4 Tuj juntl kꞌij primxix e jaw weꞌ aj Israel, jaw cybinchaꞌn jun altar ex xi cykꞌoꞌn oyaj te Kman, akeju patun in che cub, cyucꞌix ke chojbil te mojbabl tibil. 5 Ex in cymaꞌntok cyxolx: ¿Alcye jun kxol mintiꞌ o ten tuj buyj tibil oc tuj Mizpa? Porque otok txi cytziyan jun yol axix toc tuꞌn tcub cybyoꞌn akeju mintiꞌ e ten tuj buyj tibil.

6 Nimxix in che bisuntok aj Israel tiꞌj ju otok baj cyiꞌj tiyjil Benjamín, akeju cyerman, ex in cymaꞌntok: Jaꞌlo ma naj jun cꞌloj cyiyjil aj Israel. 7 ¿Ti cbantel kuꞌn tuꞌn tcnet cyxuꞌjil tiyjil Benjamín, akeju ma che cyaj ankꞌin? Porque o txi ktziyan jun yol axix toc twitz Kman, tuꞌn miꞌn t-xi kkꞌoꞌn ambil tuꞌn cymojeꞌ ke kmeꞌjel cyucꞌil. 8 ¿Atpe jun cꞌloj kiyjil mintiꞌ pon tyecꞌun tib twitz Kman tuj Mizpa? Che chi.

Eltzun cynicꞌ tiꞌj ka mi jun aj Jabes aju at tuj txꞌotxꞌ Galaad otok ten tuj buyj tibil, 9 porque tej tjaw list, mi jun cye ke xjal najl tuj lugar lu o tzaj tzakꞌwente. 10-11 Entons cyuꞌn enter tnam xjal e jeꞌx samaꞌn cablaj mil soldad, akeju cyuw cycꞌuꞌj tuj kꞌoj, ex xi kꞌoꞌn orden cye tuꞌn tcub cybyoꞌn tuꞌn spad cycyakil ke xinak najlke tuj tnam Jabes, cyucꞌix ke cꞌwaꞌl ex ke xuꞌj otok cyilxi xinak. 12 Cyxol keju najlke tuj tnam Jabes e cnet cyaje syent kꞌapoj naꞌnxtok cylonte xinak, ex e tzajtzun cyiꞌn tuꞌn cyul tuj campament tcubsaꞌn tuj Silo, tuj txꞌotxꞌ Canaán. 13 Cycyakiltzun tnam xjal e kꞌmante tuꞌn cyxiꞌ junjun xjal kꞌmalte cye tiyjil Benjamín, akeju ateꞌtok tuj pic Rimón, tuꞌn miꞌn cucx tten kꞌoj cyxol. 14 E ajtztzun meltzꞌaj ke tiyjil Benjamín ex atzun cye aj Israel xi cykꞌoꞌn cye akeju xuꞌj otok che tzaj cyiꞌn tuj tnam Jabes, pero mintiꞌ e canun ke xuꞌj lu cye cycyakil.

15 Atzun cye aj Israel tzaj tzꞌeꞌy cycꞌuꞌj cyiꞌj ke tiyjil Benjamín, tuꞌnju otok txi tkꞌoꞌn Kman ambil tuꞌn tnaj jun cꞌloj cyiyjil aj Israel. 16 Atzun ke nejenel cye tnam xjal in cymaꞌntok cyxolx: ¿Tzaꞌn tten cnetel cyxuꞌjil ke mastl kuꞌn? Porque ke xuꞌj tiyjil Benjamín biꞌx o che naj cycyakil. 17 Ate Benjamín il tiꞌj cucx ctel toclen cyxol ke kiyjil nok cyuꞌn keju o che cyaj ankꞌin, tuꞌntzun miꞌn tnaj jun cꞌloj tiyjil Israel. 18 Atzun ke mlay bant cheꞌx kkꞌoꞌn kmeꞌjel tuꞌn cymojeꞌ cyucꞌil, porque kcyakil aj Israel koꞌ o txi ktziyan jun yol axix toc tuꞌn miꞌn cyxi kkꞌoꞌn kmeꞌjel cye tiyjil Benjamín, tuꞌntzun miꞌn ttzaj mya baꞌn kibaj. 19 Pero cycyakil abkꞌi nnoꞌc jun nintz ninkꞌij te Kman tuj Silo, aju tcubsaꞌn tuj tbankꞌab kꞌij te tnam Betel, tuj tjawitz kꞌij te be in xiꞌ tuj Betel tuꞌn tpon tuj Siquem, ex tuj tnayaj kꞌij te tnam Lebona, che chi.

20 Xitzun cysamaꞌn ke nejenel cye aj Israel ju tkanil lu cye tiyjil Benjamín: Cyxiꞌye ex cyewanx cyibe cyxol tkan uva ateꞌ nikayin tiꞌj tnam Silo, 21 ex listtzun che tencuye. Octzun cyetz ke txin ateꞌ tuj Silo tuj cꞌlojin cyten ex in che bixun, ax icxtzun cyeye bix che etze tuj lugar jatum cyewan cyibe, ex teyle junjun cyeye baꞌn tuꞌn t-xi telkꞌaꞌn jun txin te t-xuꞌjil, ex biꞌxtzun che aje tuj cytxꞌotxꞌe. 22 Ex katzun ma che ul cyman ex ka cyerman ke txin kꞌmalte keye, cxeltzun kmaꞌne cye cyjaꞌ: In ko cubsane cywitze tuꞌn tcub cynajsaꞌne cyil ke jlu, porque mintiꞌ ma che cnet xuꞌj kuꞌne te cye cycyakil tuj kꞌoj oc tuj tnam Jabes. Ax icx, como mya cyuꞌne ma cheꞌx cykꞌoꞌne, cyjaꞌtzun mintiꞌ cyile tiꞌj ju yol axix toc o txi cytziyane.

23 Atzun cye tiyjil Benjamín baꞌn ela tuj cywitz tuꞌn tbant cyuꞌn icju, cyjaꞌtzun, teyle junjun cye xi telkꞌaꞌn jun txin, akeju in che bixuntok, ex xi cyiꞌn tuꞌn toc te cyxuꞌjil. E ajtzun tuj cytxꞌotxꞌ ex jaw cybinchaꞌn juntl maj ke tnam ex e najan cyuj.

24 Ax icx ke mastl aj Israel e aj meltzꞌaj, ex teyle junjun xiꞌ tuj tex ttxꞌotxꞌ, cyxol tex tiyjil ex cyxol keju at cyxilen cyucꞌil.

25 Tuj tkꞌijlalil lu, mintiꞌtok rey cyxol aj Israel ex teyle junjun in tbinchaꞌntok nok alcye baꞌn tuj twitz.