Xi cykanin aj Israel tuꞌn toc jun cyrey
8
Tejtzun ttijin Samuel, e oc tkꞌoꞌn ke tcyꞌajal tuꞌn cyoc te jwes cyxol aj Israel. 2 Aju tnejel tcyꞌajal Samuel Joel tbi, atzunju tcabin Abías tbi, ex atzun e ten te jwes tuj tnam Beerseba. 3 Pero ke tcyꞌajal mintiꞌ pon cymod ic tzaꞌn te cyman, nok oꞌcx o pon cycꞌuꞌj tiꞌj nimcu, ex in tzaj cycꞌmoꞌn pwak tuꞌn miꞌn tcub cysentens xjal cyuꞌn, ex mintiꞌ in xi cybinchaꞌn tiꞌj xtis tuj tumel. 4 Octzun cychmon cyib cycyakil cytijil xjal cyxol aj Israel, ex e tzaj tuꞌn cyul tuj Ramá tuꞌn cyyolin tucꞌil Samuel tiꞌj jlu, 5 ex xi cymaꞌn te: Ma tzꞌoca tij xjal, ex ke tcyꞌajala mintiꞌ ma che el baꞌn ic tzaꞌn teya; cyjaꞌtzun, baꞌn tuꞌn toc tkꞌoꞌna jun rey tuꞌn tcawin kibaje, ic tzaꞌn in bant cyuꞌn cycyakil nasyon.6 Mya baꞌn eꞌla jlu tuj twitz Samuel. Tuꞌnju o cykana tuꞌn toc jun cyrey tuꞌn tcawin cyibaj, octzun ten Samuel naꞌl Dios. 7 Atzunte Kman tzaj ttzakꞌweꞌn: Cuꞌyinxa nok alcye in cykanin xjal tuꞌn tbant, porque mya aya nneꞌl icꞌun cyuꞌn, nok oꞌcx akine, tuꞌntzun miꞌn ncawintle cyibaj. 8 Atxix tej cyetz wiꞌne tuj Ejipt, ax o cybincha wiꞌje ic tzaꞌn in cybinchaꞌn tiꞌja jaꞌlo, o tzꞌel cypaꞌn cyib wiꞌje tuꞌn cycꞌulun cywitz junxitl dios, ex cucx in cybinchaꞌn jaꞌlo. 9 Cyjaꞌtzun, binchama aju in cymaꞌn, pero naꞌnxtok tuꞌn tbant jlu, biꞌx kꞌmanxa cye tiꞌj tcyakilju cbajel cyiꞌj tuꞌnju rey oc tcawin cyibaj, chi Kman.
10 Xitzun tmaꞌn Samuel aju tzakꞌwebl tuꞌn Kman cye xjal, akeju in che kanin tiꞌj tuꞌn toc jun cyrey, 11 ex xi tmaꞌn cye:
—Atzun tmod rey jlu, aju ccawil cyibaje: Che tzajel tiꞌn ke cycyꞌajale tuꞌn cyoc te soldad; at junjun cxel kꞌoꞌn cyakꞌun tuꞌn cyxiꞌ tuj carwaj tuꞌn cykꞌojin, ex junjuntl cxel kꞌoꞌn cyakꞌun tuꞌn cyxiꞌ tibaj chej tuꞌn cykꞌojin, ex junjuntl cxel kꞌoꞌn cyakꞌun te cwentil te rey oc tex tuj tcarwaj. 12 At junjuntl che oquel kꞌoꞌn te nejenel cye jun milchak soldad, ex atzun junjuntl che oquel kꞌoꞌn te nejenel cye mey syentchak soldad. Ax icx cꞌoquel kꞌoꞌn junjun cyeye te chꞌoquil ttxꞌotxꞌ, ex tuꞌn tjaw chmet twitz tawal, ex tuꞌn cybaj bant ke tmacbil in che ajben tuj kꞌoj, ex tuꞌn cybaj binchet cycyakil txcaj kꞌojbil in che ajben tuj carwaj. 13 Ax icx che tzajel tiꞌn ke cymeꞌjele tuꞌn cyajben te binchalte perjum ex binchalte chibj ex binchalte pan. 14 Cꞌelel tetzan tbanil txꞌotxꞌ, ex tbanil tkan uva, ex tbanil tkan tzeꞌ olivo aju at cyeye jaꞌlo, ex cxel tkꞌoꞌn te cye keju at cyoclen ttxlaj. 15 Cꞌelel tiꞌn tlajiꞌn tiꞌj twitz cyawale ex tiꞌj twitz uva, ex cxel tkꞌoꞌn te cye keju at cyoclen ttxlaj ex cye mastl ajbel te. 16 Ax icx che elel tiꞌn ke cymajene xinak ex ke cymajene xuꞌj, ex ke tbanil cywacẍe, ex ke cyburre, ex che xel tiꞌn tuꞌn cyajben te. 17 Cꞌoquel tkꞌon tib te tajwil ju tlajiꞌn cyiꞌj cyalune, ex ax keye che oquel te tmajen. 18 Ex octzun cycubsane twitz Kman tuꞌn tlaj tbinchben ju rey aju otok jaw cyscꞌoꞌne, ate Kman mlay tzaj tkꞌoꞌn twiꞌ cyiꞌje, chi Samuel cye xjal.
19 Atzun cye xjal mintiꞌ xi cykꞌoꞌn cywiꞌ tiꞌj yol xi kꞌmaꞌn cye tuꞌn Samuel, ex xi cytzakꞌweꞌn: Mala bant-x. Oꞌcx kaje tuꞌn toc jun kreye, 20 tuꞌntzun koque ic tzaꞌn cye mastl nasyon, ex tuꞌn tten jun rey kxole tuꞌn tcawin kibaje ex tuꞌn tcub nej kwitze tuj kꞌoj.
21 Tbajlenxi tbiꞌn Samuel cyyol ke xjal, xi tmaꞌn juntl maj te Kman, 22 atzunte Kman tzaj ttzakꞌweꞌn:
—Binchama aju in che kanin tiꞌj, kꞌon oca jun cyrey.
Xitzun tmaꞌn Samuel cye aj Israel tuꞌn taj teyle junjun tuj ttanmi.