—Aya wal, cxel njyoꞌne jun tchmila tuꞌntzun tankꞌina baꞌn tucꞌil. 2 Bintza, ate Booz at kxilen tucꞌil ex atzun tajwil txꞌotxꞌ jatum xi aja sucwil. Tuj konicꞌan jaꞌlo cxeꞌl tuj cojbil tuꞌn tel tpaꞌn twitz sebad tiꞌj tkan. 3 Jaꞌlotzun bincham ttena, txꞌjon baj tiba, kꞌonca perjum tiꞌja, kꞌonca t-xbaluna mas tbanilxix, ex t-xiꞌtzuna jatum in baj bujet sebad tuꞌn tel ttxcꞌomel. Pero miꞌn txi tyecꞌun tiba twitz Booz ka naꞌnxtok tbaj waꞌn ex tbaj cꞌan. 4 Kꞌonca cwent tiꞌj jatum cbel tan, ex octzun ticꞌ tan bix txi lakꞌeya ttxlaj, ex bix tzꞌel tiꞌna ttxoꞌw tiꞌj tkan, ex axtzun cbel tana t-xe tkan. Axtzunte ckꞌmalte teya alcye tuꞌn tbinchanteya, chi Noemí. 5 Atzunte Rut xi ttzakꞌweꞌn:

—Oc nbinchaꞌye tcyakil aju ma tmaya.

6 Xiꞌtzun Rut jatum in baj bujet sebad, ex tbinchatzun tcyakil aju otok tma tlib te. 7 Tejtzun tbaj waꞌn Booz ex tej tbaj cꞌan o tzalaj, ex xiꞌtzun tal ttxlaj jun chꞌukuj twitz sebad. Te yajxitzun chꞌintl, cheba xi lakꞌeꞌ Rut ex mintiꞌ o kꞌajt, eltzun tiꞌn xnokꞌal tiꞌj tkan Booz ex cubtzun tan t-xe tkan. 8 Eltzun twatl Booz tmij akꞌbil, jaw txaleꞌ ex biꞌx jaw secꞌpaj tej ttil lu jun xuꞌj in tan t-xe tkan.

9 Xitzun tkanin Booz te:

—¿Alcyeya?

—Akine Rut aju tmajena, aya at t-xilena tucꞌil ktzan nchmile, cyjaꞌtzun at toclena wiꞌje tuꞌn woc tcwentina ex tuꞌn tmojeꞌya wucꞌile, chi Rut xi ttzakꞌweꞌn.

10 Xi tmaꞌn Booz te Rut:

—Awt Kman cyꞌiwlante teya txin, puro baꞌn ma tbinchaya tuꞌnju cꞌujlaꞌn nana tliba tuꞌna, ex masxix baꞌn ma tbinchaya jaꞌlo ic tzaꞌn nej, porque mawtlo cnet juntl tchmila mas cuꞌxun nwitze, ka kꞌinun ex ka meba, pero mintiꞌ ma tbinchaya jlu. 11 Miꞌn xoba txin, cycyakil xjal tuj ntanmiye baꞌn cyuꞌn aya jun xuꞌj baꞌn tmod, cyjaꞌtzun cbantel wuꞌne aju in tkanina weye. 12 Masque ax toc akine at chꞌin nxilene tucꞌil ktzan tchmila, pero at juntl xinak mas at-xix t-xilena tucꞌil. 13 Tencja tzalu te konicꞌan jaꞌlo, atzun nchiꞌj, ka tajbil xinak lu tuꞌn tjapun costumr tuꞌn tuꞌn tnajan tucꞌil jun xjal at t-xilen tucꞌil, e tbant tuꞌn. Ka miꞌn ma bant tuꞌn, cxeltzun ntziyane teya jun yol axix toc twitz Dios tuꞌn tbant wuꞌne. Tanxtzuna jaꞌlo ocxi tcub kꞌij, chi Booz.

14 Axtzun o tan Rut te konicꞌan t-xe tkan Booz. Primx jaw weꞌ te juntl kꞌij, naꞌnxtok tcub spicꞌun, kloljxtok taꞌ twitz txꞌotxꞌ, porque tma Booz: Mi jun tuꞌn tbinte ka otok tzul aj jun xuꞌj tal jatum nneꞌl bujet sebad.

15 Ex xitzun tmaꞌn Booz te Rut:

—Kꞌiꞌmel t-xmuja ex licꞌpun ela.

Eltzun tlicꞌpuꞌn Rut t-xmuj, ex cuꞌx tkꞌoꞌn Booz kak almi sebad tuj, jax tkꞌoꞌn Booz iktz twi t-semil Rut, ex ajtzun Rut tuj tnam.

16 Tejtzun tcanun Rut tucꞌil tlib, xi tkanin tlib te:

—¿Tzaꞌn ma tzꞌel tbeya, wal?

Xitzun ttxꞌolbaꞌn Rut tcyakilju otok tbincha Booz te, 17 ex tmatl Rut:

—Ma tzaj tkꞌoꞌn kak almi sebad lu weye, ex saj tmaꞌn weye: Mlay tzꞌaj meltzꞌaja tucꞌil tliba mintiꞌ chꞌin kꞌiꞌn tuꞌna.

18 Atzunte Noemí xi tmaꞌn te Rut:

—Jaꞌlo wal, oꞌcx ayona tiꞌj ti cbajel. Aju xinak lu mlay tzꞌojlan chꞌin maxi oc tbant tiꞌj jlu.