Aju o baj tiꞌj jun aj Leví tucꞌil tcab t-xuꞌjil
19
Tuj tkꞌijlalil tej mintiꞌtok rey cyxol aj Israel, attok jun aj Leví najl mas najchak tuj tiwitz txꞌotxꞌ cye aj Efraín tzaj tiꞌn jun xuꞌj aj Belén tuj cytxꞌotxꞌ aj Judá, tuꞌn toc te tcab t-xuꞌjil. 2 Pero tzaj tkꞌoj xuꞌj tiꞌj tchmil ex aj juntl maj najal tucꞌil tman tuj Belén. Tbajlenxi cyaje xjaw tponlen xuꞌj ma chixin, 3 xiꞌtzun aj Leví max tucꞌil tuꞌn tcub tcꞌuꞌj tuꞌn, ex tuꞌn tajtl juntl maj t-xuꞌjil tucꞌil. Xi tucꞌin jun tmajen ex xi tiꞌn cabe bur, ex o cꞌmonjtz tuꞌn xuꞌj tuj tja tman. 4 Ax icx o cꞌmonjtz tuꞌn tman xuꞌj tucꞌil tzalajbil, ex xi tmaꞌn tuꞌn tcyaj ten cyucꞌil. Atzunte aj Leví tucꞌix tmajen e cyaj ten ox kꞌij tja tman xuꞌj, in che waꞌn, in che cꞌan ex ax e tan. 5 Tuj tcyajin kꞌij e jaw weꞌ primxix tuꞌn tcub be cyuꞌn, pero tej chꞌixtok cyaj, xi tmaꞌn tman txin te tjiꞌ:—Waꞌna nej naꞌnxtok taja, tuꞌntzun toc tipuna, ex te tibajxi jlu baꞌntzun tuꞌn taja.
6 E cubtzun keꞌ cycabil ex e oc ten waꞌl ex cꞌal, ex atzunte tman xuꞌj xi tmaꞌn te tjiꞌ tuꞌn tcyaj ten juntl akꞌbil tuꞌntzun ttzalaj. 7 Jawtzun weꞌ aj Leví tuꞌn taj meltzꞌaj, pero tuꞌnju oc kꞌoꞌn il tiꞌj tuꞌn tjiꞌ, cyjaꞌtzun cyaj ten juntl konicꞌan.
8 Tuj tjweꞌyin kꞌij jaw weꞌ aj Leví primxix tuꞌn tcub be tuꞌn, pero oc ten juntl maj tman xuꞌj cubsal twitz te tuꞌn twaꞌn naꞌnxtok taj meltzꞌaj, tuꞌntzun toc tipun; cyjaꞌtzun e waꞌn junx acux in bet t-xiꞌ kꞌij. 9 Tejtzun tjaw weꞌ aj Leví tuꞌn tcub be tuꞌn tucꞌix t-xuꞌjil ex tucꞌix tmajen, atzunte tjiꞌ xi tmaꞌn te cyjaꞌ: Ma tzꞌoc kax ex chꞌix koc yupj, ax tcyaj tena juntl konicꞌan tuꞌntzun ttzalaja, ex te prim nchiꞌj jacu cub be cyuꞌne tuꞌn cyaje cyjaye. 10 Atzunte aj Leví mintiꞌ cub tuj twitz tuꞌn tcyaj ten juntl konicꞌan, nok oꞌcx tzyet be tuꞌn, tucꞌix t-xuꞌjil, ex cyucꞌix ke cabe tbur tocsaꞌn cysiy. 11 Tejtzun cycanun ttxlaj tnam Jebús ex ka Jerusalén, xi tmaꞌn tmajen aj Leví te:
—¿Myape baꞌn tuj twitza tuꞌn tex akꞌbil kuꞌn tuj tnam lu, aju cytanmi aj Jebusey?
12 Atzunte aj Leví xi ttzakꞌweꞌn:
—Miꞌn, mlay ko cyaj ten tuj jun tnam ka mya cye aj Israel. Baꞌn tuꞌn t-xi kiꞌn kbe tuꞌn kpon tuj tnam Gabaa. 13 Koꞌ chꞌintl tuꞌn tex akꞌbil kuꞌn tuj tnam Gabaa ex ka tuj Ramá.
14 Cyjaꞌtzun xi cyiꞌntl cybe, ex chꞌixtok tex kꞌij tej cypon tuj Gabaa jun tnam cye tiyjil Benjamín. 15 Eltzun cypaꞌn cyib tiꞌj be kꞌiꞌn cyuꞌn, ex e ocx tuj tnam Gabaa tuꞌntzun tex akꞌbil cye, ex e cub keꞌ tuj plas tuj tnam porque mi jun tzaj kꞌonte cyposad.
16 Tej otok tzꞌoc konicꞌan, icꞌ jun tij xjal ajnintz tuj takꞌun tuj cojbil. Aju tij xjal lu atzun taꞌtok ttanmi tuj tiwitz txꞌotxꞌ cye aj Efraín, pero atzun najltok tuj tnam Gabaa ic tzaꞌn jun betin xjal, porque akeju najlke tuj tnam Gabaa tiyjil Benjamín ke. 17 Tejtzun ttil tij xjal aju betin xjal kꞌukltok tuj plas, xi tkanin te:
—¿Jatum tzajniya ex tzaꞌn t-xiꞌya?
18 Atzunte aj Leví xi ttzakꞌweꞌn:
—Nok betin xjal koꞌye. Tzajni koꞌye tuj Belén tuj txꞌotxꞌ Judá, ex ma koꞌxe tuj tiwitz txꞌotxꞌ mas najchak cye aj Efraín jatum najl kine. Ma chin tene tuj Belén, atzun jaꞌlo ma chin ajtz meltzꞌaje tuꞌn nxiꞌye njaye, pero naꞌnx tcnet jun xjal wuꞌne tzalu tuꞌn ttzaj kꞌoꞌn chꞌin nposadiye tuꞌn. 19 Kꞌiꞌn cywa nburre kuꞌne, tucꞌix ttxa triw, ex kꞌiꞌn pan ex taꞌl twitz uva kuꞌne tuꞌn tajben te keye; te nxuꞌjile, te nmajene ex te weye. Mintiꞌ juntl atx taj keye.
20 Atzunte tij xjal xi ttzakꞌweꞌn:
—Baꞌnwt ma tzula. Jacu wile tcyakil aju at tajben teya. Mlay txi nkꞌoꞌne ambil teya tuꞌn tex akꞌbil tuꞌna tuj plas.
21 E jeꞌxtzun kꞌiꞌn tuꞌn tij xjal max tja ex xi tkꞌoꞌn cywa ke bur. Te tibajxi baj cytxꞌjoꞌn ke betin xjal cykan ex e octzun ten waꞌl ex cꞌal junx. 22 Pero tej matok in che tzalaj, attok junjun xinak jumajx mya baꞌn ke ateꞌ tuj tnam, baj cytxolban cyib tiꞌjele ja, ex e oc ten kꞌajtzal cyuw twitz tpwertil ja, ex xi cymaꞌn te tij xjal aju tajaw ja:
—Kꞌiꞌmetza aju xinak ma tzul tucꞌila. Kajbile tuꞌn kcub tane tucꞌil.
23 Atzunte tajaw ja etz, oc ten cubsal cywitz ex tma:
—Akeye wucꞌil miꞌn cybinchaye icju. Miꞌn cybinchaye aju mya baꞌn lu, aju xinak lu ma ncꞌame tuꞌn tposadiyin wucꞌile. 24 Cybintze, lu nmeꞌjele lu naꞌnx tlonte xinak, ax icx lu t-xuꞌjil xinak lu. Che elex wiꞌne ex cybinchame cyiꞌj nok alcye cyajbile, atzun te xinak lu miꞌn cybinchaye mya baꞌn tiꞌj.
25 Atzun cye mintiꞌ xi cybiꞌn tyol tij xjal, cyjaꞌtzun tzaj tiꞌn aj Leví t-xuꞌjil ex ex tkꞌoꞌn tuj cay, atzun cye xinak lu baj cyyajlaꞌn, ex e oc ten tiꞌj xuꞌj tuj enter konicꞌan tejxi tcub kꞌij. Ex cyajtzun cykꞌoꞌn. 26 Chꞌixtok tcub kꞌij tej tul meltzꞌaj xuꞌj tja tij xjal jatum taꞌtok tchmil, ex axtzun cub tzꞌak ttzi ja ex cyim. 27 Tejtzun tjaw weꞌ tchmil, ocx tjakoꞌn tlamel ja tuꞌntzun t-xi tiꞌntl tbe, o til lu t-xuꞌjil palch cub ttzi ja, cycubsaꞌn ke tkꞌab tibaj tmarquil ja. 28 Xitzun tmaꞌn te:
—Chux weꞌctza ex koꞌtzun.
Atzunte xuꞌj mintiꞌ tzaj ttzakꞌweꞌn. Jawtzun tiꞌn t-ximlal xuꞌj ex jax tkꞌoꞌn tibaj jun tbur, ex tzyet be tuꞌn tuꞌn t-xiꞌ tja. 29 Tejtzun tpon tja, tzaj tiꞌn jun cchil ex baj tpaẍuꞌn t-ximlal ktzan t-xuꞌjil, te cablaj piẍ ela tuꞌn ex xi t-samaꞌn tuj tcyakil txꞌotxꞌ cye aj Israel. 30 Cycyakil keju e queꞌyinte jlu o cyma:
—Atxix tej cyetz aj Israel tuj Ejipt, naꞌnx tilwaj ex naꞌnx tbant jun maj icju ic tzaꞌn jlu. Baꞌn tuꞌn kximan tiꞌj ex tuꞌn tbant tiꞌj alcye cbantel kuꞌn tiꞌj jlu, che chi.