Tej tmojeꞌ Booz tucꞌil Rut
4
Xiꞌtzun Booz ex cub keꞌ ttzi tpwertil tnam jatum nnoꞌc cychmon cyib xjal. Tcꞌulbacu ocx aju xinak mas at t-xilen Rut tucꞌil, aju otok yolin Booz tiꞌj.Ex xi tmaꞌn Booz te:
—Kꞌayn, lakꞌetza tzalu ex kecuya.
Tzajtzun lakꞌeꞌ xjal at t-xilen Rut tucꞌil ex cub keꞌ. 2 E tzajtzun ttxcoꞌn Booz laj tij xjal te tnam ex xi tmaꞌn cye tuꞌn cycub keꞌ ttxlaj. 3 Tejtzun cycub keꞌ, xi tmaꞌn Booz te xjal at t-xilen tucꞌil:
—Ate Noemí aju xiꞌ aj tuj Moab ma cub t-ximan tuꞌn t-xi tcꞌayin ttxꞌotxꞌ ktzan Elimelec, aju at kxilen tucꞌil. 4 Wajbile tuꞌn tbinteya. Ka at tganiya tiꞌj tuꞌn tcyaj tlakꞌoꞌna, kꞌmantza jaꞌlo cywitz ke testiw lu ex cywitz ke cytijil xjal te tnam. Como aya mas at t-xilena tucꞌil Elimelec, at toclena tiꞌj tuꞌn tcyaj tlakꞌoꞌna ttxꞌotxꞌ. Katzun miꞌn taja tuꞌn tcyaj tlakꞌoꞌna kꞌmantza weye, porque te tibajxiya, akine at woclene tiꞌj tuꞌn tcyaj nlakꞌoꞌne, chi Booz.
Xitzun ttzakꞌweꞌn xjal at t-xilen tucꞌil:
—Jacu cyaj nlakꞌoꞌne.
5 Ax icx xi tmaꞌntl Booz te:
—Ka ma cyaj tlakꞌoꞌna txꞌotxꞌ te Noemí, ax icx il tiꞌj tuꞌn tmojeꞌya tucꞌil Rut aju meba xuꞌj aj Moab, tuꞌntzun miꞌn tnaj tbi ktzan tchmil tiꞌj txꞌotxꞌ.
6 Xi ttzakꞌweꞌn xinak aju at t-xilen Rut tucꞌil:
—Ka ic ttenju mlay cyaj nlakꞌoꞌnwe txꞌotxꞌ, porque oc ncyime jacu bant tcyaj ten txꞌotxꞌ lu te juntl ex mya cye ke ncꞌwaꞌle. Katzun taja tuꞌn tcyaj tlakꞌoꞌna txꞌotxꞌ, jacu txi nkꞌoꞌne oclenj teya tuꞌn tcyaj tlakꞌoꞌna, chi xjal.
7 Tuj tkꞌijlalil ojtxi attok jun costumr cyxol aj Israel: Oc t-xi tkꞌoꞌn jun xjal toclen te juntl aju at t-xilen tucꞌil, ex ka ma mojeꞌ jun cyyol tiꞌj jun cytrat, alcye in xi tkꞌoꞌn toclen te juntl, ex ka in xi tcꞌayin jun tiꞌxti, nneꞌl tiꞌn jun t-xajab ex in xi tkꞌoꞌn te lokꞌol. Atzun jun cyuwsabl cyyol aj Israel tiꞌj ju cytrat. 8 Atzunte xjal at t-xilen tucꞌil Booz xi tmaꞌn:
—Lakꞌoncja. Ex el tiꞌn jun t-xajab ex xi tkꞌoꞌn te Booz.
9 Atzunte Booz xi tmaꞌn cye cytijil xjal ex cye mastl xjal ateꞌtok cyucꞌil:
—Akeye testiw wiꞌje, ya jaꞌlo ma cyaj nlakꞌoꞌne te Noemí aju cytxꞌotxꞌ ktzan Elimelec, Quelión ex Mahlón. 10 Ax icx testiw keye wiꞌje tuꞌn tjaw wiꞌne Rut te nxuꞌjile, aju meba xuꞌj aj Moab, tuꞌntzun miꞌn tnaj tbi Mahlón tiꞌj ttxꞌotxꞌ ex tuꞌn miꞌn tnaj tbi Mahlón cyxol ke terman aju ktzan tchmil Rut, ex tuꞌn miꞌn tnaj tbi tuj tnam lu. Akeye testiw wiꞌje jaꞌlo, chi Booz.
11 Cycyakil ke xjal in che bintok tiꞌj, cyucꞌix ke cytijil xjal tzaj cytzakꞌweꞌn:
—Ax toc, akoꞌye testiw tiꞌja. Oc tpon xuꞌj lu tuj tjaya, tzꞌocxwit tuꞌn Kman ic tzaꞌn te Raquel ex Lea, porque cyiꞌjtzun ke xuꞌj lu tzaj xeꞌt cyiyjil aj Israel. Atzun teya tzꞌocxa jun xinak maꞌxix toclen tuj Efrata, ex che yolinwt xjal baꞌn tiꞌja tuj Belén. 12 Awt Kman tzaj kꞌonte nim tcꞌwaꞌla tiꞌj xuꞌj lu, ex chmet-xwit tiyjila ic tzaꞌn tiyjil Farez aju tcyꞌajal Judá, aju ul itzꞌ tiꞌj Tamar, che chi xjal.
13 Cyjaꞌtzun tten o mojeꞌ Booz tucꞌil Rut, ex tej tcub tmojban tib tucꞌil, xi tkꞌoꞌn Kman ambil tuꞌn toc ten tal Rut ex tzaj jun tal xinak.
14 Atzun cye xuꞌj xi cymaꞌn te Noemí:
—Nimanxwit tbi Kman tuꞌnju ma tzaj tkꞌoꞌn jun tal tchmana tuꞌn toc cwentina tuꞌn. Cuchiwt tzꞌoc te maꞌ toclen cyxol aj Israel. 15 Ate kꞌa lu ckꞌukbalte tcꞌuꞌja ex cꞌoquel cꞌaꞌchana tuꞌn oc ttijina, porque tal tliba aju cꞌujlaꞌnxixa tuꞌn, porque nokwit at wuk tala pero maswitlo maꞌ toclen tliba cywitz.
16 Tzajtzun tpaloꞌn Noemí tal neꞌ, oc tkꞌoꞌn ttzi t-xuꞌc ex cyaj ten neꞌ tuj tcwent tuꞌn tchꞌiy. 17 Tejtzun cyqueꞌyinte ke xuꞌj cyvesin cyib tucꞌil, cyma:
—Ma tzꞌitzꞌj jun tal Noemí, che chi. Obed tbi tal neꞌ oc cykꞌoꞌn. Ate Obed tman Isaí ex tchman David.
Ke t-xeꞌchel David