—Weye ma chin tijine ex ma tzꞌel nim abkꞌi wuꞌne. 3 Ma cyile tcyakilju ma tbincha Kman cyiꞌj cycyakil tnam akeju jaw cyiꞌn cyib cyiꞌje, ex ate Kman ma tzꞌonin cyiꞌje tuj kꞌoj. 4 Tuꞌn swert ma cub nsipane tcyakil txꞌotxꞌ lu cyxol cycyakil cꞌloj cyiyjile. Ma cub nsipane aju txꞌotxꞌ ma tzyet, tucꞌix ju txꞌotxꞌ naꞌnx ttzyet, xiꞌynix ttzi nima Jordán tuj tjawitz kꞌij ex ponin baj max ttzi Nintz mar tuj telex kꞌij. 5 Che elex tlajoꞌn Kman cycyakil keju najl tuj txꞌotxꞌ lu; atzun cyeye che etzale tiꞌj ic tzaꞌnx o tzaj ttziyan Kman Dios.

6 Cykꞌonque tilil tuꞌn tjapun cyuꞌne tcyakil aju in tmaꞌn tuj libro te tley Moisés, ex miꞌn tzꞌel cypaꞌn cyibe tiꞌj ju in tmaꞌn. 7 Miꞌn baj cysmon cyibe cyucꞌil ke xjal te mastl nasyon ateꞌ cyxole. Miꞌn che cꞌulune cywitz ke cydios ex miꞌn che ajbene cye; miꞌlpe tzaj cynaꞌne cybi ke cydios, ex miꞌn tzꞌajben cybi cyuꞌne te cyuwsabl jun yol. 8 Cucx che lpeque tiꞌj Kman Dios, ic tzaꞌnx in bant cyuꞌne jaꞌlo. 9 Cywitze ma che ex tlajoꞌn Kman ke nasyon matij ex nimxix cyipun, ax icx jaꞌlo mi jun in cub twaban tib cywitze. 10 Nok tuꞌn junx xinak cyxole jacu tzꞌel ok jun mil xinak, porque ate Kman in onin cyeye tuj kꞌoj ic tzaꞌnx o tzaj ttziyan. 11 Ten nim cycwente cyiꞌje tuꞌn cycꞌujlanteye Kman Dios. 12 Porque ka ma tzꞌel cypaꞌn cyibe tiꞌj Dios, ex ka ma baj cysmon cyibe cyucꞌil ke xjal ma che cyaj ten cyxole, ex ka ma che jaw mojeꞌye cyucꞌil ke xuꞌj ateꞌ cyxol ke xjal lu, 13 axix toc mlay che ex tlajoꞌn Kman ke xjal lu cyxole, nok oꞌcx che cyjel tkꞌoꞌn ic tzaꞌn jun cꞌobil ex ic tzaꞌn jun tramp tuꞌn cycub tzꞌake tuj, ex ic tzaꞌn jun asyal tuꞌn t-xi jatoꞌn ttzal cyiꞌje, ex ic tzaꞌn jun chꞌiꞌx tuj tbakꞌ cywitze ocxi cybaj naje twitz ju txꞌotxꞌ tbanilxix aju ma txi kꞌoꞌn cyeye tuꞌn Kman Dios.

14 Weye ya chꞌix ncyime, pero wajbile tuꞌn telxix cynicꞌe tiꞌj tuꞌn tcyakil cyanmiye ex tuꞌn tcyakil cycꞌuꞌje ax toc ma japun tuꞌn Kman tcyakilju baꞌn o tzaj ttziyan. Mintiꞌ jun yol aju o tzaj ttziyan miwt ma japun tuꞌn. 15 Pero ic tzaꞌnx ma japun tcyakilju baꞌn tuꞌn Kman, aju o tzaj ttziyan, ax icxtzun ctzajel tiꞌn tcyakil txcaj mya baꞌn cyibaje, ocxi cybaj naje twitz txꞌotxꞌ tbanilxix, aju ma txi tkꞌoꞌn cyeye, 16 ka miꞌn ma japun cyuꞌne aju yol ma cyaj bant tiꞌj tuꞌn Kman cyucꞌile. Ex ka ma cheꞌxe cꞌulul cywitz junxitl dios, ex ka ma che cub ẍmejeꞌye cywitz, ctzajel tkꞌoj Kman cyiꞌje, ex jurattzun che najele tuꞌn twitz txꞌotxꞌ tbanilxix aju ma txi tkꞌoꞌn cyeye, chi Josué.