2 Eltzun winkin abkꞌi tponlen cax tuj Quiriat-jearim, ex cycyakil aj Israel in che bisuntok ex in che cubsantok twitz Kman; 3 cyjaꞌtzun xi tmaꞌn Samuel cye cycyakil aj Israel: Ka ma che ajtz meltzꞌaje tucꞌil Kman tuꞌn tcyakil cyanmiye, il tiꞌj tuꞌn tex cyxoꞌne ke tilbilal nnoꞌc cydiosin xjal cyuj mastl nasyon, cyucꞌix ke tilbilal cydios xjal Astarot tbi, ex oꞌcxtzun tuꞌn cyajbene te Kman ex tuꞌn cycꞌulune oꞌcx te. Ka ma cybinchaye jlu, ate Kman cꞌonil cyeye tuꞌn cyetze tjakꞌ cycawbil aj Filistey, chi Samuel.

4 Extzun cyxoꞌn aj Israel nimcu txcaj tilbilal Baal, ex tucꞌix Astarot akeju cydios, ex oꞌcxtzun e cꞌulun te Kman. 5 Xi tmaꞌntl Samuel cye: Cychmon baje cycyakil ke aj Israel tuj lugar Mizpa, ex jacu chin naꞌne Dios cyiꞌje.

6 Octzun cychmon cyib aj Israel tuj lugar Mizpa, ex jatz cyiꞌn aꞌ tuj lugar ma chixin ex cub cykoꞌn te jun techal ka otok txi cykꞌoꞌn cyanmi te Kman. Tuj kꞌij lu cub cyyoꞌn weꞌyaj ex jatz cypaꞌn cyil twitz Kman. Atzun tuj lugar Mizpa oc Samuel te nejenel cyxol ke aj Israel. 7 Tejtzun cybinte aj Filistey ka otok tzꞌoc cychmon cyib aj Israel tuj Mizpa, cub be cyuꞌn ke nejenel cye tuꞌn cyoc ten kꞌojlel cyiꞌj. Tej cybinte aj Israel jlu, tzaj nim cyxobil cywitz aj Filistey, 8 ex xi cymaꞌn te Samuel: Miꞌn txi tcolina tuꞌn tcubsana kiꞌje twitz Kman aju Kdios, tuꞌntzun kcolpete tuꞌn tuj cykꞌab aj Filistey.

9 Tzajtzun tiꞌn Samuel jun tal ẍneꞌl cucx tchꞌuꞌn, ex cub tpatun tcyakil te jun chojbil te Kman, ex oc ten cubsal twitz Kman cyiꞌj aj Israel, ex tzaj tbiꞌn Dios aju tkanbetz. 10 Tej matok in cub tpatun Samuel tal ẍneꞌl, e pon aj Filistey tuꞌn cyoc ten kꞌojlel cyiꞌj aj Israel; tzajtzun tkꞌoꞌn Kman jun kꞌancyok matij wen cyiꞌj aj Filistey, ex biꞌx e xob tuꞌn, ex cyjaꞌtzun tten cub cyiꞌj cyuꞌn aj Israel. 11 E jeꞌtztzun naj ke aj Israel tuj lugar Mizpa tuꞌn cyoc lpeꞌ cyiꞌj aj Filistey, e oc tzokpaj tuꞌn cykꞌojin cyiꞌj, ex maxtzun e weꞌ tjakꞌxi lugar Bet-car. 12 Tzajtzun tiꞌn Samuel jun abj ex cub tkꞌoꞌn t-xol lugar Mizpa tucꞌil lugar Sen, oc tkꞌoꞌn tbi abj Eben-ezer ex tma: Atzun tbi cꞌoquel porque cucx tonin Kman kiꞌj jaꞌlo.

13 Cyjaꞌtzun cub cyiꞌj aj Filistey ex mintiꞌtl e ocx juntl maj tuj cytxꞌotxꞌ aj Israel tuꞌn cykꞌojin cyiꞌj. Tuj tcyakil tankꞌibl Samuel o che mayet ke aj Filistey tuꞌn Kman. 14 Akeju tnam otok che el cyiꞌn aj Filistey cye aj Israel, tzajnix keꞌ tiꞌj tnam Ecrón ex ponin baj max tiꞌj tnam Gat, e oc juntl maj te cye aj Israel. Cyjaꞌtzun tten cyaj coꞌpj juntl maj cytxꞌotxꞌ aj Israel tuj cykꞌab aj Filistey. Ax icx mintiꞌ kꞌoj o ten cyxol aj Israel cyucꞌil aj Amorrey.

15 O ten Samuel te nejenel cyxol aj Israel tuj tcyakil tankꞌibl, 16 ex tcyakil abkꞌi in xi aj Samuel tuj Betel, ex tuj Gilgal, ex tuj Mizpa, tuꞌn tnucꞌet tiꞌj alcye tuꞌn tbant cyxol aj Israel cyuj ke lugar lu. 17 Te tibajxi nnaꞌjtz tuꞌn tul tuj Ramá jatum taꞌtok tja, ex axtzun in cawin cyibaj aj Israel. Ax icx jaw tbinchaꞌn jun altar te Kman tuj lugar lu.