—E tbant tiꞌj jun kyol tucꞌila, ex jacu ko ajbene teya.

2 Atzunte Nahas aju aj Amón tzaj ttzakꞌweꞌn cye:

—Jacu bant tiꞌj jun nyole cyucꞌile, pero oꞌcx ka jacu cub tuj cywitze tuꞌn tjatz wiꞌne jun tbakꞌ twitz tuj tbankꞌab teyle junjun cyeye, tuꞌntzun ttzaj cychꞌixwi cycyakil aj Israel.

3 Atzun cye cytijil xjal tuj tnam Jabes xi cytzakꞌweꞌn:

—Kꞌontza wuk kꞌij ambil keye tuꞌn t-xi ksamaꞌne ke xjal kꞌol tkanil tuj tcyakil txꞌotxꞌ cye aj Israel; katzun mi aꞌl jun jacu colin kiꞌje, jacutzun txi kkꞌon kibe tuj tcwenta.

4 E pontzun ke xjal kꞌmalte tkanil tuj tnam Gabaa jatum najltok Saúl, ex xi cymaꞌn tkanil lu cye xjal. Cycyakiltzun ke xjal e oc ten okꞌel cyuwxix wen tej cybinte jlu. 5 Ex lutok te Saúl cyjaꞌ ttzaj, otok tzꞌajtz tuj cojbil cyucꞌix ke wacẍ kꞌiꞌn tuꞌn, ex xi tkanin cye:

—¿Ti ma baj cyiꞌj xjal? ¿Tikuꞌn in che okꞌ?

Atzun cye xjal xi cymaꞌn te aju tkanil otok pon cyuꞌn ke xinak tzajni ke tuj tnam Jabes. 6 Tejtzun tbinte Saúl jlu, o noj tuꞌn tipumal T-xew Dios ex tzajxix nim tkꞌoj. 7 Tzajtzun tiꞌn Saúl cabe wacẍ, e cub tpaẍuꞌn ex xi tkꞌoꞌn cye junjun sanjel tuꞌn t-xi cyiꞌn tuj tcyakil cytxꞌotxꞌ aj Israel. E jeꞌxtzun ke sanjel ex xi cymaꞌn cye xjal cyjaꞌ: Ictzun cbajel paẍuꞌn cywacẍ ke xjal akeju cycꞌiꞌ che oc lpeꞌ tiꞌj Saúl ex tiꞌj Samuel tuj kꞌoj.

Tzajtzun jun xobajil maꞌxix cyibaj xjal tuꞌn Kman; oc cychmon cyib tucꞌil Saúl, mojl takꞌpon cyuꞌn cycyakil. 8 Tej toc ten Saúl kꞌil cyajlal xjal tuj tnam Bezec, otok baj cychmon cyib ox syent mil xinak aj Israel, ex 30 mil aj Judá. 9 Ex xi tmaꞌn cye ke xjal otok che pon kꞌol tkanil:

—Cymanxe cye xjal najl tuj Jabes: Nchiꞌj ko pone te chilcukꞌij ex oc che cletele kuꞌne, chi Saúl, che chicuye.

E ajtzun ke xjal ex xi cymaꞌn tkanil lu cye xjal najl tuj Jabes, atzun cye aj Jabes nimxix o che tzalaj tej cybinte ju tkanil lu, 10 ex xi cymaꞌn te Nahas:

—Nchiꞌj txi kkꞌon kibe tuj tcwenta tuꞌntzun tbinchanteya kiꞌje nok alcye baꞌn tuj twitza.

11 Tujtzun juntl kꞌij baj bant cyten ke t-soldad Saúl; tuj ox cꞌloj e jeꞌl tuꞌn, ex naꞌnxtok tcub kꞌij tej cyocx tzokpaj tuj tmijil cycampament aj kꞌoj; ex e cub byoꞌn aj Amón cyuꞌn, cucxtok toc kꞌoj tej tpon chilcukꞌij. Atzun junjun e cyaj ankꞌin baj cysputun cyib, cyjaꞌtzun mi jun cye aj Amón cyaj ten tucꞌin tib tucꞌil juntl. 12 Xitzun cymaꞌn xjal te Samuel:

—¿Alcye keju e kꞌmante ka mlay tzꞌoc Saúl te krey? Cykꞌontze ke xjal lu tuꞌntzun cycub kbyoꞌne.

13 Atzunte Saúl xi tmaꞌn cye:

—Tuj kꞌij jaꞌlo mi jun baꞌn tuꞌn tcyim, porque ate Kman ma clonte cye aj Israel.

14 Ex xi tmaꞌn Samuel cye cycyakil xjal:

—Koꞌke tuj Gilgal tuꞌntzun tkeꞌ tcawin rey ma chixin.

15 Cyjaꞌtzun tten, cycyakil xjal e jeꞌx tuj Gilgal ex oc cykꞌoꞌn Saúl te rey ma chixin twitz Kman. Ex axtzun xi cykꞌoꞌn ke oyaj te mojbabl tibil te Kman; ex nimxix o tzalaj Saúl wen cyucꞌix cycyakil xjal aj Israel.