—Koꞌ, ko icꞌx tuj tkꞌab xak ex e koc tzokpaj cyiꞌj jun cꞌloj soldad ateꞌ ma jlajxi.

Pero mintiꞌ xi tmaꞌn Jonatán jlu te tman. 2 Otok txiꞌ Saúl tuꞌn tcub ten nikayin ttxlaj tnam Gabaa, tjakꞌ jun wiꞌ carnad ẍokꞌ tuj lugar Migrón, cyucꞌix kak syent soldad lepchkeꞌc tiꞌj. 3 Aju toc cwentil capiẍay in ajben te pal, atzun Ahías aju tcyꞌajal Ahitob. Ate Ahitob terman Icabod aju tcyꞌajal Finees, ex tal tchman Elí aju pal otok tzꞌajben te Kman tuj tnam Silo.

Ex mintiꞌtok baꞌn cyuꞌn xjal jatum otok txiꞌ Jonatán. 4 In jyontok Jonatán tumel tzaꞌn tten tuꞌn tpon max jatum cycubsaꞌn jun cꞌloj soldad cye aj Filistey. Aju be, atzun nneꞌx cyxol cabe nintz pic; jun pic Boses tbi, atzun juntl, Sene tbi. 5 Jun pic tcub tumlal tbankꞌab kꞌij te tnam Micmas ex juntl pic tcub tumlal tnayaj kꞌij te tnam Gabaa. 6 Ex xi tmaꞌn Jonatán teju onilte:

—Koꞌ, ko icꞌx ma jlajxi max jatum cycubsaꞌn ke soldad mya nimal Dios ke. Mya yajcu jacu ko tzaj onin tuꞌn Kman, bay te Kman mya nibantok jacu ko camban tuꞌn, ka cyucꞌil nim xjal ex ka cyucꞌil nicꞌxi xjal, chi Jonatán.

7 —Binchama tcyakilju ma cub t-ximana ex lu kine te onil teya tuj tcyakilju oc tbinchaꞌya, chi ju onil te.

8 Xitzun tmaꞌn Jonatán te:

—Bintza, ko icꞌex ma jlajxi jatum ateꞌ ke soldad, ex tuj kꞌanchaꞌl ko xeꞌl tuꞌntzun kilwaj cyuꞌn. 9 Ex ka ma tzaj cymaꞌn ke tuꞌn kayon cyiꞌj tuꞌn cycuꞌbil max jatum atoꞌ, axtzun ko ayol cyiꞌj ex miꞌn ko jax ma jatum ateꞌ. 10 Katzun ma tzaj cymaꞌn ke tuꞌn kjax max jatum ateꞌ, octzun ko jawix, porque atzun jun techal jlu ka otok che tzaj tkꞌoꞌn Kman ke jlu tuj kkꞌab tuꞌn tcub cyiꞌj kuꞌn, chi Jonatán.

11 Cyjaꞌtzun xi cyyecꞌun cyib cycabil tuꞌntzun cyilwaj cyuꞌn jun cꞌloj soldad aj Filistey. Ex tejtzun cyilwaj, cymatzun ke soldad aj Filistey: Cyqueꞌyinxe, niban cyetz ke aj Hebrey cyuj ke toyꞌ jul jatum otok txi cyewan cyib. 12 E tzajtzun schꞌin tiꞌj Jonatán ex tiꞌj ju onil te, che chi cyjaꞌ:

—Cytzaje max tzalu kucꞌile, cxel kmaꞌne jun kyole cyeye.

Xitzun tmaꞌn Jonatán teju onil te:

—Lpetza wiꞌje, porque che tzajel kꞌoꞌn ke jlu tuꞌn Kman tuj cykꞌab aj Israel tuꞌn tcub cyiꞌj.

13 Jaxtzun txacun Jonatán tucꞌix ju onilte lepchoꞌc tiꞌj. Akeju in che cubxi tuꞌn Jonatán, atzunju onilte in cub bantzinte cye. 14 Tuj tnejel maj kꞌoj lu, cub winkin soldad tuꞌn Jonatán tucꞌix onilte tuj cabe ech txꞌotxꞌ. 15 Cycyakil ke soldad ateꞌtok tuj campament ex cyucꞌix keju ateꞌ tuj cojbil, tzaj nimxix cyxobil. Ax icx ke soldad ateꞌtok tuj destacament, cyucꞌix keju otok cheꞌx elkꞌal, tzaj nim cyxobil. Ex tzaj luꞌlun txꞌotxꞌ, ex tuꞌntzun jlu tzaj jun nintz xobajil maꞌxix cyiꞌj. 16 Ke soldad cycubsaꞌn te xkꞌukil tuꞌn Saúl tuj tnam Gabaa tuj cytxꞌotxꞌ tiyjil Benjamín o cyil tej cyel sputj aj Filistey tuꞌn cyxi ok tuj tcyakil part.

17 Xitzun tmaꞌn Saúl cye soldad ateꞌ tucꞌil:

—E tjaw tajlal kxol tuꞌntzun tel knicꞌ tiꞌj alcyeke mi aꞌl at kxol.

Tejtzun tjaw tajlal cyuꞌn, eltzun cynicꞌ tiꞌj ka ate Jonatán mi aꞌltok cyxol ex tucꞌix ju onilte. 18 Ex tuj kꞌij lu, atzun taꞌtok cax cꞌubl tley Dios cyucꞌil aj Israel. Xitzun tmaꞌn Saúl te Ahías:

—Kꞌintza cax cꞌubl tley Dios tuꞌntzun kbinte alcye tuꞌn tbant kuꞌn.

19 Pero tej matok in yolin Saúl tucꞌil pal, mas e jaw tilj ke soldad aj Filistey tuj cycampament, cyjaꞌtzun xi tmaꞌn Saúl te pal:

—Ya miꞌn tzaj tiꞌna cax cꞌubl tley Dios.

20 Octzun tchmoꞌn Saúl cycyakil ke soldad ex e oc tzokpaj tuꞌn cykꞌojin cyiꞌj aj Filistey. Atzun cye aj Filistey biꞌx otok baj tzpet cynabl ex in cub cybyontok cyib cyxolx. 21 Ke aj Hebrey, akeju otok bet-xi nim kꞌij cytenlen cyxol aj Filistey ex otok che ul cyxol ke soldad aj Filistey, cyjaꞌ aj cykꞌon cyib cyxol aj Israel, akeju lepchkeꞌctok tiꞌj Saúl ex tiꞌj Jonatán. 22 Tejtzun cybinte aj Israel, akeju otok txi cyewan cyib tuj tiwitz txꞌotxꞌ cye tiyjil Efraín, ka otok che el ok aj Filistey, e octzun lpeꞌ cyiꞌj aj Filistey tuꞌn cykꞌojin cyiꞌj. 23 Aju kꞌoj max pon baj twiꞌ tuj tnam Bet-avén; cyjaꞌtzun tten e clet aj Israel tuꞌn Kman tuj kꞌij lu.

24 Ex tuj kꞌij lu otok che sict ke aj Israel wen porque mi jun cye otok waꞌn, tuꞌnju otok txi tmayoꞌn Saúl tuꞌn miꞌn cywaꞌn xjal, ex otok tma cyjaꞌ: Tzajxwit tcastiw xjal ka ma txi tnicꞌbeꞌn chꞌin wabj ka naꞌnxtok tex kꞌij, ex ka naꞌnxtok tcub cyiꞌj aj kꞌoj wuꞌne. 25 Ex e pon ke soldad tjakꞌ txkan chcꞌul jatum attok nim tja cab. 26 Tej cyocx xjal tjakꞌ chcꞌul, attok nim taꞌl cab, pero mi jun cye xi nicꞌbente chꞌin porque in che xob tuꞌnju yol otok txi tmaꞌn Saúl. 27 Atzunte Jonatán tuꞌnju mintiꞌ otok tbi ju yol otok txi tmaꞌn Saúl cye soldad, cuꞌx tkꞌoꞌn twi tcyꞌakoꞌch tuj tja cab ex oc ten loꞌl cab; tuꞌntzun jlu oc tipun. 28 Xitzun tmaꞌn jun soldad aj Israel te Jonatán:

—Ma txi tmaꞌn tmana jun yol cye xjal tuꞌn mi jun txi nicꞌbente jun tiꞌxti, ex ka at jun ma txi tnicꞌbeꞌn, il tiꞌj tuꞌn ttzaj tcastiw, tuꞌntzun jlu ya mintiꞌtl cyipun xjal, chi soldad.

29 Xitzun ttzakꞌweꞌn Jonatán:

—Ma tzaj tiꞌn nmane jun mya baꞌn cyibaj cycyakil xjal lu. Queꞌyintza, ma nnaꞌye ma tzꞌoc wipune tuꞌnju t-xilen nloꞌne chꞌin taꞌl cab. 30 Ex maswitlo ma tzꞌoc cyipun xjal nokwit ma che waꞌn tiꞌj wabj ma tzꞌel cyiꞌn cye aj kꞌoj. Ex maswitlo nim aj Filistey ma che cub cyuꞌn, chi Jonatán.

31 Tuj kꞌij lu ake aj Filistey cub cyiꞌj cyuꞌn aj Israel; tzaj keꞌ cykꞌojin tuj tnam Micmas ex max pon baj twiꞌ cyuꞌn tuj tnam Ajalón, pero ke soldad aj Israel ya otok che sict wen. 32 Te tibajxitzun jlu e jeꞌx tuꞌn tbaj cychmoꞌn tcyakil tiꞌxti otok cyaj ten cyuꞌn aj kꞌoj, ex tzaj cyiꞌn ke ẍneꞌl, ke wacẍ, ke tal tor, ex jurat naj e cub cybyoꞌn tuꞌn t-xi cychyoꞌn tcyakil tucꞌix chicꞌ. 33 Pero at junjun e jeꞌx kꞌmalte te Saúl:

—Lu ke xjal in che binchan il twitz Kman, porque in che chyoꞌn chibj tucꞌix tchcꞌel.

Xitzun tmaꞌn Saúl cye:

—Ma che icꞌe tibaj tley Kman. Jaꞌlo cytolintze jun abj matij tzalu wucꞌile. 34 Ex cyxiꞌye cyucꞌil ke xjal, ex cymanxe cye tuꞌn ttzaj tiꞌn teyle junjun jun twacẍ ex ka jun tal t-ẍneꞌl tuꞌntzun tcub cybyoꞌne, ex miꞌn txi cychyoꞌne chibj tucꞌix chicꞌ, tuꞌntzun miꞌn cybinchane il twitz Kman.

Te konicꞌan lu teyle junjun xi tiꞌn jun twacẍ ex cub cybyoꞌn jatum otok pon cyiꞌn. 35 Atzunte Saúl jaw tbinchaꞌn jun altar te patbil chojbil te Kman, ex atzun tnejel altar jlu jaw tbinchaꞌn Saúl te Kman. 36 Te tibajxi jlu o tma Saúl:

—Ko cuꞌx tuj konicꞌan jaꞌlo tuꞌn koc lpeꞌ cyiꞌj aj Filistey, ex tuꞌn ttzaj kiꞌn tcyakilju at cye, ex oc tcub kꞌij otok che cub baj kbyoꞌn cycyakil.

Xitzun cytzakꞌweꞌn cycyakil xjal:

—Binchama alcye baꞌn tuj twitza.

Atzunte pal xi ttzakaꞌweꞌn:

—Naꞌnxtok tbinchet jlu, kkaninx te Dios.

37 Xitzun tkanin Saúl te Dios:

—¿Ocpe chin oquel lpeꞌye cyiꞌj aj Filistey tuꞌn tcub cyiꞌj wuꞌne? ¿Che tzajelpe tkꞌoꞌna tuj cykꞌab aj Israel?

Atzunte Kman mintiꞌ tzaj ttzakꞌweꞌn tuj kꞌij lu. 38 Tuꞌntzun jlu o tma Saúl cyjaꞌ:

—Che lakꞌetze tzalu cycyakile akeye nejenel cye soldad, ex cybiꞌn baje alcye ma binchan il jaꞌlo. 39 Cxel ntziyane jun yol axix toc twitz Kman aju Clol cye aj Israel, masque a ncyꞌajale Jonatán ma binchan il, il tiꞌj cymel, chi Saúl.

Pero mi jun soldad xi ttzakꞌwente te. 40 Cyjaꞌtzun xi tmaꞌn Saúl cye cycyakil aj Israel:

—Cycub ten cyeye tzalu, atzun weye tucꞌix ncyꞌajale Jonatán part ko bel tene.

—Binchama alcye baꞌn tuj twitza, che chi soldad, xi cytzakꞌweꞌn.

41 Xitzun tmaꞌn Saúl:

—Aya Nman aju Cydios aj Israel: ¿Tzaꞌn tten naꞌnx ntzaj ttzakꞌweꞌna akine tmajena? Cuchiwt oc tjaw swert jaꞌlo tuꞌn tel knicꞌe tiꞌj alcye ma binchan il, ka a kine ex ka a ncyꞌajale, ex ka ake xjal etzan tuꞌna, chi Saúl.

Aju swert atzun cub tzꞌak tibaj Jonatán ex Saúl, atzun cye aj Israel mintiꞌ cyil. 42 Xitzun tmaꞌn Saúl:

—Cyiꞌn jawe swert tiꞌj ncyꞌajale Jonatán ex wiꞌje.

Aju swert cub tzꞌak tibaj Jonatán. 43 Cyjaꞌtzun xi tmaꞌn Saúl te Jonatán:

—Kꞌmaꞌn jatza alcye il ma tbinchaya.

Jatztzun tmaꞌn Jonatán:

—Ax toc xi nloꞌne chꞌin taꞌl cab tuꞌn twi ncyꞌakoꞌche kꞌiꞌn tuꞌn nkꞌabe, pero lu kine lu, baꞌn tuꞌn ncyime.

44 Xitzun tmaꞌn Saúl te:

—Awt Dios tzaj kꞌonte ncastiwoye cyuwxix ka miꞌn ma cyima, aya Jonatán.

45 Atzun cye xjal xi cymaꞌn te Saúl:

—Pero, ¿tzaꞌn tten tuꞌn tcyim Jonatán, baka mya tuꞌn ma che camban aj Israel? Miꞌn mlay cyim. Cxel kmaꞌne jun yol axix toc twitz Kman, mi jun cbajel tiꞌj, porque aju ma bant tuꞌn jaꞌlo ma tbincha tuꞌnju ma onin Dios tiꞌj, che chi.

Cyjaꞌtzun tten clet Jonatán cyuꞌn xjal tuꞌn miꞌn tcyim. 46 Ex mintiꞌtl xi lpeꞌ Saúl kꞌojlel cyiꞌj aj Filistey, ex tkanx e aj tuj cytanmi.

47 Cyjaꞌtzun tten oc Saúl te cyrey aj Israel, ex tuj tcyakil part oc ten kꞌojlel cyiꞌj aj kꞌoj. O kꞌojin cyiꞌj aj Moab, cyiꞌj aj Amón, cyiꞌj aj Edom, cyiꞌj ke rey tuj tnam Soba ex cyiꞌj aj Filistey. Ex nok jatum oc t-xiꞌ in cub cyiꞌj aj kꞌoj tuꞌn. 48 Oc ten kꞌojlel cyuwxix cyiꞌj aj Amalec, akeju in che ul aj elkꞌal, ex cub cyiꞌj tuꞌn. Cyjaꞌtzun tten e clet aj Israel tuꞌn tuj cykꞌab aj Amalec.

49 Ke tcyꞌajal Saúl, atzun ke jlu: Jonatán, Isúi ex Malquisúa; ex at cabe tmeꞌjel: Merab tbi aju tzicbaj ex atzunte tzꞌinbaj Mical tbi. 50 Ahinoam tbi t-xuꞌjil Saúl, aju tmeꞌjel Ahimaas. Aju nejenel cye t-soldad Saúl, Abner tbi, aju tcyꞌajal Ner aju tcyan Saúl. 51 Ate Cis tman Saúl, ex atzunte Ner tman Abner, tcyꞌajal Abiel ke jlu.

52 Cyuwxix e kꞌojin aj Israel cyiꞌj aj Filistey tuj tcyakil tankꞌibl Saúl, cyjaꞌtzun e tzaj tiꞌn cycyakil ke xinak at cyipun ex mintiꞌ in che xob tuꞌn cyoc te t-soldad.