Tej cyaj meltzꞌaj ke tiyjil Rubén, tiyjil Gad ex mij tiyjil Manasés
22
E tzajtzun ttxcoꞌn Josué ke tiyjil Rubén cyucꞌix ke tiyjil Gad ex mij tiyjil Manasés, 2 ex xi tmaꞌn cye cyjaꞌ: Ma japun cyuꞌne tcyakilju o tma Moisés cyeye, ex ma japun cyuꞌne tcyakilju xi nmaꞌne cyeye. 3 Tuj enter tyemp ma jatz, ax icx jaꞌlo, mintiꞌ ma cyaj cycoline ke cyermaniye, ex ma japun cyuꞌne aju orden tzaj tmaꞌn Kman Dios. 4 Atzun jaꞌlo ma tzaj tkꞌoꞌn Kman Dios ojlabl cye cyermaniye, ic tzaꞌn tzaj ttziyan. Cyjaꞌtzun cyaj meltzꞌaje tuj cyjaye, tuj txꞌotxꞌ xi kꞌoꞌn cyeye tuꞌn Moisés aju tmajen Kman, tuj tumlal tjawitz kꞌij te nima Jordán. 5 Nok oꞌcx cxel nmaꞌne cyeye tuꞌn cucx cyjapun ke mandamyent cyuꞌne, cyucꞌix ke ley xi kꞌoꞌn cyeye tuꞌn Moisés aju tmajen Kman, tej tmante cyjaꞌ: Cycꞌujlame Kman aju Cydiose, cucx che bete tuj tbe, cynimanxe ke tmandamyent, che lpeque tiꞌj, ex che ajbene te tuꞌn tcyakil cyanmiye ex tuꞌn tcyakil cycꞌuꞌje, chitzun Moisés, chi Josué cye.6-8 Ax icx xi tmaꞌn Josué cye cyjaꞌ:
—Cyajtzune tuj cytxꞌotxꞌe jaꞌlo tucꞌil nimxix kꞌinumabl ex nimcu alumaj, tucꞌix kꞌan pwak, sak pwak, kꞌan cꞌuxbil, cꞌuxbil ex nimcu xbalun. Cysipan cube cyxol cyermaniye aju ma tzꞌel cyiꞌne cye aj kꞌoj.
Te tibajxi jlu e cubtzun cyꞌiwlaꞌn tuꞌn Josué, ex baj cykꞌolben cyib ex e ajtzun cyja. Otok txi tkꞌoꞌn Moisés cytxꞌotxꞌ mij tiyjil Manasés tuj txꞌotxꞌ Basán, ex atzun cye mijtl, xi tkꞌoꞌn Josué cytxꞌotxꞌ cyxol mastl aj Israel tuj telex kꞌij te nima Jordán.
9 Cyjaꞌtzun tten, akeju tiyjil Rubén, cyucꞌix ke tiyjil Gad ex mij tiyjil Manasés, el cypaꞌn cyib cyiꞌj txkantl aj Israel tuj Silo tuj txꞌotxꞌ Canaán, tuꞌntzun cyaj meltzꞌaj tuj cytxꞌotxꞌ tuj txꞌotxꞌ Galaad, aju txꞌotxꞌ otok txi kꞌoꞌn cye, ic tzaꞌnx otok txi tmaꞌn Kman te Moisés.
Aju altar jaw cybinchaꞌn ttzi nima Jordán
10 Tejtzun cypon ke tiyjil Rubén, cyucꞌix ke tiyjil Gad ex cyucꞌix mij tiyjil Manasés ttzi nima Jordán, ateꞌxtok tuj txꞌotxꞌ Canaán, jaw cybinchaꞌn jun matij altar ttzi nima Jordán. 11 Tejtzun cybinte txkantl aj Israel ka ake tiyjil Rubén cyucꞌix ke tiyjil Gad ex mij tiyjil Manasés otok jaw cybinchaꞌn jun altar tuj tmojonil txꞌotxꞌ Canaán, ttzi nima Jordán tuj cytxꞌotxꞌ aj Israel, 12 baj cychmon cyib tuj Silo tuꞌn cyxiꞌ kꞌojlel cyiꞌj. 13 Nej xi cysamaꞌn Finees aju tcyꞌajal pal Eleazar, tuꞌn t-xiꞌ tuj Galaad jatum ateꞌ ke tiyjil Rubén, tiyjil Gad ex mij tiyjil Manasés. 14 Cyucꞌix laj nejenel maꞌxix cyoclen cyxol aj Israel e jeꞌx tucꞌil Finees; jun te teyle junjun cꞌloj cyiyjil, ex nejenel ke cye cycyakil keju at cyxilen cyucꞌil. 15 Cycyakil ke jlu e jeꞌx tuj Galaad jatum ateꞌtok ke tiyjil Rubén, ke tiyjil Gad, cyucꞌix mij tiyjil Manasés, ex xi cymaꞌn cye cyjaꞌ:
16 —Ke tnam xjal etzan tuꞌn Kman cyajbil tuꞌn cybinte tikuꞌn ma che binchane il twitz Kdios akoꞌ aj Israel. ¿Tikuꞌn ma cyaj cycoline ex ma jaw cybinchaꞌne jun altar tuꞌn tjaw cyiꞌn cyibe tiꞌj? 17 ¿Baka nok chꞌin aju il o cybincha aj Israel t-xe witz Peor? Tuꞌntzunju il lu cucx atoꞌx tuj mya baꞌn, masque o che cyim nimcu xjal etzan tuꞌn Dios. 18 Ax icxtzun cyeye jaꞌlo, ma tzꞌel cypaꞌn cyibe tiꞌj Kman. Ka ma jaw cyiꞌn cyibe tiꞌj Kman, ax icx te, nchiꞌjlo tzaj tkꞌoj cyiꞌj cycyakil tnam xjal aj Israel. 19 Katzun mya baꞌn ma tzꞌela tuj cywitze aju txꞌotxꞌ ma cycꞌame, baꞌn tuꞌn cytzaje tuj txꞌotxꞌ te Kman jatum taꞌ tja. Cytzyume jun piẍ txꞌotxꞌ kxole, pero miꞌn jaw cyiꞌn cyibe tiꞌj Kman ex mi kiꞌje, porque ma jaw cybinchaꞌne juntl altar, part tiꞌj altar te Kman aju Kdios. 20 Cynaꞌntze aju tbincha Acán aju tcyꞌajal Zera; o binchan il tuꞌnju tzaj tiꞌn aju otok tma Dios biꞌx tuꞌn tnaj, ex nok tuꞌn te tlaj tzaj tkꞌoj Kman cyiꞌj cycyakil tnam xjal aj Israel, ex mya oꞌcx te Acán o naj tuꞌn tlaj til, che chi.
21 Atzun cye tiyjil Rubén, cyucꞌix ke tiyjil Gad ex mij tiyjil Manasés xi cytzakꞌweꞌn cye ke nejenel cye aj Israel cyjaꞌ:
22 —Ate Kman aju Dios maꞌxix toclen cywitz cycyakil keju nnoꞌc cydiosin xjal, baꞌn tuꞌn alcye in ko ximane tiꞌj, ax icx cyeye baꞌn tuꞌn cybinteye; katzun in ko ximane tiꞌj tuꞌn tjaw kiꞌn kibe tiꞌj, ex ka tuꞌn tel kpaꞌn kibe tiꞌj, baꞌntzun tuꞌn tcub kcastiwoye tuꞌn. 23 Katzun ma jaw kbinchaꞌne ju altar lu tuꞌn tel kpaꞌn kibe tiꞌj Kman, ex ka tuꞌn tcub kpatune oyaj tibaj, akeju patun in che cub, ex ka ke oyaj tiꞌj twitz awal ex ka ke chojbil te mojbabl tibil, baꞌn tuꞌn koque tuj xjel tiꞌj tuꞌn Kman. 24 Ax toc ma kbinchaye jlu porque miꞌn kajbile tuꞌn cymante ke cycꞌwaꞌle mas yajxi cye keju keye kcꞌwaꞌl: ¿Ti cyoclene tiꞌj Kman aju Cydios aj Israel? 25 Ate Kman ma cub kꞌonte nima Jordán te mojon kxol, akeye tiyjil Rubén ex tiyjil Gad, cyjaꞌtzun mintiꞌ cyoclene tiꞌj Kman, mya yajcu che chi. Cyjaꞌtzun, mya yajcu cyuꞌn cyeye cycꞌwaꞌl jacu bant tuꞌn miꞌn cyniman te Kman keju keye kcꞌwaꞌl. 26 Cyjaꞌtzun cub kximane tuꞌn tjaw kbinchaꞌne jun altar, pero mya tuꞌn tajben te patbil oyaj te Kman, ex mi tuꞌn tcub kꞌot juntl chojbil tibaj, 27 nok oꞌcx tuꞌn tajben te jun techal te cyeye ex te keye ex te cye ke kiyjil che ul itzꞌj te tibajxi, tuꞌntzun kajbene te Kman ex tuꞌn kpone tuj tja cyucꞌil koyaje patun in che cub, cyucꞌix ke chojbil il ex ke chojbil te mojbabl tibil. Cyjaꞌtzun, akeju cyiyjile mlay txi cymaꞌn cye ke keye kiyjile cyjaꞌ: Cyeye mintiꞌ cyoclene tiꞌj Kman, jacu che chi. 28 Cyjaꞌtzun o kmaye: Ka at jun ma kꞌmante jlu keye ex ka cye ke kiyjile che ul itzꞌj te tibajxi, atzun keye jacu txi ktzakꞌweꞌne cyjaꞌ: Cyqueꞌyinxe aju altar jaw cybinchaꞌn ke kxeꞌchele, ic queꞌyin ic tzaꞌn altar in ajben te Kman, pero mya tuꞌn tcub patit oyaj tibaj ex mi ke chojbil, nok oꞌcx tuꞌn tajben te jun techal kxol, che chilo. 29 Awt Dios onin keye tuꞌn miꞌn tjaw kiꞌn kibe tiꞌj, ex tuꞌn miꞌn tcyaj kcoline tuꞌnju ma jaw kbinchaꞌne juntl altar, porque mya tuꞌn tcub patit oyaj tibaj, ex mi tuꞌn tcub kꞌot oyaj twitz awal ex ka tuꞌn tcub patit txkantl chojbil tibaj altar lu, nok oꞌcx cbel kꞌot chojbil ex oyaj tibaj altar tcubsaꞌn twitz tja Kman aju Dios, che chi xi cymaꞌn.
30 Atzunte pal Finees, cyucꞌix ke nejenel cye tnam xjal ex ke nejenel cye junjun cꞌloj cyiyjil aj Israel, akeju ucꞌin tuꞌn Finees, tej cybinte aju o cyma ke tiyjil Rubén, ke tiyjil Gad ex mij tiyjil Manasés, baꞌn eꞌla jlu tuj cywitz. 31 Atzunte Finees aju tcyꞌajal pal Eleazar, xi tmaꞌn cye:
—Matzun tzꞌel knicꞌe tiꞌj jaꞌlo ka ax taꞌ Kman kucꞌil, porque mintiꞌ ma jaw cyiꞌn cyibe tiꞌj, ex cyjaꞌtzun ma ko clet cyuꞌne tuꞌn miꞌn tcub kcastiw tuꞌn Kman.
32 Te tibajxi jlu, baj tkꞌolben tib Finees cyucꞌil, ax icx ke nejenel ucꞌin tuꞌn baj cykꞌolben cyib cyucꞌil, e ajtztzun meltzꞌaj tuj txꞌotxꞌ Galaad tuꞌn cyul tuj txꞌotxꞌ Canaán jatum ateꞌtok ke aj Israel. Tejtzun t-xi cymaꞌn cye keju ateꞌ tuj Canaán aju otok tzaj cytzakꞌweꞌn ke txkantl cyiyjil, 33 aju tzakꞌwebl lu baꞌn eꞌla tuj cywitz ex jaw cynimsaꞌn tbi Dios. Tuꞌntzun jlu ya mintiꞌtl e yolin tuꞌn cyoc tzokpaj cyiꞌj ke tiyjil Rubén ex tiyjil Gad ex mi tuꞌn tnaj cytxꞌotxꞌ cyuꞌn. 34 Atzun ke tiyjil Rubén, cyucꞌix ke tiyjil Gad, oc cykꞌoꞌn tbi altar lu Testiw, tuꞌnju cyma: Atzunju altar lu cꞌajbel te testiw kxol, ka atzun Kman Diosju.