—¿Jtoj ban t-xi tcolina tuꞌn tbisuna tiꞌj Saúl? Weye mintiꞌtl wajbile tuꞌn cucx tten Saúl te rey cyxol aj Israel. Kꞌon cuꞌxa aseyt tuj jun cach, ex txiꞌya max tja Isaí aju aj Belén, porque ma jaw nscꞌone jun tcyꞌajal tuꞌn toc te rey.

2 Atzunte Samuel xi ttzakꞌweꞌn:

—¿Tzaꞌn ctel wuꞌne tuꞌn nxiꞌye? Ka ma tbi Saúl jlu, chin cbel byoꞌne tuꞌn.

Atzunte Kman tzaj ttzakꞌweꞌn:

—Kꞌinxa jun tal vac ex cxel tmaꞌna ka ctzajel tkꞌoꞌna te jun chojbil weye. 3 Te tibajxi jlu ctzajel ttxcoꞌna Isaí tiꞌj chojbil lu, ex akine chin kꞌmalte teya aju cbantel tuꞌna. Kon jaxa aseyt tuj twiꞌ ju xjal tuꞌn toc te rey, aju cxel nmaꞌne teya.

4 Tbinchatzun Samuel ic tzaꞌnx otok tzaj kꞌmaꞌn te tuꞌn Kman. Tejtzun tpon tuj Belén, e etz ke cytijil xjal te tnam cꞌmolte te tucꞌil nim cyxobil ex xi cykanin te:

—¿Tkanil tzalajbilpe kꞌiꞌn tuꞌna?

5 Xi ttzakꞌweꞌn Samuel:

—Ma chin tzaje tuꞌn t-xi kꞌot jun chojbil te Kman. Cyxjansan baj cyibe twitz Kman, ex cytzaje wucꞌile tuꞌn t-xi kꞌot ju chojbil.

Bajtzun xjansaꞌn Isaí cyucꞌix ke tcyꞌajal tuꞌn Samuel, ex e jeꞌx txcoꞌn tuꞌn Samuel tuꞌn cyten tucꞌil tiꞌj chojbil. 6 Tejtzun cypon ke, xi tqueꞌyin Samuel tiꞌj Eliab aju nej tcyꞌajal Isaí, ex cub t-ximan: Ax toc ate xinak lu ma jaw t-scꞌoꞌn Kman tuꞌn toc te rey.

7 Atzunte Kman xi tmaꞌn te Samuel: Miꞌn tzꞌoc tkꞌoꞌn tcwenta tiꞌj queꞌyin ex mi tiꞌj twaꞌl maꞌxix porque icꞌun jlu wuꞌne. Weye mya a toc ncwente tiꞌj queꞌyin xjal, porque aju xjal oꞌcx nnoꞌc tkꞌoꞌn tcwent tiꞌj tzaꞌn queꞌyin jun xjal, atzun weye atzun toc ncwente tiꞌj tanmi xjal, chi Dios.

8 Tzajtzun ttxcoꞌn Isaí juntl tcyꞌajal Abinadab tbi, ex pon tiꞌn tucꞌil Samuel; atzunte Samuel tma:

—Ax icx mya ate jlu ma jaw t-scꞌoꞌn Kman.

9 Pon tiꞌntl Isaí juntl tcyꞌajal, Sama tbi; ax icx tma Samuel:

—Ax mya te jlu ma jaw t-scꞌoꞌn Kman.

10 E pon tiꞌn Isaí ke wuk tcyꞌajal tucꞌil Samuel, atzunte Samuel xi tmaꞌn: Mi jun cyxol jlu ma jaw t-scꞌoꞌn Kman. 11 Xitzun tkanin Samuel te Isaí:

—¿Mintiꞌpe txkantl tcyꞌajala at? Atzunte Isaí xi ttzakꞌweꞌn:

—Oꞌcx juntl mas chꞌin, aju in pastorin cyiꞌj ẍneꞌl.

Atzunte Samuel xi tmaꞌn te Isaí:

—Baꞌn tuꞌn t-xi txocbaj, porque mlay ko oc keꞌ tiꞌj mes ka naꞌnxtok tul tzalu.

12 Xitzun tmaꞌn Isaí tuꞌn t-xi txocbaj. Aju cuꞌxun lu cyak xjal te, tbanilxix queꞌyin tbakꞌ twitz ex tbanilxix queꞌyin t-ximlal.

Tzajtzun tmaꞌn Kman te Samuel:

—Atzun jlu. Chux weꞌctza, koꞌn jaxa aseyt tuj twiꞌ ex kꞌonca toclen te rey.

13 Tzajtzun tiꞌn Samuel aseyt tcuꞌx tuj cach, ex cywitz ke ttzic jax tkoꞌn aseyt tuj twi David, ex oc tkꞌoꞌn toclen te rey. Tujxtzunju or lu ul T-xew Kman tucꞌil David ex tzaj kꞌoꞌn tipumal tuꞌn. Te tibajxi jlu baj tkꞌolben tib Samuel cyucꞌil, ex aj meltzꞌaj tuꞌn tpon tuj tnam Ramá.

14 Otok tzꞌel tpaꞌn tib T-xew Kman tiꞌj Saúl, ex in yajlanjtztok Saúl tuꞌn jun juꞌẍ otok tzaj t-samaꞌn Kman. 15 Cyjaꞌtzun xi kꞌmaꞌn te Saúl cyuꞌn ke tmajen:

—Jaꞌlo tat, ma tzaj t-samaꞌn Dios jun juꞌẍ tuꞌn tyajlanjtza tuꞌn. 16 Cyjaꞌtzun kꞌmantza keye, akoye ajbel teya, tuꞌn t-xi joybaj jun xjal baꞌn chimban tiꞌj arpa, ex oc toc tzokpaj juꞌẍ tiꞌja, cꞌoquel ten chimbal tiꞌj arpa ex tuꞌn jlu cbantela, che chi majen.

17 Xitzun ttzakꞌweꞌn Saúl cye ke tmajen:

—Baꞌn tuꞌn cyxiꞌye jyolte jun xjal mejor chimban tiꞌj arpa ex cyiꞌntze tzalu.

18 At jun tmajen Saúl tma cyjaꞌ:

—O wile at jun tcyꞌajal Isaí aju aj Belén, mejor chimban tiꞌj arpa, ax icx cyuw tcꞌuꞌj ex at tipun ex at tnabl tuꞌn tkꞌojin, ex oc in yolin at tnabl tyol; tbanilxix queꞌyin ex a Kman in onin te.

19 Xitzun t-samaꞌn Saúl ke t-sanjel tucꞌil Isaí tuꞌn t-xi cymaꞌn te cyjaꞌ: Samantza tcyꞌajala David wucꞌile, aju in pastorin cyiꞌj ẍneꞌl. 20 Tzajtzun t-samaꞌn Isaí David aju tcyꞌajal tucꞌil Saúl, ex tzaj t-samaꞌn jun bur ikan pan tuꞌn, ex jun tzꞌuꞌm nojni tuꞌn vin, tucꞌix jun tal tman chip te Saúl. 21 Cyjaꞌtzun tten pon David tucꞌil Saúl ex ax cyaj ten tuꞌn tajben te. O ten nimxix tcꞌujlalil Saúl tiꞌj ex oc tkꞌoꞌn te onilte. 22 Xitzun t-samaꞌn Saúl jun tkanil te Isaí cyjaꞌ: In chin cubsane twitza tuꞌn ax tuꞌn tcyaj ten David wucꞌile porque nim in chin tzalaje tiꞌj. 23 Cyjaꞌtzun, oc toc tzokpaj juꞌẍ tiꞌj Saúl tuꞌn Dios, in tzaj tiꞌn naj David aju arpa ex nnoꞌc ten chimbal tiꞌj. Nok tuꞌn jlu nnoꞌctl tipun Saúl ex baꞌn in cyaj, atzunte juꞌẍ nneꞌl tpaꞌn tib tiꞌj.