2 Tuj tnam Zora cyxol ke tiyjil Dan, attok jun xinak Manoa tbi, ex aju t-xuꞌjil mintiꞌtok tal otok tzaj tuꞌnju mibantok alin. 3 Cub tyecꞌun tib jun t-anjel Kman twitz xuꞌj lu ex xi tmaꞌn te: Aya xuꞌj miban alin cyjaꞌtzun naꞌnx ttzaj jun tala, pero jaꞌlo cꞌoquel ten jun tala ex tzul itzꞌj jun tala xinak. 4 Pero cwentin cub tiba tuꞌn miꞌn t-xi tcꞌaꞌna vin ex mi kꞌeꞌn, ex miꞌn txi tnicꞌbeꞌna jun tiꞌxti mayoꞌn tuꞌn ley. 5 Aju tala tzul itzꞌj, miꞌn tzꞌel matzet ttxaꞌn twiꞌ, porque oc tul itzꞌj ya paꞌmajtl tuꞌn Kman tuꞌn toc te nazareo ex tuꞌn tajben te Dios, ex atzunte cꞌoquel ten clolte cye aj Israel tuj cykꞌab aj Filistey.

6 Xiꞌtzun xuꞌj tucꞌil tchmil ex xi tmaꞌn te: At jun xinak t-sanjel Dios ma pon aj jatum atintoke; nim ma chin labine tuꞌn porque mer ic tzaꞌn ax jun t-anjel Kman. Ex mintiꞌ xi nkanine te alcye ex jatum tzajni, ax icx te mintiꞌ ma tzaj tmaꞌn tbi weye. 7 Nok oꞌcx ma tzaj tmaꞌn weye ka tzul itzꞌj jun wale xinak, ex ma tma ka texju jaꞌlo tuꞌn miꞌn t-xi ncꞌaꞌne vin mi kꞌeꞌn, ex miꞌn tuꞌn t-xi nnicꞌbeꞌne jun tiꞌxti mayoꞌn tuꞌn ley, porque aju tal neꞌ paꞌmaj tuꞌn Dios tuꞌn toc te nazareo oc tul itzꞌj ex ocxi tcyim.

8 Octzun ten Manoa naꞌl Dios ex tma cyjaꞌ: In chin cubsane twitza Nman Dios, tuꞌn ttzaj tlajoꞌna juntl maj aju xinak kucꞌile, tuꞌntzun ttzaj tmaꞌn keye tzaꞌn tten tuꞌn tchꞌiset tal neꞌ oc tul itzꞌj.

9 Banttzun tuꞌn Dios ic tzaꞌn otok txi tkanin Manoa, ex cub tyecꞌun tib juntl maj t-anjel Kman twitz xuꞌj tuj cojbil, pero mya ajuntok Manoa tucꞌil. 10 Xi kelan naj xuꞌj kꞌmalte te tchmil:

—Bintza, aju xinak o wile cꞌitzkeyin ma cub tyecꞌun tib juntl maj nwitze.

11 Jawtzun weꞌ Manoa ex xiꞌ tucꞌil t-xuꞌjil jatum taꞌtok xinak, ex xi tmaꞌn te:

—¿Apeya o yolin tucꞌil nxuꞌjile cꞌitzkeyin?

Atzunte xinak tzaj ttzakꞌweꞌn:

—Akine, chi.

12 Xitzun tmaꞌn Manoa te:

—Oc tjapun aju ma tmaya keye, ¿alcyetzun tumel cchꞌiyil tal neꞌ kuꞌne? ex ¿ti cbantel kuꞌne tiꞌj tal neꞌ?

13 Atzunte t-anjel Kman xi ttzakꞌweꞌn:

—Il tiꞌj tuꞌn tbinchante t-xuꞌjila ic tzaꞌn o txi nmaꞌne te: 14 Miꞌn txi tcꞌaꞌn vin ex mi juntl wik taꞌl twitz uva ex miꞌn txi tcꞌaꞌn kꞌeꞌn, ex miꞌn txi tnicꞌbeꞌn juntl tiꞌxti mayoꞌn tuꞌn ley. Nok oꞌcx tuꞌn tjapun tuꞌn ic tzaꞌn o txi nmaꞌne te, chi anjel.

15-16 Tuꞌnju mintiꞌtok baꞌn tuꞌn Manoa ka aju xinak lu jun t-anjel Kman, xi tmaꞌn te:

—Binchama xtalbil, tencja kucꞌile tuꞌn tchyoꞌna tiꞌj jun tal chip cbajel kbinchaꞌne.

Atzunte anjel xi ttzakꞌweꞌn:

—Tipxlo ka ma chin cyaj tene, mlay chin chyoꞌne tiꞌj cychiꞌye. Pero baꞌn tuꞌn tcub tpatuna tal chip te jun oyaj te Kman.

17 Xitzun tmaꞌn Manoa te t-anjel Kman:

—Nokna oꞌcx kꞌmantza keye ti tbiya tuꞌntzun t-xi kkꞌoꞌne chjonte teya oc tjapun aju ma tmaya.

18 Pero xi ttzakꞌweꞌn anjel:

—¿Ti tajben teya tuꞌn tbinteya nbiye? Porque aju nbiye maꞌxix t-xilen.

19 Tzajtzun tiꞌn Manoa aju tal chip tucꞌix chꞌin twitz awal, e cub tkꞌoꞌn tibaj jun pic ex cub tpatun te jun oyaj te Kman. Tbinchatzun Kman jun binchben maꞌxix t-xilen twitz Manoa ex twitz t-xuꞌjil. 20 Tej tjaw cꞌant kꞌakꞌ tibaj altar, o til Manoa tucꞌix t-xuꞌjil jax t-anjel Kman tuj tkan kꞌakꞌ, ex xiꞌ tuj cyaꞌj. E cubtzun ẍmejeꞌ tejxi tpon tacl tibaj cywitz twitz txꞌotxꞌ. 21 Eltzun tnicꞌ Manoa tiꞌj ka ate xinak lu t-anjel Kman. Mintiꞌtl cub tyecꞌun tib juntl maj t-anjel Kman twitz Manoa ex mi twitz t-xuꞌjil. 22 Xitzun tmaꞌn Manoa te t-xuꞌjil:

—Axix toc ko cymel, porque ma tzꞌoc kqueꞌyin Dios.

23 Atzunte xuꞌj xi ttzakꞌweꞌn:

—Nokwit taj Kman tuꞌn kcub tbyoꞌn, mintiꞌwtlo xi tcꞌmoꞌn aju tal chip xcub kpatun, ex twitz awal xi kkꞌoꞌn te oyaj, ex mintiꞌwtlo ma kil tcyakilju saj tyecꞌun ke. Ax icx mintiꞌwtlo saj tmaꞌn tcyakil jlu ke.

24 Ultzun itzꞌj tal xuꞌj ex oc tkꞌoꞌn tbi Sansón. In chꞌiytok tal neꞌ ex cub cyꞌiwlaꞌn tuꞌn Kman. 25 Pon jun kꞌij, lu Sansón taꞌtok tuj cycampament jun cꞌloj tiyjil Dan, aju tcub t-xol lugar Zora tucꞌil lugar Estaol, ex octzun ten T-xew Kman kꞌolte tipumal.