—Ma cyile ma bant wuꞌne tcyakilju tzaj cykanine weye, ex ma tzꞌoc nkꞌoꞌne jun rey tuꞌn tcawin cyibaje. 2 Ex lutzun aju rey lu, aju cbel nej cywitze. Bay weye ma chin tijine ex ma sakix nwiꞌye, ex ateꞌ ke ncyꞌajale cyxole. Akine in cub nej cywitze ojtxi atxix tuj ncuꞌxumale ax icx jaꞌlo, 3 ex lu kine atine cywitze: Katzun ma tzꞌel wiꞌne twacẍ jun xjal ex ka tchej, ex ka at jun cyeye ma baj nyajlaꞌne, ex ka at jun ma nbinchaye mya baꞌn tiꞌj, ex ka at jun ma tzꞌel nkanine tpwak nok tuꞌn miꞌn tcub t-sentens tuꞌn tlaj mya baꞌn otok tbincha, baꞌn tuꞌn ttzaj cymaꞌne jlu twitz Kman ex twitz ju rey ma jaw t-scꞌoꞌn, ex jacu tzꞌaj nchjoꞌne tcyakil, chi Samuel.

4 Atzun cye xjal xi cymaꞌn:

—Mi jun maj ma ko baj tyajlaꞌna, ex mintiꞌ jun mya baꞌn ma tbinchaya kiꞌje, ex mintiꞌ ma tzaj tcꞌmoꞌna tpwak jun xjal tuꞌn tcub tewana til.

5 Atzunte Samuel xi tmaꞌn cye:

—Lu Kman te testiw cyiꞌje tucꞌix aju rey ma jaw t-scꞌoꞌn, tuꞌnju mintiꞌ ma cnet jun wile cyuꞌne, chi Samuel.

—Ax toc jlu, che chi.

6 Ex xi tmaꞌntl Samuel cye tnam xjal:

—Ate Kman xi kꞌonte toclen Moisés ex Aarón tuꞌn cyetz ke cyxeꞌchele tuj Ejipt. 7 Cyjaꞌtzun cybincham cytene, porque twitz Kman chin yolile cyucꞌile tiꞌj tcyakilju baꞌn ma tbincha cyeye ex cye ke cyxeꞌchele. 8 Tej tpon Jacob cyucꞌix ke tiyjil tuj Ejipt, e octzun ten ke cyxeꞌchele cubsal twitz Kman; atzunte Kman xi t-samaꞌn Moisés tucꞌix Aarón, ex atzun ke e jeꞌtz kꞌinte cye cyxeꞌchele tuj Ejipt, ex atzun e ul najal tuj lugar lu. 9 Atzun cye el cypaꞌn cyib tiꞌj Kman aju Cydios, ex ate Kman xi kꞌonte cye tuj tkꞌab Sísara aju nejenel cye t-soldad Jabín aju rey tuj Hazor, ex tuj cykꞌab aj Filistey, ex tuj tkꞌab rey cye aj Moab, atzun ke jlu e oc ten kꞌojlel cyiꞌj ke cyxeꞌchele. 10 E cubsantzun twitz Kman ex cyma cyjaꞌ: Ma ko binchane il twitza Kman, tuꞌnju ma cyaj kcolina ex ma ko oc tene cꞌulul cywitz tilbilal Baal ex cywitz tilbilal Astarot. Ko tclomtzuna jaꞌlo tuj cykꞌab ke aj kꞌoj kiꞌje, ex ko ajbeltzune oꞌcx teya, che chi.

11 Cyjaꞌtzun, ate Kman xi samante Gedeón, tucꞌix Barac, tucꞌix Jefté, ex wucꞌixe akine Samuel, tuꞌntzun cyclete tuj cykꞌab ke aj kꞌoj cyiꞌje, ex cyjaꞌtzun ẍe ankꞌine tuj txubtxaj. 12 Atzun cyeye, tej cylonteye cyjaꞌtok toc tzokpaj Nahas cyiꞌje, aju rey cye aj Amón, tzaj cykanine jun rey weye tuꞌn tcawin cyibaje, masque aju cyeye cyrey ate Kman aju Cydiose. 13 Ex lutzun rey lu, aju ma jaw cyscꞌoꞌne. Ate Kman ma tzaj kꞌonte rey aju xi cykanine. 14 Atzun jaꞌlo, ka ma txi cynimane Kman ex ka ma che cꞌulune te, ex ka ma txi cynimane tyol ex ka miꞌn ma che icꞌe cyibaj ke tmandamyent, tzaꞌnx akeye ax icx aju rey in cawin cyibaje, ex ka ma che ankꞌine ic tzaꞌnx tajbil Kman aju Cydiose, octzun che ankꞌile baꞌn. 15 Pero ka mintiꞌ ma txi cynimane, ex ka mintiꞌ ma che japun ke tmandamyent cyuꞌne, cbel tkꞌoꞌn Kman cycastiwoye, ic tzaꞌn o tbincha cyiꞌj cyxeꞌchele.

16 Cyjaꞌtzun ax che tencje, ex cꞌoquel cyqueꞌyine ke techal maꞌxix che bantel tuꞌn Kman cywitze. 17 Aju tkꞌijlalil jaꞌlo, atzun tuꞌn tjaw chmet triw ex mintiꞌ jbal, ¿jec ax? Pero akine chin xel kaninte te Kman tuꞌn ttzaj tkꞌoꞌn jbal tucꞌix kꞌancyok, tuꞌntzun toc cyqueꞌyine ex tuꞌn tel cynicꞌe tiꞌj ka mya baꞌn aju ma cybinchaye twitz Kman, tuꞌnju ma txi cykanine tuꞌn toc jun cyreye, chi Samuel.

18 Octzun ten Samuel kanilte te Kman, jurattzun tzaj jbal ex kꞌancyok; atzun cye cycyakil xjal tzaj nim cyxobil twitz Kman ex twitz Samuel. 19 Cyjaꞌtzun xi cymaꞌn cycyakil xjal te Samuel:

—Cubsana kiꞌje twitz Kman Dios tuꞌntzun miꞌn kcyime akoꞌye tmajena, porque mas ma chꞌiytl kile tuꞌnju ma txi kkanine jun rey.

20 Atzunte Samuel xi ttzakꞌweꞌn:

—Miꞌn che xobe. Ax toc o cybinchaye mya baꞌn; atzun jaꞌlo miꞌn tzꞌel cypaꞌn cyibe tiꞌj Kman, nok oꞌcx che cꞌulune te tuꞌn tcyakil cyanmiye. 21 Miꞌn cheꞌx lpeꞌye cyiꞌj keju mya ax toc Dios ke, porque mlay che onin ex mlay che colin cyiꞌje, porque mya ax toc Dios ke. 22 Atzunte Kman, mlay che cyaj coline tuꞌn nok tuꞌnju maꞌ toclen tbi; porque tajbil tuꞌn cyoque te jun tnam tecuxix. 23 Ic tzaꞌn weye, ka ma txi ncoline tuꞌn nnaꞌne Dios cyiꞌje, jun il jlu twitz Kman, pero cuchiwt tuꞌn miꞌn ttzaj tkꞌoꞌn Kman ambil weye tuꞌn t-xi ncoline tuꞌn nnaꞌne Dios cyiꞌje. Ex che xel nxnakꞌtzaꞌne tzaꞌn tten tuꞌn cybete tuj tumelxix ex tuj tjikumal tiꞌj. 24 Cyjaꞌtzun, cynimanxe Kman ex che cꞌulune twitz axix toc ex tuꞌn tcyakil cyanmiye, ex cynaꞌntze aju nimxix ma tbincha Kman cyeye. 25 Pero ka cucx ma cybinchaye mya baꞌn, che najele tucꞌix ju cyreye, chi Samuel, baj tmaꞌn.