2 At jun kꞌij xi tmaꞌn Rut te Noemí:

—Kꞌontza ambil weye tuꞌn nxiꞌye tuj cojbil, kapelo at jun xjal jacu tzaj tkꞌoꞌn ambil weye tuꞌn woc lpeꞌye sucwil tiꞌj.

—Baꞌn tuꞌn t-xiꞌya wal, chi Noemí te.

3 Xiꞌtzun Rut tuj cojbil, ex oc ten sucwilte sebad aju in cyaj naj cyuꞌn ke majen. Ex tcꞌulbacu, a canun tuj tcojbil Booz aju at t-xilen ktzan Elimelec tucꞌil. 4 Pontzun Booz, tzajnitok tuj Belén ex e jeꞌx tkꞌolbeꞌn ke tmajen:

—Awt Kman ten cyucꞌile, chi Booz cye tmajen.

—Awt Kman cyꞌiwlan teya, che chi majen te Booz.

5 Xi tkanin Booz te tcaporal:

—¿Alcye tman txin lu?

6 Atzunte caporal xi ttzakꞌweꞌn:

—Aj Moab te txin lu, aju o tzul junx tucꞌil Noemí. 7 Ma tzaj tkanin weye tuꞌn t-xi lpeꞌ sucwil sebad cyiꞌj ke majen; xtzyet-x tuꞌn prim mayꞌ, ex matzun ma cub ten chꞌin ojlal jaꞌlo.

8 Xitzun tmaꞌn Booz te Rut:

—Txin, bintza nej, miꞌn txiꞌya sucwil sebad tuj tcojbil juntl xjal. Ax tena tzalu cyucꞌil ke nmajene xuꞌj, 9 ex lpexa cyiꞌj jatum in che akꞌnan. Ma txi nmaꞌne cye nmajene tuꞌn miꞌn cylabt tiꞌja. Oc ttzaj txket tiꞌj tcꞌuꞌja, bix txiꞌya cꞌal aꞌ jatum ateꞌ ke xar tcubil cycꞌa majen, chi Booz.

10 Atzunte Rut cub ẍmejeꞌ ex pon tacl tibaj twitz max twitz txꞌotxꞌ te jun yecꞌbil te nimbil twitz Booz, ex xi tmaꞌn te:

—¿Tzaꞌn tten ma tbinchaya xtalbil weye ex ma tzꞌoc ten tcwenta wiꞌje porque akine stranjer xjal?

11 Atzunte Booz xi ttzakꞌweꞌn:

—Ma nbiye tcyakilju baꞌn o tbinchaya tiꞌj tliba atxix tej tcyim tchmila, ex ma cyaj tkꞌoꞌna tmana tucꞌix ttxuꞌya ex ttanmiya nok tuꞌn tula najal kxole, masque miꞌn ojtzkiꞌn koꞌye tuꞌna. 12 Awt Kman kꞌonte t-xel teya. Aju Kman aju Kdios aj Israel koꞌ, awttzun kꞌonte jun oyaj teya tiꞌj tcyakilju baꞌn ma tbinchaya, tuꞌnju ma tzꞌoc keꞌ tcꞌuꞌja tiꞌj tuꞌn tcleta, chi Booz.

13 Atzunte Rut xi ttzakꞌweꞌn:

—Tat, cucxwit tbinchaya xtalbil weye. Ma kꞌukbanjtz ncꞌuꞌje tuꞌn tyola, ex ma yolina wucꞌile tucꞌil tcꞌujlalila, masque mya junx taꞌ woclene ic tzaꞌn ke tmajena xuꞌj, chi Rut.

14 Tej tpon or te wabl, tzajtzun txcoꞌn Rut tuꞌn Booz ex xi tmaꞌn te:

—Tzaja tzalu, kꞌinx tpana ex muncuꞌxa tuj vinagr.

Cubtzun keꞌ Rut cytxlaj majen ex xi tkꞌoꞌn Booz chꞌin twitz sebad txꞌilsaꞌmaj te. O waꞌn Rut tejxi tnoj tcꞌuꞌj ex atx cyaj ten tuꞌn. 15 Xiꞌtzun Rut juntl maj sucwil sebad ex xitzun tmaꞌn Booz cye ke tmajen:

—Baꞌn tuꞌn t-xi tiꞌn txin chꞌin twitz sebad, aju at cyxol junjun cheꞌl, ex miꞌn tzꞌoc cymayoꞌne tiꞌj. 16 Ex baꞌn tuꞌn tel cyxoꞌne junjun chyuj twitz sebad tiꞌj junjun cheꞌl, tuꞌntzun tjaw tchmoꞌn aju nneꞌl tzꞌak, ex miꞌn tzꞌoc cymayoꞌne tiꞌj, chi Booz.

17 O sucwin Rut sebad tuj tcojbil Booz tejxi tex kꞌij, ex tcyakilju otok chmet tuꞌn oc ten bajulte, ex chꞌixmi cab arrob twitz el. 18 Ajtzun Rut tuꞌn tpon tuj tnam ikan twitz sebad tuꞌn. Tejtzun tpon, xi tyecꞌun te tlib aju otok chmet tuꞌn, ax icx jatz tiꞌn aju wabj mintiꞌ otok baj tuꞌn ex xi tkꞌoꞌn te Noemí.

19 Xitzun tkanin Noemí te Rut:

—¿Jatum ma txi aja sucwil jaꞌlo? ¿Jatum ma cnet nim twitz sebad tuꞌna? Cyꞌiwlaꞌnxwit aju xjal ma tzꞌonin teya.

Xitzun tmaꞌn Rut te tlib alcye tajwil cojbil jatum otok xi aj sucwil.

—Aju xinak tajaw cojbil jatum ma chin sucwine, Booz tbi, chi Rut.

20 Ex xitzun tmaꞌn Noemí te:

—Awt Kman cyꞌiwlante xinak lu. Ate Dios ma tbincha xtalbil ke ic tzaꞌn o tbincha ojtxi cye ktzan kchmil. Ate xinak lu at t-xilen cyucꞌil ktzan kchmil, ex tuꞌntzun jlu at toclen kiꞌj tuꞌn koc tcwentin.

21 Ex xi tmaꞌntl Rut te tlib:

—Ax icx ma tma Booz weye ax tuꞌn npone sucwil cytxlaj ke tmajen max ocxi tjaw baj sebad tucꞌix triw.

22 Xitzun tmaꞌn Noemí te Rut:

—Ax baꞌn icju wal, baꞌn tuꞌn ttena cyxol ke xuꞌj tmajen Booz, ex tuꞌn miꞌn t-xiꞌya tuj juntl cojbil, tuꞌntzun mi jun tuꞌn tlabt tiꞌja, chi Noemí.

23 Cyjaꞌtzun, ax xiꞌ Rut sucwil cytxlaj ke tmajen Booz tejxi tjaw baj sebad ex triw. Ex axtok najl tucꞌil tlib.