4 Te tibajxi jlu, o t-xoꞌ tgan Sansón tiꞌj jun xuꞌj Dalila tbi, aju najl tuj chkꞌajlaj Sorec. 5 E jeꞌxtzun ke nejenel cye aj Filistey tucꞌil Dalila ex xi cymaꞌn te:

—Xmoxin oca Sansón ex sbuncuya, ex kꞌonca cwent tiꞌj jatum in tzaj nim tipun, ex alcye tumel tuꞌn tcꞌalet ex tuꞌn tcub tiꞌj kuꞌne. Teyle junjun keye jacu txi tkꞌoꞌn jun mil tucꞌ jun syent sak pwak teya.

6 Xitzun tmaꞌn Dalila te Sansón:

—Binchama xtalbil, kꞌmantza weye jatum in tzaj nim tipuna. ¿Atpe jun tumel tuꞌn tcꞌaleta ex tuꞌn miꞌn tcoꞌpja?

7 Atzunte Sansón xi ttzakꞌweꞌn:

—Ka ma chin cub cꞌaloꞌna tuꞌn wuk pyal naꞌnxtok cytzkij, cꞌelel wipune ex ic chin oquele ic tzaꞌn cye mastl xjal.

8 Xitzun cyiꞌn ke nejenel cye aj Filistey wuk pyal naꞌnxtok cytzkij te Dalila, ex cyuꞌn ke pyal lu baj cꞌaloꞌn Sansón tuꞌn Dalila. 9 Pero nej otok che ocx tewan junjun xinak tuj tja. Jawtzun schꞌin Dalila:

—Sansón, che oquel tzokpaj aj Filistey tiꞌja, chi.

E bajtzun lakj ke pyal tuꞌn Sansón mer ic tzaꞌn jun tam bak tzꞌeꞌynaj. Mintiꞌ el cynicꞌ aj Filistey tiꞌj jatum in tzaj tipun Sansón. 10 Xitzun tmaꞌn Dalila te Sansón:

—Ma chin cub t-sbuꞌna, ma nicꞌana yol wucꞌile. Jaꞌlo binchama xtalbil kꞌmantza weye alcye tumel tuꞌn tcub cꞌaleta.

11 Xi ttzakꞌweꞌn Sansón:

—Ka ma chin cub cꞌaloꞌne cyuꞌn acꞌaj sakbak naꞌnx cyajben jun maj, cꞌelel wipune ex ic chin oquele ic tzaꞌn mastl xjal.

12 Tzajtzun tiꞌn Dalila junjun acꞌaj sakbak ex baj cꞌaloꞌn Sansón tuꞌn, ex jaw schꞌin Dalila cyjaꞌ:

—Sansón, che oquel tzokpaj aj Filistey tiꞌja.

Ex otok che ocx tewan juntl maj junjun xinak tuj tja, pero e baj tlakin Sansón ke sakbak tuꞌn tipun, mer ic tzaꞌn in cub lakj jun tam nokꞌ. 13 Xitzun tmaꞌntl Dalila te Sansón:

—Cucx ncub t-sbuꞌna, cucx in nicꞌana yol wucꞌile. Kꞌmantza weye alcye tumel tuꞌn tbaj cꞌaleta.

Atzunte Sansón xi ttzakꞌweꞌn:

—Ka ma txi tchmoꞌna wuk cheꞌl ttzmal nwiꞌye tuj tchemaja, ex ka ma cuꞌx tawana jun stac cyuw wen tuj txꞌotxꞌ, tuꞌntzun jlu cꞌelel wipune ex ic chin oquele ic tzaꞌn mastl xjal.

Cubtzun watzaꞌn Sansón tuꞌn Dalila ex tzaj tiꞌn Dalila wuk cheꞌl ttzmal twi Sansón ex xi tchmoꞌn tuj tchemaj, 14 ex te tibajxi jlu cuꞌx tcyuwsaꞌn ju stac tuj txꞌotxꞌ ex jaw schꞌin:

—Sansón, che oquel tzokpaj aj Filistey tiꞌja.

Jawtzun weꞌ Sansón ex biꞌx jatz bokl stac tuj txꞌotxꞌ tuꞌn, tucꞌix ju telar te chmobl xbalun, tucꞌix ju nokꞌ toc tiꞌj. 15 Xitzun tmaꞌn Dalila te Sansón:

—Nicꞌal yola. ¿Tzaꞌn tten in tmaꞌna weye ka at nim tganiya wiꞌje? Ma bant ox maj in xmayina wiꞌje ex bajx tzaj tmaꞌna weye jatum in tzaj nim tipuna.

16 Tuꞌnju cucxtok twulin Dalila tiꞌj Sansón, ex tcyakil kꞌij in xjelin ax xjel te, ya otok baj tgan Sansón ex tajbiltok tuꞌn tcyim. 17 Te mancbiltzun xi tmaꞌn Sansón te Dalila jatum in tzaj tipun. Chi cyjaꞌ:

—Mi jun maj o tzꞌel matzoꞌn ttxaꞌn nwiꞌye, porque tej naꞌnxtok wul itzꞌje, ya paꞌmaj kine tuꞌn Dios tuꞌn woque te nazareo. Ka ma tzꞌel matzoꞌn ttxaꞌn nwiꞌye, cꞌelel wipune ex ic chin oquele ic tzaꞌn mastl xjal.

18 Tejtzun tel tnicꞌ Dalila tiꞌj ka otok tzaj tchicꞌbaꞌn Sansón tcyakil te, e jeꞌxtzun txocbaj ke nejenel cye aj Filistey tuꞌn, chi cyjaꞌ:

—Cytzajtzune jaꞌlo, porque ma tzaj tchicꞌbaꞌn Sansón tcyakil weye.

E jeꞌxtzun ke nejenel cye aj Filistey tucꞌil Dalila, tucꞌix pwak kꞌiꞌn cyuꞌn.

19 Cubtzun watzaꞌn Sansón tuꞌn Dalila ex cub ttxꞌaybaꞌn twiꞌ twi tkan, ex jurat tzaj ttxcoꞌn jun xinak tuꞌn tel matzet wuk cheꞌl ttzmal twiꞌ. Cyjaꞌtzun tten cub tiꞌj Sansón tuꞌn Dalila ex el tipun. 20 Ex jaw schꞌin Dalila:

—Sansón, che oquel tzokpaj aj Filistey tiꞌja.

Eltzun twatl Sansón, kꞌukltok tcꞌuꞌj ka tuꞌn tclet juntl maj ic tzaꞌn nej, ex mintiꞌtok baꞌn tuꞌn ka otok cyaj colin tuꞌn Kman. 21 Tzyettzun Sansón cyuꞌn aj Filistey ex jatz cyiꞌn ke tbakꞌ twitz, xi kꞌiꞌn tuj tnam Gaza, baj cꞌaloꞌn tuꞌn caden kꞌan cꞌuxbil ttxꞌotxꞌil ex oc cykꞌoꞌn te cheꞌl triw tuj pres. 22 Masque el matzoꞌn ttzmal twiꞌ, pero tzaj chꞌiy juntl maj.

23 Octzun cychmon cyib ke nejenel cye aj Filistey tuꞌn ticꞌset jun ninkꞌij cyuꞌn tuꞌnju tcublen tiꞌj Sansón cyuꞌn, ex tuꞌn t-xi cykꞌoꞌn oyaj te cydios Dagón, ex e oc ten bitzal cyjaꞌ:

24 Ex tej cyqueꞌyinte xjal, ax icx cye e oc ten bitzal ex jaw cynimsaꞌn tbi cydios cyjaꞌ:

25 In che tzalajtok wen ex xi cykanin tuꞌn tpon kꞌiꞌn Sansón te cysakchbil. Etztzun kꞌiꞌn Sansón tuj pres ex ajben te cysakchbil, ex cub cywaban cyxol tkan ja. 26 Xitzun tmaꞌn Sansón teju cuꞌxun ẍaklul te:

—Chin twaban oca jatum baꞌn tuꞌn cyoc nmacoꞌne ke tkan ja aju tzyulte tja cydiose. Waje tuꞌn woc kꞌejeꞌye cyiꞌj.

27 Cycyakil ke nejenel cye aj Filistey ateꞌtok tuj tja cydios, ex nojni tuj ja cyuꞌn ke xinak ex ke xuꞌj. Ax icx ateꞌtok balo ox mil xjal twi ja, in che queꞌyintok cyiꞌj ke mastl cyucꞌil tzaꞌn tten in baj sakchbeꞌn Sansón cyuꞌn. 28 Octzun ten Sansón cubsal twitz Kman ex xi tmaꞌn: In chin cubsane twitza Nman Dios, chin tnaꞌntza nok oꞌcx juntl maj jaꞌlo, ex kꞌontza wipumale tuꞌn tchjet cyuꞌn aj Filistey biꞌx jaꞌlo akeju cabe tbakꞌ nwitze o jatz cyiꞌn. 29 Octzun ten Sansón xmacal cye cabe tkan ja ateꞌ tuj tmij, ex cyibajtzun ke tkan ja lu ttzyun tib tja cydios xjal. Tuꞌn tbankꞌab xi tlamoꞌn jun tkan ja ex tuꞌn tnayaj xi tlamoꞌn juntl tkan ja, 30 ex jaw schꞌin: E cycyim aj Filistey junx wucꞌile.

Xitzun tlamoꞌn ke tkan ja tuꞌn tcyakil tipun. Tzajtzun tilj ja cyibaj ke nejenel cye aj Filistey ex cyibaj cycyakil keju ateꞌ tuj. Mas nim cybet xjal e naj tuꞌn Sansón tuj kꞌij tej tcyim ic tzaꞌn keju otok che naj tuꞌn tuj tcyakil tankꞌibl.

31 Te tibajxi jlu, e ul ke terman Sansón ex ke xjal at cyxilen tucꞌil, xi cyiꞌn t-ximlal ex cuꞌx cymakuꞌn ttxlaj tpantyón Manoa aju ktzan tman, aju tcub t-xol lugar Zora tucꞌil lugar Estaol. Winkin abkꞌi o ten Sansón te nejenel cyxol aj Israel.