15
Eltzun kꞌij, ex tuj tkꞌijlalil tuꞌn tjaw chmet twitz triw, xiꞌ Sansón betzalte t-xuꞌjil, ex xi tiꞌn jun tal chip tuꞌn t-xi tkꞌoꞌn te. Tejtzun tpon, xi tmaꞌn cyjaꞌ:—Chin oquexe queꞌyilte nxuꞌjile tuj tcwart.
—Cub nximane ka ya mintiꞌtl taja tiꞌj, cyjaꞌtzun xi nkꞌoꞌne te jun tucꞌila, pero at jun titzꞌin txin mas mejor queꞌyin, baꞌn tuꞌn tjaw tiꞌna te t-xuꞌjila te t-xel ttzic.
3 Atzunte Sansón xi ttzakꞌweꞌn:
—Jaꞌlo mya kine at wile tiꞌj ju mya baꞌn cbantel wuꞌne cyiꞌj aj Filistey.
4 Xiꞌtzun Sansón ex e tzaj ttzyuꞌn ox syent wech, oc tcꞌaloꞌn cyjeꞌ te cabcaj cyten, tucꞌix jun ttxaꞌn tzaj oc tcꞌaloꞌn ttxaꞌn cyjeꞌ junjun moj wech. 5 Octzun tkoptzꞌiꞌn kꞌakꞌ tiꞌj ttxaꞌn tzaj, aju cꞌaloꞌn ttxaꞌn cyjeꞌ wech, ex e jeꞌxtzun ttzokpiꞌn tuj cycojbil aj Filistey jatum awaꞌn cyawal. Cyjaꞌtzun tten baj tzꞌeꞌy triw tuꞌn Sansón, aju triw otok jaw chmoꞌn, tucꞌix triw naꞌnxtok tjaw chmoꞌn; tucꞌix tkan uva tzꞌeꞌy ex cyucꞌix ke tzeꞌ olivo. 6 Tejtzun t-xi cykanin aj Filistey alcye otok binchante jlu, tzaj kꞌmaꞌn cye ka a Sansón otok binchante tuꞌn t-xelin tuꞌn aju otok tbincha tjiꞌ tiꞌj, aju aj Timnat, tuꞌnju otok tzꞌel kꞌiꞌn t-xuꞌjil ex otok txi kꞌoꞌn te jun tucꞌil. Cyjaꞌtzun e jeꞌx aj Filistey ex cub cypatun ju xuꞌj tucꞌix tman. 7 Xitzun tmaꞌn Sansón cye:
—Tuꞌnju ma cybinchaye mya baꞌn lu, cxel nmaꞌne jun yol axix toc cyeye: Ax icx weye cbantel mya baꞌn wuꞌne cyiꞌje, mlay tzaj chewix ncꞌuꞌje ex maxi cxel ncoline ocxi t-xelin wuꞌne cyiꞌje.
8 Octzun tzokpaj cyiꞌj tucꞌil ttxꞌuꞌjil ex nim xjal e cub tbyoꞌn. Te tibajxi jlu, xiꞌ najal tuj toyꞌ pic Etam.
Aju tbincha Sansón tuꞌn jun tbakil tjakꞌ ttzi bur
9 E tzajtzun aj Filistey, e cub ten tuj Judá, ex e ocx lakꞌeꞌ mas tuj lugar Lehi, 10 atzun cye aj Judá xi cykanin cye:
—¿Tikuꞌn ma che ule kꞌojlel kiꞌje?
Atzun cye xi cytzakꞌweꞌn:
—Ma ko tzaje tuꞌn ttzyet Sansón kuꞌne, tuꞌntzun t-xelin kuꞌne tiꞌj aju ma tbincha kiꞌje.
11 Tejtzun cybinte aj Judá jlu, e jeꞌx ox mil xinak ma jatum taꞌ toyꞌ pic tuj Etam, ex xi cymaꞌn te Sansón:
—¿Baka mintiꞌ baꞌn tuꞌna ka ake aj Filistey in che cawin kibaj? ¿Tikuꞌn ma tzaj tiꞌna mya baꞌn lu kibaje?
Atzunte Sansón xi ttzakꞌweꞌn:
—Ic tzaꞌn cye ma cybincha mya baꞌn wiꞌje, ax icx weye ma nbinchaye mya baꞌn cyiꞌj.
12 Atzun cye xi cymaꞌn te Sansón:
—Ma ko tzaje tuꞌn ttzyeta kuꞌne ex tuꞌn t-xi kkꞌoꞌne tuj cykꞌab aj Filistey.
Atzunte Sansón xi ttzakꞌweꞌn:
—Cymantze jun yol axix toc weye, ka mya ax keye che bel byonte weye.
13 Atzun cye xi cytzakꞌweꞌn:
—Miꞌn, mlay cub kbyoꞌne. Nok oꞌcx kaje tuꞌn ttzyeta kuꞌne ex tuꞌn t-xi kkꞌoꞌne tuj cykꞌab aj Filistey.
Bajtzun cꞌaloꞌn Sansón cyuꞌn tuꞌn cabe sakbak acꞌaj, ex etz cyiꞌn tuj toyꞌ pic.
14 Tejtzun cypon tuj lugar Lehi, e etztzun aj Filistey canul tiꞌj Sansón, ex e jaw schꞌin tucꞌil tzalajbil. Pero tzaj kꞌoꞌn tipumal Sansón tuꞌn T-xew Kman, ex e baj tlakin ke sakbak ateꞌc te cꞌalbil tkꞌab, ic e tenba tuꞌn ic tzaꞌn jun nokꞌ otok tzꞌeꞌy tuꞌn kꞌakꞌ. 15 Jawtzun tiꞌn Sansón jun tbakil tjakꞌ ttzi bur naꞌnxtok ttzkij, tcub tuj lugar ma chixin, ex tuꞌntzunju bak lu e cub tbyoꞌn jun mil aj Filistey. 16 Te tibajxitzun jlu tma:
Tuꞌn tbakil tjakꞌ ttziꞌ jun bur ma che cub jun ex ka cabe byuj xjal wuꞌne; tuꞌn tbakil tjakꞌ ttzi bur ma cub nbyoꞌne jun mil xinak.
17 Tbajlenxitzun tmaꞌn ke yol lu, xi t-xoꞌn tbakil tjakꞌ ttzi bur. Cyjaꞌtzun tten oc tkꞌoꞌn tbi lugar lu Ramat-lehi. 18 Tzajtzun nim txketleꞌn tiꞌj Sansón, ex tuꞌntzun jlu oc ten cubsal twitz Kman ex xi tmaꞌn te: Nman Dios, ma onina wiꞌje tuꞌn tcub cyiꞌj txkan xjal wuꞌne, ex atzun jaꞌlo, ¿maj chin cyjel tkꞌoꞌna tuꞌn ncyime tuꞌn txketleꞌn, ex tuꞌn ncyime tuj cykꞌab ke xjal mya ocslal tiꞌja?
19 Jakettzun jun toyꞌ jul tuꞌn Dios, aju at tuj lugar Lehi, ex atzun cꞌan Sansón tiꞌj aꞌ in jatz tuj jul, ex o tnaꞌ oc mas tipun. Cyjaꞌtzun En-hacore oc kꞌoꞌn tbi twi aꞌ, ex atx jaꞌlo tuj lugar Lehi.
20 Winkin abkꞌi o ten Sansón te nejenel cyxol aj Israel tuj tkꞌijlalil tej cycawin aj Filistey cyibaj.