—A Kman ma jaw scꞌonte teya tuꞌn toca te cawil cyibaj aj Israel, akeju etzan tuꞌn. 2 Atzun jaꞌlo, oc tbaj kpaꞌn kib, che oquel noj cabe xinak twitza, nikayin ttxlaj tpantyón Raquel tuj lugar Selsa tbi, tuj cytxꞌotxꞌ tiyjil Benjamín. Atzun ke che tzajel kꞌmante teya ka ma che cnet ke ttxu bur, akeju in jyona cyiꞌj, ex mintiꞌtl in bisun tmana cyiꞌj, nok oꞌcx in bisun cyiꞌje, ex in tmaꞌn: ¿Ti cꞌoquel tiꞌj ncyꞌajale? Chi tmana. 3 Oc t-xi lakꞌeꞌ chꞌintla, oc tpona t-xeꞌ jun tzeꞌ cꞌol tuj lugar Tabor, cꞌoquel tcꞌulban tiba cyucꞌil ox xinak cyjaꞌ cyjax tuj Betel tuꞌn cycꞌulun te Dios. Jun kꞌiꞌn ox chip tuꞌn, juntl kꞌiꞌn ox pan tuꞌn, ex atzunju toxin kꞌiꞌn jun bols tzꞌuꞌm tuꞌn, nojni tuꞌn taꞌl twitz uva. 4 Ctzajel kꞌolbeꞌna cyuꞌn, ex ctzajel cykꞌoꞌn cabe pan teya. Bix tzaj tcꞌmoꞌna. 5 Te tibajxi jlu cpola tuj tnam Gabaa twi jun tal witz jatum in xi kꞌot chojbil te Dios, jatum cycubsaꞌn txkan soldad te xkꞌukil cyuꞌn aj Filistey. Octzun tocxa tuj tnam, cꞌoquel tcꞌulban tiba cyucꞌil jun cꞌloj t-sanjel Dios in che yolin tiꞌj yol in tzaj tmaꞌn Dios cye, cyjaꞌ cycuꞌtz tuj lugar te cꞌulbil, nejnike xjal cywitz tucꞌil quitar ex tal tampor ex tucꞌix xux ex tucꞌix arpa nnoꞌc cyuꞌn. 6 Cnojela tuꞌn T-xew Kman, ex cꞌoquel tena yolil tiꞌj ju yol ctzajel tmaꞌn Dios teya ic tzaꞌn cye t-sanjel Dios, ex biꞌx cchꞌexpetela. 7 Octzun tjapun tcyakilju techal lu, binchama nok alcye taja tuꞌn tbant porque ate Dios ctel tucꞌila. 8 Ex txi neja nwitze tuj Gilgal, jatum tuꞌn ntene junx tucꞌila mas yajxi, tuꞌntzun cycub patit ke alumaj te chojbil te Dios, ex tuꞌn cyxi kꞌot ke oyaj te mojbabl tibil. Bix ayona wuk kꞌij ma chixin ocxi npone, maxitzun cxel nmaꞌne teya aju cbantel tuꞌna, chi Samuel.

9 Tej tbaj cykꞌolben cyib Saúl tucꞌil Samuel, o chꞌexpet naj tanmi Saúl tuꞌn Dios, ex tujx kꞌij lu o japun tcyakil techal aju o tma Samuel te. 10 Te tibajxi jlu, tej cypon Saúl tucꞌix tmajen tuj Gabaa, e bjeꞌtz txkan t-sanjel Dios canul tiꞌj. O nojtzun Saúl tuꞌn T-xew Dios, ex oc ten yolil tiꞌj ju yol in tzaj tmaꞌn Dios te ic tzaꞌnx cye t-sanjel Dios. 11 Cycyakil ke xjal ojtzkiꞌmaj Saúl cyuꞌn, tej cyqueꞌyinte ajun Saúl in yolin tiꞌj ju yol in tzaj tmaꞌn Dios te, junx cyucꞌil t-sanjel Dios, cyma cyxolx: ¿Ti ma baj tiꞌj tcyꞌajal Cis? ¿Maj tucꞌix Saúl toc te t-sanjel Dios?

12 Ax jun cyxol ke xjal kꞌmante juntl yol: ¿Alcyetzun nejenel cye jlu?, chi. Atzun tzaj jlet ju tal twitz yol lu: ¿Maj tucꞌix Saúl toc te t-sanjel Dios?

13 Tbajlenxitzun yolin Saúl tiꞌj ju yol in tzaj tmaꞌn Dios te, aj ex pon tuj lugar te cꞌulbil twi witz. 14 Atzunte terman tman Saúl oc ten kanil te ex teju tmajen:

—¿Jatum ẍeꞌx aje?

Atzunte Saúl xi ttzakꞌweꞌn:

—Xkoꞌx aje jyolte ke ttxu bur. Pero tuꞌnju mintiꞌ e cnet kuꞌne, txuc oꞌxe tucꞌil Samuel.

15 Atzunte terman tman Saúl xi ttzakꞌweꞌn:

—¿Titzun o tma Samuel? Binchama xtalbil, kꞌmantza weye.

16 Atzunte Saúl xi ttzakꞌweꞌn te terman tman:

—Clarxix tzaj tmaꞌn keye ka otok che cnet ke ttxu bur.

Pero mintiꞌ xi tmaꞌn Saúl ka attok toquel te rey, aju otok yolin Samuel tiꞌj.

17 Te tibajxi e tzaj ttxcoꞌn Samuel ke aj Israel tuꞌn cypon tuj lugar Mizpa, tuꞌntzun cybinte aju attok ttzajel tmaꞌn Kman cye, 18 ex atzun xi tmaꞌn cye aj Israel:

—Ate Kman aju Kdios aj Israel koꞌ chi cyjaꞌ: Akine in etz kꞌinte cyeye tuj Ejipt, akeye aj Israel, ex e clete wuꞌne tuj cykꞌab aj Ejipt ex tjakꞌ cycawbil mastl nasyon e yajlante cyeye, chi Kman. 19 Atzun cyeye ma tzꞌel cyicꞌune Cydiose aju ma clonte cyeye tuj tcyakilju in tzaj cyiꞌje, ex tuj yajbil cyeye, ex ma tzꞌel cyicꞌune tuꞌnju in che kanine tiꞌj tuꞌn toc jun rey te cawil cyibaje. Jaꞌlotzun che lakꞌetze twitz Kman, teylex junjun cꞌloj cyiyjile, chi Samuel cye.

20 Xitzun tmaꞌn Samuel tuꞌn cypon lakꞌeꞌ cycyakil cꞌloj aj Israel, ex cyibaj tiyjil Benjamín cub tzꞌak swert, ex atzun ke e jaw t-scꞌoꞌn Kman cyxol mastl cꞌloj cyiyjil. 21 Xitzun tmaꞌntl Samuel tuꞌn cypon lakꞌeꞌ ke tiyjil Benjamín, ex cyxoltzun cycyakil tiyjil Benjamín jaw scꞌoꞌn tiyjil Matri, ex cyxol tiyjil Matri, jaw scꞌoꞌn Saúl aju tcyꞌajal Cis. E jeꞌxtzun ke xjal jyolte Saúl ex mintiꞌ o cnet cyuꞌn, 22 cyjaꞌtzun, e oc ten kanilte juntl maj te Kman tuꞌntzun cybinte ka ax taꞌ Saúl. Atzunte Kman tzaj ttzakꞌweꞌn: Lu Saúl at tewan tib cyxol ke iktz. 23 E jeꞌxtzun kelan kꞌilte te cyxol iktz. Tejtzun tpon Saúl cyxol xjal, o cyil mi jun aj Israel in pon twaꞌl ic tzaꞌn te, nok oꞌcx in japun cywaꞌl twi t-semil. 24 Atzunte Samuel xi tkanin cye cycyakil xjal:

—¿Mape cyile aju xjal ma jaw t-scꞌoꞌn Kman tuꞌn toc te rey? Mi jun aj Israel jacu pon ic tzaꞌn te.

Atzun cye aj Israel e jaw schꞌin cyjaꞌ:

—Baꞌnwt tzꞌel tkꞌij rey.

25 Xi tchicꞌbaꞌn Samuel cywitz cycyakil xjal aju ley te cawbil, cub ttzꞌiban tuj jun libro, ex ocx tkꞌoꞌn tuj ja xbalun te Kman. Tbajlenxitzun jlu, xi tmaꞌn Samuel cye cycyakil xjal tuꞌn cyaj cyja. 26 Ax icx te Saúl aj meltzꞌaj tja max tuj Gabaa, ex o yolin Dios tuj cyanmi txkan xinak cyuw cycꞌuꞌj tuj kꞌoj tuꞌn cyxiꞌ te tucꞌil. 27 Atzun ke xjal mya baꞌn cymod cyma cyjaꞌ: ¿Maj atzun jlu oc clolte ke? Ex el cyicꞌun ex mintiꞌ oyaj xi cykꞌoꞌn te; atzunte Saúl, mintiꞌ o kꞌajt.