4 Cycyakil aj Israel o cybi ka otok tzꞌoc tzokpaj Saúl cyiꞌj aj Filistey, ex noktzun tuꞌn tlaj jlu e el icꞌun aj Israel cyuꞌn aj Filistey; cyjaꞌtzun tten oc tchmoꞌn Saúl ke t-soldad tuj lugar Gilgal. 5 Ax icx baj cychmon cyib aj Filistey tuꞌn cykꞌojin cyiꞌj aj Israel. Attok ox mil cycarwaj in che ajben tuj kꞌoj, ex kak mil soldad cyjax cyibaj chej, ex txkantl soldad in che bet tuꞌn cykan, nim cyajlal wen ic tzaꞌn ttxa tzꞌaꞌn ttzi mar. Cubtzun be cyuꞌn tuꞌn cyxiꞌ tuj tnam Micmas, ex e cub ten tiꞌjxi tnam Bet-avén tuj tjawitz kꞌij.

6 Tejtzun cyqueꞌyinte aj Israel ka ateꞌtok tuj nim xobajil porque cyjaꞌtok cyoc tzokpaj aj kꞌoj cyiꞌj, cyjaꞌtzun e jeꞌx ewal cyib tuj toyꞌ pic, ex tuj jul ex cyxol ke pic, ex tuj tkꞌab xak ex tuj tjulil aꞌ. 7 Ex at txkantl e icꞌx jlajxi nima Jordán tuꞌn cypon tuj cytxꞌotxꞌ aj Gad ex tuj cytxꞌotxꞌ aj Galaad; atzunte Saúl max cyaj ten tuj Gilgal, ex cycyakil ke t-soldad lepchkeꞌc tiꞌj in che xob wen. 8 Cub tyoꞌn Saúl wuk kꞌij ic tzaꞌnx otok tma Samuel te; pero ate Samuel ntzꞌinix tpon tuj Gilgal, ex cyjaꞌtzun cub be cyuꞌn junjun tuꞌn cyaj cyja. 9 Xitzun tmaꞌn Saúl cye xjal:

—Cyiꞌntze ke alumaj tzalu wucꞌile tuꞌn cycub patit, ex tucꞌix oyaj te mojbabl tibil, chi Saúl.

Ex ax Saúl cub patunte cye alumaj.

10 Tej matok in cub baj tpatun Saúl ke alumaj, pontzun Samuel. Etz Saúl canul tiꞌj Samuel ex oc ten kꞌolbel te, 11 pero xi tmaꞌn Samuel te:

—¿Tikuꞌn ma tbinchaya jlu?

Atzunte Saúl tzaj ttzakꞌweꞌn:

—Tej soc nqueꞌyine nibantok cyaj ok xjal cyja, ax icx teya mintiꞌ sula tuj tajlal xjaw banimaj tiꞌj, ex ke aj Filistey otok baj cychmon cyib tuj tnam Micmas; 12 entons nchiye cyjaꞌ: Mya yaj in che cuꞌtzcu aj Filistey tuj Gilgal tuꞌn cykꞌojin wiꞌje, ex atzun weye naꞌnx t-xi wokxenan wibe tuj tkꞌab Kman; cyjaꞌtzun ax kine ẍin oc ten patul cye alumaj, chi Saúl.

13 Xitzun tmaꞌn Samuel te:

—Aju ma bant tuꞌna misicyer chꞌin tnabl, nokwit ma txi tnimana aju tma Kman teya, mawtlo cyuwsanjtz toclena te rey cyxol aj Israel te jumajx. 14 Atzun jaꞌlo mya cucx ctel toclena te rey. Ctzajel tjyoꞌn Kman juntl xjal aju in tzalaj tiꞌj ex cꞌoquel tkꞌoꞌn te nejenel cyxol ke xjal etzan tuꞌn, porque ma tzicꞌa tibaj orden tzaj tmaꞌn Kman teya, chi Samuel.

15 Icꞌ Samuel tuj Gilgal ex xi tiꞌntl tbe. Atzun ke mastl soldad e oc lpeꞌ tiꞌj Saúl tuꞌn ttzyet kꞌoj cyuꞌn, e etz tuj Gilgal tuꞌn cypon tuj tnam Gabaa tuj cytxꞌotxꞌ aj Benjamín. Atzun e baj tajlaꞌn Saúl ke t-soldad, akeju lepchkeꞌctok tiꞌj, balo nok kak syent cybet. 16 Ate Saúl tucꞌix Jonatán aju tcyꞌajal, ex cyucꞌix ke soldad lepchkeꞌc tiꞌj, e cub ten tuj tnam Gabaa tuj cytxꞌotxꞌ tiyjil Benjamín, ex atzun cye aj Filistey e cub ten tuj tnam Micmas. 17 At ox cꞌloj soldad cye aj Filistey e etz tuj cycampament tuꞌn cyxiꞌ elkꞌal, jun cꞌloj cyjaꞌ e jeꞌx tuj tnam Ofra tuj lugar toc tbi Sual, 18 atzun juntl cꞌloj cyjaꞌ e jeꞌx tuj tnam Bet-Horón ex atzunju toxin cꞌloj cyjaꞌ e jeꞌx ttxaꞌnile witz tibaj chkꞌajlaj Zeboim, tlugaril tzkij txꞌotxꞌ.

19 Tuj tcyakil cytxꞌotxꞌ aj Israel misicyer jun txꞌinol cꞌuxbil at, porque atzun cyximbetz aj Filistey tuꞌn miꞌn tten jun txꞌinol cꞌuxbil cyxol aj Hebrey, tuꞌntzun miꞌn cybant spad ex lans cyuꞌn. 20 Cycyakil aj Israel in cheꞌx cyucꞌil aj Filistey tuꞌn tjuket ttzi cypunt, ex ttzi cychꞌoc ex ttzi cysiꞌwbil cꞌuxbil, ex ttzi cypic. 21 Cabe tal sak pwak nneꞌl kꞌiꞌn tuꞌn tjuket cytzi punt ex cytzi cychꞌoc, ex jun tal sak pwak nneꞌl kꞌiꞌn tuꞌn tjuket cytzi cysiꞌwbil cꞌuxbil ex tuꞌn cybaj juꞌxit cywiꞌ ke puy. 22 Tuꞌntzun jlu, mi jun spad ex mi jun lans kꞌiꞌn cyuꞌn xjal lepchkeꞌc tiꞌj Saúl ex Jonatán tej toc kꞌoj tuj kꞌij lu. Nok oꞌcx te Saúl ex Jonatán kꞌiꞌn spad ex lans cyuꞌn. 23 Ex matok cyjaꞌ cyicꞌ jun cꞌloj soldad cye aj Filistey tuj be nneꞌx t-xol witz ttxlaj tnam Micmas.