3 At jun kꞌij e jeꞌx tzpet ke ttxu tbur Cis, ex xi tmaꞌn te tcyꞌajal aju Saúl tbi:

—Bincham ttena ex txiꞌya jyol cye bur. Ex ucꞌinx jun tucꞌila cyxol ke majen xinak.

4 Xiꞌtzun Saúl ex icꞌ aj tuj tiwitz txꞌotxꞌ cye aj Efraín ex tuj lugar Salisa, pero mintiꞌx e cnet ke bur tuꞌn. Ax icx icꞌ aj tuj lugar Saalim tbi, ex tuj cytxꞌotxꞌ aj Benjamín, ax icx mintiꞌ e cnet tuꞌn. 5 Tej cypon tuj lugar Zuf tbi, xi tmaꞌn Saúl te majen aju ucꞌin tuꞌn:

—Ko aj meltzꞌaj, mya yajcu in bisun nmane kiꞌj, ex balo mintiꞌtl in bisun cyiꞌj ke ttxu bur.

6 Atzunte majen xi ttzakꞌweꞌn:

—Tuj tnam lu at jun t-sanjel Dios, ex puro niman cyuꞌn cycyakil xjal, porque tcyakilju in tzaj tmaꞌn in japun. Koꞌ tucꞌil, balo jacu tzaj tmaꞌn ke alcye be tuꞌn t-xi kiꞌn. 7 Xi ttzakꞌweꞌn Saúl:

—Koꞌ, pero ¿titzun chꞌin cxel kiꞌn teju xinak lu? Mintiꞌtl wabj tuj kpa. Mintiꞌ jun tiꞌxti baꞌn tuꞌn t-xi kkꞌoꞌn te t-sanjel Dios.

8 Xitzun ttzakꞌweꞌn majen:

—At jun tal sak pwak wucꞌile. Jacu txi kkꞌoꞌn te t-sanjel Dios tuꞌntzun ttzaj tmaꞌn ke alcye be tuꞌn t-xi kiꞌn.

9 (Tuj tkꞌijlalil ojtxi, ka at jun aj Israel tajbil tuꞌn t-xi tkanin jun t-xjel te Dios, in xi tmaꞌn: Koꞌ tucꞌil ju xjal baꞌn nabin tuꞌn Dios, che chi; porque aju toc tbi jaꞌlo “t-sanjel Dios”, atzun ojtxi “jun xjal baꞌn nabin tuꞌn Dios” tbi.)

10 —E tbant ic tzaꞌn ma tmaya, koꞌtzun tucꞌil, chi Saúl.

Cubtzun be cyuꞌn cycabil tuꞌn cyxiꞌ tuj tnam jatum najltok t-sanjel Dios, 11 ex tej matok in che jax twitz jawl tjakꞌ tnam, oc cycꞌulban cyib cyucꞌil junjun txin cyjaꞌ cyxiꞌ kꞌil aꞌ, ex xi cykanin cye:

—¿Ape taꞌ ju xjal baꞌn nabin tuꞌn Dios tuj lugar lu? 12 Atzun cye txin tzaj cytzakꞌweꞌn:

—Atzunju, pero max taꞌ ma jawnix. Tzꞌoc tililx cykane, yaque ma tzul tuj tnam lu tuꞌn t-xi tkꞌoꞌn jun chojbil tibaj altar tjax twi witz. 13 Oc cypone ma chixin cnetel cyuꞌne, naꞌnxtok t-xi waꞌl tuj lugar te cꞌulbil. Mlay che oc ten xjal waꞌl ka naꞌnxtok tpon, porque a in cub cyꞌiwlante chojbil. Te tibajxi jlu che oqueltzun ten xjal waꞌl, akeju otok che tzaj txcoꞌn. Cyjaꞌtzun, cyxiꞌye jaꞌlo, porque a or jlu jacu cnet cyuꞌne, che chi txin.

14 E jaxtzun bet tuꞌn cyjapun tuj tnam ex tej chꞌixtok cycanun tuj tnam, cyjaꞌ ttzaj Samuel tuj be kꞌiꞌn cyuꞌn tuꞌn t-xiꞌ tuj lugar te cꞌulbil.

15 Te ewtok, tej naꞌnxtok tpon Saúl, otok tzaj tmaꞌn Kman te Samuel: 16 Ax or jlu nchiꞌj tzul nsamaꞌne jun xinak tucꞌila, tzajni tuj cytxꞌotxꞌ tiyjil Benjamín, ex atzun jlu cꞌoquel tkꞌoꞌna toclen te cawil cyibaj aj Israel akeju etzan wuꞌne. Atzun jlu oc clolte cye tjakꞌ cycawbil aj Filistey, porque ma tzaj tzꞌeꞌy ncꞌuꞌje cyiꞌj ke xjal etzan wuꞌne. Aju tkꞌajkꞌajel cywiꞌ tuꞌn taꞌw cꞌixcꞌoj ma japun wucꞌile, chi Dios te Samuel.

17 Tejtzun tilwaj Saúl tuꞌn Samuel tzaj tmaꞌn Kman te: Atzunju xinak lu aju xi nmaꞌne teya. Atzun jlu cꞌoquel te cawil cyxol ke xjal etzan wuꞌne.

18 Tej cyocx ttxaꞌn tnam, xi lakꞌeꞌ Saúl tucꞌil Samuel, ex xi tmaꞌn te:

—Binchama xtalbil, yecꞌuntza weye jatum taꞌ tja ju xjal baꞌn nabin tuꞌn Dios, chi Saúl.

19 —Akine ju xjal baꞌn nabin tuꞌn Dios. Nejcuya nwitze tuꞌn kjax tuj lugar te cꞌulbil ex jacu waꞌna wucꞌile jaꞌlo ma chixin. Ex nchiꞌj te prim cxel ntzakꞌweꞌne tcyakilju taja tuꞌn ttzaj t-xjelina weye, ex cxel nkꞌoꞌne ambil teya tuꞌn tcub be tuꞌna. 20 Akeju ttxu tburra, ma bant-xi ox kꞌij cyxilen naj, miꞌn bisuna cyiꞌj, porque ma che cnet. Ax icx tcyakilju mas tbanil at cye aj Israel cꞌoquel te teya, ex te cye keju ateꞌ tuj tjaya, chi Samuel.

21 Xitzun ttzakꞌweꞌn Saúl:

—Pero tiyjil Benjamín we kin, aju mas tal chꞌin cyxol mastl cꞌloj cyiyjil aj Israel. Ex mya nok oꞌcx jlu, ax icx keju at t-xilen nmane cyucꞌil, mas chꞌin cyoclen cywitz mastl xjal cyxol tiyjil aj Benjamín. ¿Tikuꞌntzun in tzaj tmaꞌna tcyakil jlu weye?

22 Tzajtzun kꞌiꞌn Saúl tuꞌn Samuel tucꞌix tmajen, e jeꞌxtzun tiꞌn ma tuja, ex xi tkꞌoꞌn ju lugar mas baꞌn te cye twitzju cye mastl xjal otok che txquet tuꞌn, porque balo 30 cybet ke xjal ateꞌtok. 23 Xitzun tmaꞌn Samuel teju binchal chibj:

—Kꞌintza chibj aju xi nkꞌoꞌne teya ex xi nmaꞌne teya tuꞌn tel tpaꞌna.

24 Tzajtzun tiꞌn naj ju binchal chibj junca tcux chibj ex xi tkꞌoꞌn te Saúl, ex xi tmaꞌn Samuel te Saúl:

—Aju chibj lu paꞌmaj te teya wuꞌne. Chux chyoꞌna, porque tej ẍe tzaj ntxcoꞌne ke xjal, ma tzꞌel npaꞌne jlu tuꞌn tajben te tchiꞌya jaꞌlo, chi Samuel.

O waꞌn Saúl tucꞌil Samuel tuj kꞌij lu. 25 Tej cycuꞌtz tuj ju lugar te cꞌulbil, e ul tuj tnam ex oc ten Samuel yolil tucꞌil Saúl ma twi ja. 26 Tujtzun juntl kꞌij atx kwitz e jaw weꞌ, ex tej ttzaj t-xe cyaꞌj cuꞌtz txcoꞌn Saúl twi ja tuꞌn Samuel, ex xi tmaꞌn te:

—Weꞌctza tuꞌn t-xi tlajoꞌntl tbeya kꞌiꞌn.

Jawtzun weꞌ Saúl. Te tibajxi etz tuj cay tucꞌix Samuel, 27 ex tej chꞌixtok cycuꞌpun ttxaꞌn tnam, xi tmaꞌn Samuel te Saúl:

—Kꞌmanxa te tmajena tuꞌn t-xiꞌ nej, ex atzun teya, ayon jurata nej, porque il tiꞌj tuꞌn t-xi nmaꞌne teya aju o tma Dios weye.