabe. ¿Tikuꞌntzun ma che tzaje kꞌojlel wiꞌje jaꞌlo?
4 E bajtzun tchmoꞌn Jefté cycyakil ke xinak aj Galaad, ex oc ten kꞌojlel cyiꞌj ke tiyjil Efraín ex o cub cyiꞌj tuꞌn. Ke tiyjil Efraín in cymaꞌntok cye aj Galaad, akeju najl cyxol txꞌotxꞌ cye aj Efraín ex cye aj Manasés, che chi cyjaꞌ: Cyeye nok o che ex oke kxole. 5 Ke aj Galaad el cyiꞌn ke xajbil aꞌ te nima Jordán cye ke tiyjil Efraín, ex octzun tpon jun aj Efraín in oktok ex in xi tkanin permis tuꞌn ticꞌx, atzun cye aj Galaad in xi cykanin te ka aj Efraín te; katzun ma tma ka mya aj Efraín, 6 entons in xi cykanin te tuꞌn ttzaj tmaꞌn ju yol ẍibolet. Ka ma tma sibolet, tuꞌnju mintiꞌ otok bant tuꞌn, in tzajtzun cytzyuꞌn ex axtzun in cub byoꞌn ttzi xajbil aꞌ te nima Jordán. Tuj tkꞌijlalil lu e cyim 42 mil xinak aj Efraín.
7 Kak abkꞌi o ten Jefté te nejenel cye aj Israel. Tej tcyim, atzun cuꞌx makuꞌn tuj Galaad tuj tnam jatum o itzꞌj.
Ke oxetl nejenel cye aj Israel
8 Tcyimlenxi Jefté oc Ibzán te nejenel cye aj Israel, aju aj Belén. 9 Ate Ibzán tzaj 30 tcyꞌajal ex 30 tmeꞌjel, ex cycyakil ke jlu e jaw tmojbaꞌn cyucꞌil ke xjal te junxitl tnam. Wuk abkꞌi o ten Ibzán te nejenel cye aj Israel, 10 ex tej tcyim cuꞌx makuꞌn tuj Belén.
11 Tcyimlenxi Ibzán, ate Elón aju tiyjil Zabulón oc te nejenel cye aj Israel. Laj abkꞌi o ten Elón te nejenel 12 ex tej tcyim, cuꞌx makuꞌn tuj tnam Ajalón tuj cytxꞌotxꞌ aj Zabulón.
13 Tcyimlenxi Elón, ate Abdón aju tcyꞌajal Hilel aju aj Piratón, oc te nejenel cye aj Israel, ex wajxak abkꞌi o ten te nejenel. 14 Ate Abdón tzaj 40 tcyꞌajal ex 30 tal tchman, ex teyle junjun cye tibaj bur in che bet. 15 Tejtzun tcyim Abdón, cuꞌx makuꞌn tuj tnam Piratón aju at tuj cytxꞌotxꞌ aj Efraín, tuj tiwitz txꞌotxꞌ cye aj Amalec.