—¿Alcye ul kꞌinte teya tzalu? ¿Ti nbaj teya tuj lugar lu? ¿Ti in tjyoꞌna tzalu? Che chi.

4 Atzunte aj Leví xi tmaꞌn cye aju trat otok tbincha Micaía tucꞌil, ex tzaꞌn tten otok bant tiꞌj tuꞌn Micaía tuꞌn toc te tpal. 5 Xitzun cymaꞌn te aj Leví:

—Kaninxa te Dios tuꞌn tel knicꞌe tiꞌj ka baꞌn cꞌelel kbeye lajoꞌn.

6 Atzunte pal aj Leví xi ttzakꞌweꞌn:

—Cyxiꞌye tucꞌil tzalajbil, ate Kman cꞌoquel cwentinte cyeye tuj cybeye.

7 E icꞌtzun ke jweꞌ xinak ex e jeꞌx tuj tnam Lais. Ke xjal ateꞌ tuj tnam lu in che ankꞌintok tuj txubtxaj, ex mintiꞌtok in baj cycꞌuꞌj ic tzaꞌnx cycostumr ke xjal aj Sidón; mi aꞌltok jun in labt cyiꞌj ex mintiꞌ jun atx taj cye. Najchak cyelsaꞌn cyiꞌj aj Sidón, ex mintiꞌtok cymojbabl cyucꞌil ke txkantl tnam ateꞌ nikayin. 8 Tejtzun cypon meltzꞌaj jweꞌ xinak tuj tnam Zora ex Estaol, xi cykanin ke cyucꞌil cye:

—¿Alcye tkanil kꞌiꞌn cyuꞌne?

Atzun cye xi cytzakꞌweꞌn:

9 —Ma baj kbetine tcyakil txꞌotxꞌ ma chixin ex aju txꞌotxꞌ ma kile tbanilxix wen. Chux keye, che weꞌctze. Koꞌke tuꞌn koc tzokpaj cyiꞌj. Miꞌn ax che cyaj tene nok cucx tuꞌn tex cykꞌije. Koꞌke tzyulte txꞌotxꞌ lu. 10 Oc cypone ma chixin, che cnetel ke xjal cyuꞌne mintiꞌ in baj cycꞌuꞌj, at nim cytxꞌotxꞌ ex mintiꞌ juntl atx taj cye. Ctzajel tkꞌoꞌn Dios txꞌotxꞌ lu te cyetzbile, che chi.

11 Kak syent xinak tiyjil Dan e etz tuj tnam Zora ex Estaol, banin cyten tucꞌil cymacbil in che ajben tuj kꞌoj. 12 ex e pon tuj cytxꞌotxꞌ aj Judá, ex atzun e cub ten tuj telex kꞌij te tnam Quiriat-jearim, cyjaꞌtzun oc tbi lugar lu, Campament te Dan, ex ax tbi toc jaꞌlo. 13 Te tibajxi e jeꞌx tuꞌn cypon tuj tiwitz txꞌotxꞌ cye aj Efraín ex e pon tja Micaía. 14 Atzun keju jweꞌ xinak otok cheꞌx aj queꞌyilte txꞌotxꞌ te tnam Lais xi cymaꞌn cye cyucꞌil:

—Cybintze, tuj ja lu at jun capiẍay in ajben cyuꞌn pal, ex at ke tilbilal nnoꞌc cydiosin xjal tuj cyja, tucꞌix jun tilbilal loꞌtzimaj tiꞌj tuꞌn sak pwak. Cyqueꞌyinxe alcye cbantel cyuꞌne.

15 Cyjaꞌtzun akeju xinak otok cheꞌx aj queꞌyilte txꞌotxꞌ el cypaꞌn cyib cyiꞌj ke cyucꞌil, ex e jeꞌx tja Micaía jatum taꞌ tja cuꞌxun aj Leví, ex xi cykꞌolbeꞌn. 16 Atzun ke kak syent soldad tiyjil Dan, banin cyten tucꞌil cymacbil in che ajben tuj kꞌoj ax e cyaj ten ttzi tpwertil muro toc tiꞌj ja. 17 Atzun keju jweꞌ xinak otok cheꞌx aj queꞌyilte txꞌotxꞌ e ocx naj tuj ja, ex etz cyiꞌn tilbilal loꞌtzin tiꞌj tuꞌn sak pwak, tucꞌix ju capiẍay ex cyucꞌix mastl tilbilal nnoꞌc cydiosin xjal tuj cyja, atzunte pal attok ttzi tpwertil muro toc tiꞌj ja cyucꞌil ke kak syent soldad.

18 Tej ttil pal ke jweꞌ xinak otok che ocx tuj tja Micaía ex otok tzꞌetz cyiꞌn tilbilal loꞌtzin tiꞌj tuꞌn sak pwak, tucꞌix capiẍay ex cyucꞌix junjun tilbilal nnoꞌc cydiosin xjal, xi tmaꞌn cye:

—¿Ti nbaj cyeye?

19 Atzun cye xi cytzakꞌweꞌn:

—Miꞌn kꞌajta, tzaja kucꞌile. Kajbile tuꞌn toca te kpale ex tuꞌn toca ic tzaꞌn jun mambaj te keye. ¿Myape mas baꞌn tuj twitza tuꞌn toca te pal te cye jun cꞌloj tiyjil Israel twitzju tuꞌn tajbena te jun ja xjal?

20 Baꞌn eꞌla jlu tuj twitz pal, tzaj tiꞌn tilbilal, tucꞌix ju capiẍay, cyucꞌix junjun tilbilal nnoꞌc cydiosin xjal tuj cyja, ex xiꞌtzun cyucꞌil ke tiyjil Dan. 21 Tzyettzun cybe juntl maj; ex ake cꞌwaꞌl, ke wacẍ ex tcyakilju at cye, e cub nej cyuꞌn. 22 Otok che lakꞌeꞌ tej tbaj cychmon cyib Micaía cyucꞌil ke tvesin, ex e jeꞌxtzun lpeꞌ cyiꞌj. 23 Tejtzun cybinte ke tiyjil Dan aju sichꞌ in jaw cyuꞌn ke xjal lepchix cyxiꞌ cyiꞌj, ajtztzun cyqueꞌyin ex xi cykanin te Micaía:

—¿Ti ma baj tiꞌja? ¿Tikuꞌn ma che tzaj tchmoꞌna xjal kꞌojlel kiꞌje?

24 Atzunte Micaía xi ttzakꞌweꞌn:

—Ma tzaj cyiꞌne ke ndiose, akeju wuꞌne e bant, ax icx ma tzaj cyiꞌne npale, ex ma chin cyaj cykꞌoꞌne mintiꞌ at weye. ¿Tzaꞌntzun tten in tzaj cykanine weye: ¿Ti ma baj tiꞌja?

25 Atzun cye tiyjil Dan xi cytzakꞌweꞌn:

—Miꞌn kꞌajta kiꞌje, mya yajcu at junjun keye baj cypasens ex jacu che oc tzokpaj cyiꞌje, ex jacu naja cyuꞌn, cyucꞌix keju at cyxilen tucꞌila.

26 Ke tiyjil Dan xi cyiꞌntl cybe, ex tej tqueꞌyinte Micaía nimcu cybaj, aj meltzꞌaj tja. 27 Akeju tiyjil Dan kꞌiꞌntok ke tiꞌxti cyuꞌn, akeju otok che baj tbinchaꞌn Micaía, tucꞌix tpal Micaía ucꞌin cyuꞌn, e pon max tuj tnam Lais. Ke xjal ateꞌ ma chixin in che ankꞌin tuj txubtxaj ex mintiꞌ in baj cycꞌuꞌj, cyjaꞌtzun e cub byoꞌn cycyakil tuꞌn spad cyuꞌn ke tiyjil Dan, ex oc cykꞌoꞌn tkꞌakꞌal tnam. 28 Aju tnam lu najchak telsaꞌn tiꞌj tnam Sidón, ex mintiꞌtok cymojbabl cyib xjal aj Lais cyucꞌil ke txkantl tnam ateꞌ nikayin; cyjaꞌtzun mi aꞌl jun o colon cyiꞌj. Atzun taꞌ tnam lu tuj chkꞌajlaj nikayin ttxlaj lugar Bet-rehob. Te tibajxi jaw cybinchaꞌn tiyjil Dan juntl maj tnam, ex axtzun e cyaj ten najal tuj. 29 Aju tbi tnam toctok nej Lais, ex atzun cye oc cykꞌoꞌn tbi Dan te jun nimbil tbi ktzan cyxeꞌchel, aju tcyꞌajal Israel. 30 Cub cykꞌoꞌn ke tiyjil Dan aju tilbilal loꞌtzin tiꞌj tuꞌn sak pwak, tuꞌntzun cycꞌulun twitz, ex ate Jonatán oc te cypal, aju tcyꞌajal Gersón ex tal tchman Moisés. Ex te tibajxi ax ke tiyjil Jonatán e oc te cypal ke tiyjil Dan, tejxi cyxi kꞌiꞌn pres. 31 Aju tilbilal cub tbinchaꞌn Micaía ax o ten cyxol tiyjil Dan tuj tcyakil tyemp tej tten tja Dios tuj Silo.