—Aju jun mil tucꞌ jun syent sak pwak xi elkꞌaꞌn teya, ex o nbiye tej t-xi tkanina mya baꞌn tibaj elekꞌ, akine kꞌilte pwak lu, akine inx elkꞌante tpwaka, chi Micaía.

Tmatzun ttxuꞌ cyjaꞌ:

—Awt Kman cyꞌiwlante teya, wal. 3 Ajtzun tkꞌoꞌn Micaía aju jun mil tucꞌil syen sak pwak te ttxuꞌ, atzunte ttxuꞌ tma:

—Ax toc aju pwak lu cxel nkꞌoꞌne te Kman tuꞌn tajben teya wal, tuꞌn tbinchanteya jun tilbilal loꞌtzin tiꞌj tuꞌn sak pwak; jaꞌlotzun cꞌajel nkꞌoꞌne juntl maj tucꞌila.

4 Atzunte Micaía aj tkꞌoꞌn juntl maj sak pwak te ttxuꞌ, ex atzunte ttxuꞌ xi tkꞌoꞌn cabe syent sak pwak tiꞌj pwak lu te jun xjal baꞌn binchan tilbilal, tuꞌntzun tcub tbinchaꞌn jun tilbilal loꞌtzin tiꞌj tuꞌn sak pwak, ex ocx tkꞌoꞌn tuj tja Micaía.

5 Attok jun lugar te cꞌulbil tuj tja Micaía. Cub tbinchaꞌn Micaía jun capiẍay in ajben cyuꞌn pal ex mastl tilbilal nnoꞌc cydiosin xjal tuj cyja, ex oc tkꞌoꞌn jun tcyꞌajal te pal. 6 Tuj tkꞌijlalil lu mintiꞌtok rey cyxol aj Israel, ex teyle junjun in tbinchaꞌntok nok alcye baꞌn tuj twitz.

7 Tuj tnam Belén tuj txꞌotxꞌ cye aj Judá, attok jun cuꞌxun aj Leví nok in posadiyin. 8 Aju cuꞌxun lu etz tuj tnam Belén tuꞌn t-xiꞌ jyolte jun lugar jatum tuꞌn tnajan. Tej in bettok tuj tiwitz txꞌotxꞌ cye aj Efraín o pon tja Micaía.

9 Xitzun tkanin Micaía te:

—¿Jatum tzajniya?

—Tzajni kine tuj Belén, aj Leví kine ex in chin jyone jun lugar jatum tuꞌn nnajane tuj, chi tcuba, xi ttzakꞌweꞌn.

10-11 Xitzun tmaꞌn Micaía te:

—Tencja wucꞌile tuꞌntzun tajbena weye te pal, ex tuꞌn toca ic tzaꞌn aya nmane. Jacu txi nchjoꞌne laj sak pwak tuj abkꞌi, ex jacu txi nkꞌoꞌne t-xbaluna ex twaya, chi Micaía.

Cubtzun tuj twitz aj Leví tuꞌn tcyaj ten najal tucꞌil Micaía, ocxtzun tuja, ex oc ic tzaꞌnx tcyꞌajal Micaía. 12 Octzun tkꞌoꞌn Micaía toclen cuꞌxun aj Leví te tpal, ex axtzun cyaj ten najal tucꞌil. 13 Tmatzun Micaía cyjaꞌ: Jaꞌlo axix toc chin bel cyꞌiwlaꞌne tuꞌn Dios, porque at jun pal aj Leví wucꞌile.