—Ma wile jun kꞌapoj aj Filistey tuj tnam Timnat, cyxiꞌye kanilte tuꞌntzun nmojeꞌye tucꞌil.

3 Atzun cye tman xi cytzakꞌweꞌn:

—Baka mintiꞌ xuꞌj cyxol xjal at kxilen cyucꞌil, ex ka cyxol cycyakil aj Israel. ¿Ti tganara tiꞌj tuꞌnju alix txiꞌya jyolte t-xuꞌjila cyxol aj Filistey, akeju mya ocslal tiꞌj Dios?

Atzunte Sansón xi ttzakꞌweꞌn:

—Aju kꞌapoj lu at nganiye tiꞌj, ex atzunju waje tuꞌn ttzaj cyiꞌne te nxuꞌjile.

4 Mintiꞌtok baꞌn cyuꞌn tman Sansón ka tuꞌn Kman bant icju, porque in jyontok Kman tumel tzaꞌn tten tuꞌn toc tzokpaj cyiꞌj aj Filistey, akeju in che cawintok cyibaj aj Israel tuj tyemp lu. 5 Cyjaꞌtzun tten xiꞌ Sansón tuj tnam Timnat tucꞌix tman ex ttxuꞌ. Tej tpon Sansón t-xol tkan uva, nikayin ttxlaj tnam, oc tzokpaj jun tal tman balun tiꞌj, in tzanuntok wen. 6 Tzaj kꞌoꞌn naj tipumal Sansón tuꞌn T-xew Dios, cabal o cub tman balun tuꞌn, ex biꞌx baj ttzakun tuꞌn tkꞌab mer ic tzaꞌn in baj tzakut jun tal chip, pero misicyer xi tmaꞌn cye tman aju otok baj. 7 Pontzun ex o yolin tucꞌil kꞌapoj ex o t-xoꞌ tgan tiꞌj.

8 Tbajlenxitzun junjun kꞌij, xiꞌ Sansón juntl maj tuꞌn tmojeꞌ tucꞌil kꞌapoj, ex icꞌx ttxlaj be tuꞌn t-xiꞌ queꞌyilte tal tman balun otok cub tbyoꞌn, pero tej tpon o til txkan ttxu colmen, tucꞌix txkan taꞌl cab tuj t-ximlal balun cyimni. 9 Eltzun tlochꞌin Sansón ttxcꞌomil cab tuꞌn tkꞌab tuꞌn tetz taꞌl cab tuꞌn, ex icꞌtzun in loꞌn cab. Tej cypon cnet ke tman tuꞌn, xi tkꞌoꞌn taꞌl cab te cyloꞌ, pero mintiꞌ xi tmaꞌn cye ka tuj tcꞌuꞌj cyimni balun otok tzꞌetz tiꞌn taꞌl cab.

10 Xitzun tman Sansón ma tja kꞌapoj, ex oc jun ninkꞌij tuꞌn Sansón ic tzaꞌnx in bant cyuꞌn cuꞌxun. 11 Tej cylonte aj Filistey otok pon Sansón, tzaj cyiꞌn 30 cuꞌxun tuꞌn cyten tucꞌil. 12 Xi tmaꞌn Sansón cye keju 30 cuꞌxun:

—Cxel nmaꞌne jun yol cyeye tuꞌn cynaꞌne tiꞌj. Katzun otok che naꞌne tiꞌj ex otok tzakꞌwet cyuꞌne tuj tumelxix tuj wuk kꞌij ninkꞌij lu, cxel nkꞌoꞌne jun xbalun tbanilxix binchamaj tiꞌj nokꞌ lino te teyle junjun cyeye, ex jun txcaj xbalun aju in ajben te ninkꞌijbil. 13 Katzun mintiꞌ ẍe naꞌne tiꞌj, teyletzun junjun cyeye ctzajel tkꞌoꞌn jun xbalun puro tbanilxix weye, binchamaj tiꞌj nokꞌ lino, tucꞌix jun txcaj xbalun aju in ajben te ninkꞌijbil.

Atzun cye tzaj cytzakꞌweꞌn:

—Kꞌmantza keye alcye yol tuꞌn knaꞌne tiꞌj. Lu koꞌye lu ko bile tiꞌj.

14 Xitzun tmaꞌn Sansón aju yol tuꞌn cynaꞌn tiꞌj ex chi cyjaꞌ:

Tejtzun tel ox kꞌij, naꞌnxtok cynaꞌn ke xjal tiꞌj ju yol. 15 Tuj tcyajin kꞌij xi cymaꞌn te t-xuꞌjil Sansón:

—Kꞌoꞌnca tilil tuꞌn ttzaj tmaꞌn tchmila aju yol mintiꞌ in ko naꞌne tiꞌj, porque ka miꞌn, cbel kpatuna cyucꞌix keju ateꞌ tuj tja tmana. Aju txocbil keye cyuꞌne, mer ic tzaꞌn nok tuꞌn tel cyiꞌne aju at keye.

16 Octzun ten t-xuꞌjil Sansón okꞌel ex xi tmaꞌn te:

—Mintiꞌ tganiya wiꞌje. Icꞌun kine tuꞌna. Ma txi tmaꞌna jun yol cye nxjalile tuꞌn cynaꞌn tiꞌj, pero naꞌnx ttzaj tmaꞌna weye alcye tzakꞌwebl tiꞌj yol.

Atzunte Sansón xi ttzakꞌweꞌn:

—Naꞌnxpe t-xi nmaꞌne te nmane ex te ntxuꞌye, ex ¿tzaꞌntzun tten tuꞌn t-xi nmaꞌne teya?

17 Atzunte xuꞌj cucxtok t-okꞌ ttxlaj Sansón tuj wuk kꞌij ninkꞌij, ex tuꞌnju cucx twulin xuꞌj, cyjaꞌtzun tuj twukin kꞌij xi tmaꞌn Sansón aju tzakꞌwebl tiꞌj yol. Xiꞌtzun xuꞌj kꞌmalte tzakꞌwebl tiꞌj yol cye t-xjalil. 18 Tujtzun twukin kꞌij, tej naꞌnxtok tex kꞌij, e jeꞌxtzun aj Filistey kꞌmalte tzakꞌwebl te Sansón. Che chi cyjaꞌ:

Atzunte Sansón xi ttzakꞌweꞌn:

19 Te tibajxi jlu tzaj kꞌoꞌn tipumal Sansón tuꞌn T-xew Dios, xiꞌ tuj tnam Ascalón, e cub tbyoꞌn 30 xjal tuj tnam lu, el tiꞌn cyxbalun cyiꞌj, ex aju xbalun lu ajben tuꞌn te chojbil cye xjal otok tzaj cymaꞌn tzakꞌwebl tiꞌj yol. Tzaj nim tkꞌoj Sansón ex ajtzun tja tman. 20 Atzunju t-xuꞌjil Sansón xi kꞌoꞌn te jun tucꞌil otok ten tuj mejebleꞌn.