—Akine in tzaj samaꞌne tuꞌn Kman tuꞌn tjaw nscꞌoꞌna, tuꞌn toca te rey cye aj Israel akeju etzan tuꞌn. Cyjaꞌtzun bintza aju in tmaꞌn Kman teya: 2 Chitzun Kman aju Tajaw Tcyakil: Cbel cycastiw aj Amalec wuꞌne tuꞌn tlaj ju mya baꞌn cybincha cyiꞌj aj Israel, tuꞌnju e cub ten tuj cybe tuꞌn cyoc ten kꞌojlel cyiꞌj tej cyetz tuj Ejipt. 3 Cyjaꞌtzun txiꞌya ex toc tzokpaja cyiꞌj; xitun baja tcyakilju at cye ex miꞌn tzaj kꞌakꞌan tcꞌuꞌja cyiꞌj. Byoncuya ke xinak, ke xuꞌj, ke cꞌwaꞌl ex ke neꞌ cucx cychꞌuꞌn, ax icx ke wacẍ, ke ẍneꞌl, ke chej camey ex ke bur, chi Kman.

4 Xitzun tmaꞌn Saúl tuꞌn cyxi txocbaj ke xinak, ex jaw tiꞌn cyajlal tuj lugar Telaim. Attok cabe syent mil xinak in che bet tuꞌn cykan ex laj mil xinak aj Judá. 5 Te tibajxi jlu xiꞌ Saúl tuj ju nintz tnam cye aj Amalec, ex e cub tkꞌoꞌn ke t-soldad tuj jun tkꞌab xak, 6 ex xi tmaꞌn cye aj Quenit:

—Cypaꞌn el cyibe, cyexe cyxol aj Amalec tuꞌntzun miꞌn cynaje wuꞌne junx cyucꞌil, porque o cybinchaye baꞌn cyiꞌj aj Israel tej lajoꞌntok cybe cyetzlen tuj Ejipt.

Eltzun cypaꞌn cyib aj Quenit cyiꞌj aj Amalec. 7 Octzun tzokpaj Saúl kꞌojlel cyiꞌj aj Amalec ex cub cyiꞌj tuꞌn, tzajx keꞌ kꞌoj cyuꞌn tuj lugar Hávila, ex max pon baj twiꞌ tuj lugar Shur aju tmojon tib tucꞌil Ejipt. 8 Tzyettzun rey Agag tuꞌn Saúl ex e cub tbyoꞌn cycyakil ke t-soldad. 9 Atzunte Agag mintiꞌ cub byoꞌn tuꞌn Saúl ex cyuꞌn ke t-soldad; ax icx mintiꞌ e cub cybyoꞌn ke tbanil ẍneꞌl, mi ke tbanil wacẍ, mi ke tal wacẍ mas ulni cynabl, mi ke tal ẍneꞌl, ex mintiꞌ e baj naj ke tiꞌxti wiꞌyilxix cyuꞌn, oꞌcx baj naj cyuꞌn tcyakilju myaꞌxix tbanil ex mya wiꞌyil.

10 Tzajtzun yolin Kman tucꞌil Samuel ex tma cyjaꞌ:

11 —Miwt oc nkꞌoꞌne Saúl te rey, porque ma tzꞌel tpaꞌn tib wiꞌje ex mintiꞌ ma japun tuꞌn aju yol xi nmaꞌne te, chi Dios.

Tuꞌntzun jlu tzaj nim tbis Samuel ex enter konicꞌan o cubsan twitz Kman. 12 Tejtzun kskix tuj juntl kꞌij, jaw weꞌ Samuel primxix wen tuꞌn t-xiꞌ tucꞌil Saúl, pero tzaj kꞌmaꞌn te ka otok txiꞌ Saúl tuj lugar Carmel ex atzun ma chixin otok jaw twaban jun abj matij te nablte, ex tbajlenxi jlu txuc otok txiꞌ tuj Gilgal. 13 Xiꞌtzun Samuel jatum taꞌ Saúl ex xi tmaꞌn Saúl te:

—Awt Kman cyꞌiwlan teya. Ma japun tyol Kman wuꞌne.

14 Atzunte Samuel xi tkanin te:

—¿Ti t-xilen tkꞌajkꞌajel cywi ẍneꞌl ex cywi wacẍ in nbiꞌne?

15 Atzunte Saúl xi tmaꞌn:

—Max ma che tzaj ke tuj cytxꞌotxꞌ aj Amalec, porque ma che cyaj cycloꞌn xjal ke tbanil ẍneꞌl cyucꞌix ke tbanil wacẍ, tuꞌn t-xi kꞌot te chojbil te Kman Dios, atzun ke mastl biꞌx ma che cub kbyoꞌne, chi Saúl.

16 —Miꞌn kꞌajta, porque cxel nmaꞌne teya aju saj tmaꞌn Kman weye konicꞌan mayꞌ, chi Samuel.

—Yolina, chi Saúl, xi ttzakꞌweꞌn.

17 Xitzun tmaꞌn Samuel te:

—Masque nej nok chꞌin toclena tuj twitza, pero ma tzꞌoc kꞌoꞌna te nejenel cye cyiyjil aj Israel, ex ma tzꞌoc kꞌoꞌna te cyrey tuꞌn Kman. 18 Ex at jun orden cyuwxix o txi tkꞌoꞌn Kman teya, tuꞌn cynaj ke aj Amalec tuꞌna tuꞌnju aj ilxix ke, ex tuꞌn toc tzokpaja cyiꞌj max oc cycub baj. 19 ¿Tikuꞌntzun mintiꞌ ma txi tnimana aju orden tzaj tmaꞌn Dios teya, ex tzaꞌn tten ma tzꞌoc tzokpaja tuꞌn ttzaj tiꞌna aju ma tzꞌel cyiꞌne cye aj kꞌoj, ex ma tbinchaya mya baꞌn twitz Kman?

20 Atzunte Saúl xi ttzakꞌweꞌn:

—Ma txi nnimane aju orden tuꞌn Kman, ex ma japun wuꞌne aju tzaj tmaꞌn weye tuꞌn nbinchanteye: Ma tzyet Agag wuꞌne aju rey cye aj Amalec, ex ma tzaj wiꞌne, ex ma che baj naj aj Amalec wuꞌne. 21 Pero ake soldad ẍe tzaj kꞌinte ke ẍneꞌl ex ke wacẍ akeju iltok tiꞌj tuꞌn cynaj, ex akeju mas tbanil ma jaw cyscꞌoꞌn tuꞌn cycub byet tuj Gilgal, ex tuꞌn cyxi kꞌot te jun oyaj te Kman Dios, chi Saúl.

22 Xitzun tmaꞌn Samuel cyjaꞌ:

Xitzun tmaꞌn Saúl te Samuel cyjaꞌ:

24 —Ax toc ma chin binchane il, mintiꞌ ma che japun ke tmandamyent Kman wuꞌne ex ke yol e tzaj tmaꞌna weye, porque tzaj nxobile cywitz ke xjal ex xi nnimane aju o cyma. 25 Pero in chin cubsane twitza tuꞌn tcub tnajsaꞌna wile ex koꞌ wucꞌile tuꞌn ncꞌulune te Kman.

26 Atzunte Samuel xi ttzakꞌweꞌn te Saúl:

—Mlay chinxe tucꞌila, porque ma tzꞌel ticꞌuna aju yol tzaj tmaꞌn Kman teya, ex jaꞌlo icx teya ma tzꞌel icꞌuna tuꞌn Kman, tuꞌn miꞌn ttentla te rey cye aj Israel.

27 Tej cyjaꞌtok taj meltzꞌaj Samuel tuꞌn tcub be tuꞌn, tzyet ttxaꞌn t-ẍjoꞌw tuꞌn Saúl, ex biꞌx xi sbitꞌj ju ẍjoꞌw. 28 Xitzun tmaꞌn Samuel te Saúl:

—Icxtzun ma tenba tcawbila cyxol aj Israel jaꞌlo, ma tzꞌel sbitꞌun tuꞌn Kman. Ma tzꞌel tiꞌn teya tuꞌn t-xi tkꞌoꞌn te juntl t-xjalila mas baꞌn tmod ic tzaꞌn teya. 29 Porque ate Dios, aju toc te cyajwalil aj Israel, miban nicꞌan yol ex misicyer in baj tchꞌexpuꞌn t-ximbetz, porque mya ic tten ic tzaꞌn jun xjal jacu baj tchꞌexpuꞌn t-ximbetz.

30 Atzunte Saúl xi tmaꞌn juntl maj:

—Ma chin binchane il, pero chin cubsale twitza tuꞌn cucx tnimana weye ic tzaꞌn rey cywitz ke cytijil xjal aj Israel, ex cywitz cycyakil aj Israel. Cyjaꞌtzun tzaja wucꞌile tuꞌn ncꞌulune twitz Kman Dios.

31 Ajtzun meltzꞌaj Samuel tucꞌil Saúl ex oc ten Saúl cꞌulul te Kman. 32 Xitzun tmaꞌn Samuel cye xjal:

—Cyiꞌntze Agag nwitze, aju cyrey aj Amalec.

Pontzun kꞌiꞌn Agag twitz Samuel in tzalaj wen, ex ximan tuꞌn ka otok tzicꞌx tiꞌj tcamic xobajilxix. 33 Atzunte Samuel xi tmaꞌn te:

—Tuꞌn t-spadiya nimcu xuꞌj ma che cyaj tkꞌoꞌna mintiꞌ cyal, cyjaꞌxtzun ctembil ttxuꞌya cyxol mastl xuꞌj, mintiꞌtl tal cyjel.

Ex cub tpaẍuꞌn Samuel t-ximlal Agag tuj Gilgal twitz Kman. 34 Tbajlenxi jlu aj Samuel tuj tnam Ramá, ex atzunte Saúl aj meltzꞌaj tja ma tuj tnam Gabaa, aju ttanmi. 35 Ex mintiꞌtl oc tqueꞌyin Samuel twitz Saúl juntl maj tuj tcyakil tankꞌibl, masque nim o bisun Samuel tiꞌj Saúl. Atzunte Kman tzaj tbis tuꞌnju otok tzꞌoc tkꞌoꞌn Saúl te rey cyxol aj Israel.