—Akine tucꞌix nxuꞌjile o pone tuj tnam Gabaa, jun tnam cye tiyjil Benjamín, tuꞌn tex akꞌbil kuꞌne ma chixin. 5 Pero tujx konicꞌan lu, akeju xjal najlke tuj tnam baj cytxolban cyib tiꞌjele ja jatum in ko posadiyine, tuꞌn ncub byone cyuꞌn; e oc ten tiꞌj nxuꞌjile ex tuꞌn tlaj jlu biꞌx cyim. 6 Atzun weye, tzaj wiꞌne t-ximlal ktzan nxuꞌjile, baj npaẍuꞌne ex xi nsamaꞌne jun piẍ tuj cytxꞌotxꞌ teyle junjun cꞌloj cyiyjil aj Israel, tuꞌntzun cybinte cycyakil aj Israel aju binchben lu jumajx mya baꞌn. 7 Atzun jaꞌlo, como aj Israel keye, tuj cycwente cyjel ten tuꞌn cyximane tiꞌj ex tuꞌn cymanteye alcye tuꞌn tbant cyuꞌne, chi aj Leví.

8 Cycyakiltzun tnam xjal junx cyximbetz e jaw weꞌ ex cyma:

—Mi jun ke baꞌn tuꞌn taj meltzꞌaj tuj tja xbalun ex ka tja. 9 Aju cbantel kuꞌn, oꞌcx tuꞌn tjaw kiꞌn swert tiꞌj alcye ke che oquel tzokpaj tiꞌj tnam Gabaa. 10 Cyxol cycyakil cyiyjil aj Israel cjawil kscꞌoꞌn jun cyxol lajchak xinak, ex atzun ke jlu che xeꞌl jyolte wabj cye soldad; atzun ke mastl che xeꞌl tuj tnam Gabaa, tuꞌntzun t-xelin cyiꞌj aj Gabaa aju mya baꞌn ma cybincha cyxol aj Israel.

11 Cycyakil aj Israel oc cychmon cyib, junx cyximbetz, tuꞌntzun cyoc tzokpaj tiꞌj tnam. 12 Xi cysamaꞌn ke sanjel tuj tcyakil txꞌotxꞌ cye tiyjil Benjamín, tuꞌntzun t-xi cymaꞌn cye cyjaꞌ: ¿Ti tten ma bant aju mya baꞌn lu cyxole? Che chi. 13 Cykꞌontze ke xinak jumajx mya baꞌn ateꞌ tuj tnam Gabaa, tuꞌntzun cycub kbyoꞌne ex tuꞌntzun cysakset aj Israel tuj mya baꞌn.

Atzun cye tiyjil Benjamín mintiꞌ xi cybiꞌn cyyol cyerman ax aj Israel, 14 nok oꞌcx cycyakil tiyjil Benjamín e tzaj cyuj cycyakil cytanmi, oc cychmon cyib tuj tnam Gabaa tuꞌn cyxiꞌ kꞌojlel cyiꞌj txkantl aj Israel. 15 Ke soldad e tzaj cyuj cycyakil tnam cye aj Benjamín, japun jun cyajlal te 26 mil cybaj, ex mintiꞌ e oc te tajlal akeju wuk syent xinak mas at cynabl tuj kꞌoj otok che jaw scꞌoꞌn ax tuj tnam Gabaa. 16 Cyxol cycyakil ke xinak lu attok wuk syent tuꞌn cynayaj baꞌn che akꞌnan, ex mejorxix che xoꞌn tuꞌn xobl, ax icx jacu tzaꞌw jun ttzmal wibaj cyuꞌn tuꞌn jun xobl abj ex mlay tzꞌel tiꞌj tuꞌn miꞌn taꞌw. 17 Atzun cye txkantl aj Israel o baj cychmon cyib, cyaje syent mil xinak elni ke twitz kꞌoj ex at cynabl tuꞌn cykꞌojin.

18 Atzun cye aj Israel e jeꞌx tuj Betel, ex atzun xi cykanin te Dios tuꞌn tel cynicꞌ tiꞌj alcye jun cꞌloj cyiyjil tuꞌn toc tzokpaj tnejel cyiꞌj tiyjil Benjamín. Atzunte Kman tzaj ttzakꞌweꞌn cye ka ake tiyjil Judá tuꞌn cyoc tzokpaj tnejel. 19 Cyjaꞌtzun tten, primxix e jaw weꞌ aj Israel ex e cub ten tumlal twitz tnam Gabaa. 20 E jeꞌxtzun kꞌojlel cyiꞌj tiyjil Benjamín, ex baj cytxolban cyib twitz tnam Gabaa tuj txolin cyten. 21 Atzun cye tiyjil Benjamín e etz tuj tnam, ex tuj kꞌij lu cub cybyoꞌn 22 mil soldad aj Israel. 22-24 Cyjaꞌtzun, e jeꞌx aj Israel tuj Betel okꞌel twitz Kman tejxi ttzaj klolj, ex atzun xi cykanintl te ka tuꞌn cyoc tzokpaj juntl maj cyiꞌj ke cyerman, akeju tiyjil Benjamín. Como tzaj tmaꞌntl Kman tuꞌn cyoc tzokpaj juntl maj, cyjaꞌtzun oc cyipuntl, ex tuj juntl kꞌij e pon juntl maj kꞌojlel cyiꞌj aj Benjamín tujx lugar jatum e cub ten nej. 25 Pero tuj tcabinmajiꞌn e jeꞌtz aj Benjamín tuj Gabaa tuꞌn cyoc tzokpaj cyiꞌj ex e cub cybyoꞌntl wajxaklaj mil soldad aj Israel kꞌiꞌmlex cyspad. 26 E jeꞌxtzun cycyakil soldad aj Israel cyucꞌix cycyakil tnam xjal juntl maj tuj Betel tuꞌn cyoc ten okꞌel twitz Kman. Tuj enter kꞌij mintiꞌ e waꞌn ex xi cykꞌoꞌn ke oyaj patun in che cub cyucꞌix ke chojbil te mojbabl tibil.

27-28 Tuj tkꞌijlalil lu aju cax cꞌubl tley Dios atzun taꞌtok tuj Betel, ex aju pal in ajbentok twitz, atzun Finees aju tcyꞌajal Eleazar ex tal tchman Aarón. Xi cykanintl aj Israel te Kman cyjaꞌ: ¿Ocpe ko oquel tzokpaje kꞌojlel juntl maj cyiꞌj ke kermaniye, akeju tiyjil Benjamín, ex ka miꞌn? Atzunte Kman tzaj tmaꞌn cye: Cyoc tzokpaje cyiꞌj, porque nchiꞌj cheꞌx nkꞌoꞌne tuj cykꞌabe.

29 Xi cyewan cyib txkan soldad aj Israel tiꞌjele tnam Gabaa, 30 acux in bet cyxiꞌ mastl tuꞌn cykꞌojin cyiꞌj aj Benjamín, ex tuj toxin kꞌij baj cytxolban cyib twitz tnam Gabaa ic tzaꞌnx otok cybincha cabe maj. 31 E etz juntl maj tiyjil Benjamín tuj tnam, e jeꞌl lakꞌeꞌ tiꞌj tnam tuꞌn cyoc tzokpaj kꞌojlel cyiꞌj aj Israel, ex cub cybyoꞌntl balo 30 aj Israel tuj tbeyil Betel, ax icx tuj tbeyil Gabaa ex tuj cojbil; 32 tuj cywitz ka in che oktok aj Israel cywitz, ex otok cub cyiꞌj cyuꞌn ic tzaꞌnx otok che tenba cyuꞌn cab maj. Atzun cye aj Israel nok cyjaꞌ e jeꞌl lakꞌeꞌ tiꞌj tnam tuꞌntzun cyxi lpeꞌ aj kꞌoj cyiꞌj cyuj ke be. 33 Atzun cye aj Israel jurat e jeꞌtz jatum ateꞌtok ex baj cytxolban cyib tuj kꞌoj tuj Baal-tamar; ax icx keju cyewantok cyib tuj chkꞌajlaj tiꞌjtzi tnam Gabaa e jeꞌtz jatok cyewan cyib, 34 ex e oc tzokpaj tiꞌj tnam. Laj mil cybaj aj Israel, akeju at-xix cyipun tuj kꞌoj e oc tzokpaj tiꞌj tnam Gabaa. Cyuwxix kꞌoj oc, ex atzun ke tiyjil Benjamín mintiꞌtok baꞌn cyuꞌn ka cyjaꞌtok tuꞌn cynaj. 35 Ate Kman tzaj kꞌonte cye aj Benjamín tuj cykꞌab aj Israel, ex tuj kꞌij lu e cub cybyoꞌn aj Israel 25 mil tucꞌ jun syent soldad tiyjil Benjamín kꞌiꞌmlex cyspad. 36 Eltzun cynicꞌ ke tiyjil Benjamín tiꞌj ka otok cub cyiꞌj.

Ke aj Israel nok cyjaꞌ e jeꞌl ok cywitz aj Benjamín, porque kꞌukltok cycꞌuꞌj cyiꞌj ke xinak otok txi cyewan cyib tuꞌn cyoc tzokpaj tiꞌj tnam Gabaa. 37 Ake jlu nok minaben e oc tzokpaj tiꞌj tnam Gabaa ex e cub cybyoꞌn tuꞌn spad cycyakil ke xjal ateꞌ tuj. 38 Akeju otok txi cyewan cyib tuꞌn cyoc tzokpaj tiꞌj tnam, otok bant tiꞌj cyuꞌn cyucꞌil txkantl aj Israel, ka ma jaw bukin txkan sib, atzun jun techal ka otok tzyet tnam cyuꞌn. 39 O cybincha aj Israel mer ic tzaꞌn otok che el ok, ex tej cyqueꞌyinte txkan sib in bukin tjaw, e ajtzun meltzꞌaj tuꞌn cyoc tzokpaj cyiꞌj tiyjil Benjamín.

Ke tiyjil Benjamín cub cybyoꞌn 30 aj Israel, ex tuꞌntzun jlu o keꞌ cycꞌuꞌj, tuj cywitz ka otok cub cyiꞌj aj Israel cyuꞌn, ic tzaꞌnx tuj tnejel kꞌoj otok tzꞌoc cyuꞌn; 40 pero tejtzun tjaw t-sibel tnam, ex tej taj cyqueꞌyin aj Benjamín cyiꞌjxi, lu tkꞌakꞌal ex t-sibel tnam otok japun twitz cyaꞌj. 41 E ajtztzun meltzꞌaj aj Israel tuꞌn cyoc tzokpaj cyiꞌj tiyjil Benjamín, ex atzun cye aj Benjamín tzaj nim cyxobil tej tel cynicꞌ tiꞌj mya baꞌn otok tzaj cyiꞌj. 42 E jeꞌltzun ok cywitz aj Israel tuj be in xiꞌ tuj tzkij txꞌotxꞌ; mintiꞌtok tumel tuꞌn cyclet, porque e jeꞌtz aj Israel cyuj tnam, in che tzyet-xi tiyjil Benjamín cyuꞌn ex in che cubxi cybyoꞌn. 43 Baj cytxolban cyib aj Israel cyiꞌjele tiyjil Benjamín, e oc lpeꞌ cyiꞌj ex e cub cybyoꞌn, xiꞌx keꞌ tuꞌn cybyet tuj lugar Menúha ex pon baj max tuj tjawitz kꞌij te tnam Gabaa.

44 Cyjaꞌtzun e cyim wajxaklaj mil soldad tiyjil Benjamín; cycyakil ke jlu cyuw cycꞌuꞌj tuj kꞌoj. 45 Atzun ke mastl e aj meltzꞌaj ex e jeꞌx ok tuj tzkij txꞌotxꞌ tumlal pic Rimón tbi, pero e cub byoꞌn jweꞌ mil tuj be. Atzun cye aj Israel cucx e jeꞌx lpeꞌ cyiꞌj, ex cub cybyoꞌntl cabe mil xinak. 46 E cyim 25 mil soldad tuꞌn tcyakilx tuj kꞌij lu, tiyjil Benjamín ke, cycyakil ke jlu cyuw cycꞌuꞌj tuj kꞌoj. 47 Pero at kak syent tiyjil Benjamín e jeꞌx ok tuj tzkij txꞌotxꞌ ex axtzun e cyaj ten cyaje xjaw tuj pic Rimón tbi. 48 Atzun cye aj Israel e oc tzokpaj cyiꞌj mastl tiyjil Benjamín tuj teyle junjun tnam, e cub cybyoꞌn cycyakil tuꞌn spad, cyucꞌix ke alumaj tucꞌix tcyakilju o cnet cyuꞌn, ex oc cykꞌoꞌn cykꞌakꞌal tnam.